اقمولداعى اياق كيىم فابريكاسى

اگلومەراتسيالىق ايماقتاعى اقمول اۋىلىندا قايتا جاڭعىرتىلعان اياق كيىم فابريكاسى اشىلدى. سالتاناتقا وبلىس اكىمى سەرگەي كۋلاگين قاتىسىپ, جەڭىل ونەركاسىپ وكىلدەرىنە ساتتىلىك تىلەدى. «SAMHAT» جاۋاپكەرشىلىگى شەكتەۋلى سەرىكتەستىگىنىڭ تاريحى 2008 جىلدان باستالعانىمەن كاسىپورىننىڭ سەرپىلىپ جۇمىس ىستەيتىن شاعى ەندى تۋعانداي. استانا قالاسىندا شاعىن عيماراتتى جالداپ كەلگەن ولار العاشىندا دايىن ءونىمدى ساتۋمەن اينالىستى. ال, 2010 جىلى جەكە تسەح اشۋعا شەشىم قابىلدانعان. ايتكەنمەن, ۇجىم ءوز قابىلەتىن تولىق كورسەتە الماعانداي. اقىرىندا «SAMHAT» جشس اقمول اۋىلىنا كوشىپ, جەرگىلىكتى بيزنەستىڭ ءورىسىن كەڭىتۋگە بەل بايلايدى. ۇسىنىستى وبلىس جانە اۋدان باسشىلىعى قولدادى. ارنايى شەشىممەن 2013 جىلى 1,2 گەكتار جەر تەلىمى مەن 1200 شارشى مەترلىك گاراج عيماراتى ءبولىندى. جوندەۋ جانە جابدىقتاۋ جۇمىستارىنان كەيىن كاسىپورىن تولىق قۋاتىندا جۇمىس ىستەي باستادى. ماسەلەن, 2015 جىلدىڭ ون ءبىر ايىندا عانا 800 ميلليون تەڭگەنىڭ 100 مىڭ جۇپ اياق كيىمى يگىلىككە جاراتىلدى. – ءبىز تازا تەرىدەن تىگىلگەن اياق كيىمنىڭ 20 ءتۇرىن شىعارامىز, – دەيدى فابريكا ديرەكتورى سامال تىلەۋباەۆا. – «SAMHAT» جشس نەگىزىنەن قورعانىس سالاسىنىڭ مەملەكەتتىك تاپسىرىسىن ورىندايدى. اقمول اۋىلىندا جۇمىس اۋقىمىن كەڭەيتۋگە مۇمكىندىك تۋىپ وتىر. سوندىقتان, 2016 جىلى ءونىم شىعارۋدىڭ جىلدىق كولەمىن 500 مىڭ جۇپقا جەتكىزۋ جانە ەكسپورتتىق باعدار ۇستانۋ نيەتىندەمىز. قازىر كاسىپورىن 60 ادامدى تۇراقتى جۇمىسپەن قامتىدى. الداعى كەزدە ونىڭ سانى 200-گە جەتەدى. باقبەرگەن امالبەك, «ەگەمەن قازاقستان». اقمولا وبلىسى, تسەلينوگراد اۋدانى.