داستارقاننان ءدام كەتپەسىن!

«اس ادامنىڭ – ارقاۋى» دەگەن. جاڭا جىلدىڭ الدىندا جۇرتتىڭ ىقىلاسى ازىق-ت ۇلىك تۇرلەرىنە ەرەكشە اۋاتىنى بەلگىلى. جاڭاجىلدىق داستارقان باعاسى قولجەتىمدى ءارى ساپالى دامنەن قايىسىپ تۇرسا – مۇنداي مەرەكەلىك وتىرىستان اينالىپ كەتپەيسىز بە؟! قاراعاندى وبلىسىنىڭ اكىمى نۇر­مۇحامبەت ابدىبەكوۆ ەرمەكوۆ كوشەسى بويىنداعى «يۋجنىي» سۋپەرماركەتىنە ارنايى بارىپ, سورەلەردەگى ازىق-ت ۇلىك ونىمدەرىنىڭ تۇرلەرىمەن تانىستى. ءوڭىر باسشىسىن بۇل جەردە الۋان ءتۇرلى تاعامداردىڭ   باعالارى قىزىقتىردى. – مەملەكەت باسشىسى نۇرسۇلتان نازارباەۆتىڭ تاپسىرماسىنا سايكەس, قازاقستاننىڭ بارلىق وڭىرلەرىندە «قازاقستاندا جاسالعان» اكتسياسى باس­تاۋ العانى بەلگىلى. جالپى, قازاقستاندا وندىرىلگەن تاۋارلاردى تۇتىنۋشىعا دەلدالداردىڭ ارالاسۋىنسىز جەتكىزۋ – اتالعان اكتسيانىڭ باستى ماقساتى, – دەدى وبلىس اكىمى. قازىرگى تاڭدا قاراعاندى وبلىسىندا ەت, جەمىس-كوكونىس, ءسۇت جانە ءتاتتى تاعامدار ونىمدەرىنىڭ 40-تان اسا اتالىمى شىعارىلادى. بۇگىنگى كۇننىڭ وزىندە قالانىڭ بارلىق سۋپەرماركەتتەرىندەگى جالپى ساۋدا الاڭىنىڭ 40-تان اسا پايىزىن ساپا جاعىنان وسى تەكتەس شەتەلدىك تاۋارلاردان ءبىر مىسقال كەم تۇسپەيتىن قازاق­ستاندىق ونىمدەر الىپ وتىر. بيىلعى 2016 جىلى ساۋدا ورىندارىنداعى قازاق­ستاندىق مازمۇنداعى ءونىم دەڭگەيىن 50 پايىزعا دەيىن جەتكىزۋ جوسپاردا بار. بۇدان بولەك, جاقىن ارادا پرەزيدەنت تاپسىرماسى بويىنشا « ۇلى دالا ونىمدەرى» ۇلتتىق برەندى قۇرىلادى. بۇل ساپا بەلگىسىمەن تاڭبالانعان ونىمدەردىڭ بارلىعى قازاقستاندا شىعارىلۋىمەن ەرەكشە ماڭىزعا يە بولماق. سونىمەن قاتار, بۇل تاۋارلاردىڭ ساپاسىنا دا ەرەكشە ءمان بەرىلمەكشى. قايرات ءابىلدينوۆ, «ەگەمەن قازاقستان». قاراعاندى.