كوكشەتاۋ. 8 قاڭتار. كوكشەتاۋ قالاسىنداعى «قوعامدىق كەلىسىم» سارايىندا, جالپىۇلتتىق «ۇلكەن ەل – ۇلكەن وتباسى» جوباسى اياسىندا, «تاۋەلسىزدىك جىلىنا 25 جىل» اكتسياسى باستاۋ الدى. بۇل تۋرالى egemen.kz ءتىلشىسى حابارلادى.
شاراعا قاتىسقان ەتنومادەني ورتالىقتاردىڭ وكىلدەرىن, دەپۋتاتتاردى, وبلىستىق باسقارمالار مەن دەپارتامەنتتەردىڭ باسشىلارىن, قالىڭ جۇرتشىلىقتى قۇتتىقتاۋ سوزىندە اقمولا وبلىسى اكىمىنىڭ ورىنباسارى نۇرلان نۇركەنوۆ ەلباسى, قازاقستان حالقى اسسامبلەياسىنىڭ توراعاسى نۇرسۇلتان نازارباەۆ اسسامبلەيانىڭ ءححىى سەسسياسىندا جانە قازاقستان پاتريوتتارىنىڭ فورۋمىندا باستاماشىلدىق كورسەتكەن اكتسيانىڭ ماڭىزدىلىعىن اتاپ كورسەتتى.
«عاسىرلار بويعى ارمانا تاۋەلسىزدىككە قول جەتكىزۋ ارقىلى ءبىز وتانىمىزدى كوركەيتۋدىڭ تاريحي مۇمكىندىگىنە يە بولدىق», دەدى نۇرلان جاڭبىرشى ۇلى. ءبىز وسىناۋ قىسقا ءارى وتە جاۋاپتى 25 جىلدا سەرپىندى ەڭبەك ەتىپ, زامانا كوشىندەگى مۇلدەم جاڭا, قۋاتتى مەملەكەتتى قۇرا بىلدىك. بۇگىنگى كۇنى قازاقستان مەملەكەتتىك قۇرىلىستىڭ ساپالىق جاڭا كەزەڭىنە شىقتى. بارشامىزدى جەڭىسكە باستايتىن قادامدار قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ بەس ينستيتۋتسيالىق رەفورماسىندا تۇبەگەيلى ايقىندالدى. ۇلت جوسپارىنىڭ تەمىرقازىعى – ەلىمىزدى مەيلىنشە دامىعان 30 مەملەكەتتىڭ قاتارىنا قوسۋدى ماقسات تۇتاتىن «ماڭگىلىك ەل» يدەياسى.
الەمدى قاۋزاعان داعدارىستارعا قاراماستان ەل ەكونوميكاسىنىڭ سەرپىندى وسىمىنە باعىتتالعان شارالار جۇزەگە اسىرىلۋدا. «نۇرلى جول» باعدارلاماسى جالعاسىن تاۋىپ, ۇدەمەلى يندۋستريالىق-يننوۆاتسيالىق دامۋدىڭ ەكىنشى بەسجىلدىعى باستاۋ الدى. قازاقستان ەۋرازيالىق ەكونوميكالىق وداق پەن الەمدىك ساۋدا ۇيىمىنىڭ مۇشەسى رەتىندە قازاقستان حالقىنىڭ تۇرمىسى مەن وتانىمىزدىڭ گۇلدەنۋىنىڭ ماقساتتى جولىن جالعاستىرۋدا.
ءبىزدىڭ ەلىمىز 2015 جىلى ەكسپورتتاۋشى جەتەكشى 50 ەلدىڭ قاتارىنا قوسىلىپ, الەمدىك ساتىداعى 43-ءشى ورىنعا كوتەرىلدى. بيىلعى 1 قاڭتاردان الەۋمەتتىك جاردەماقىلار, زەينەتاقى مەن شاكىرتاقى, بيۋدجەتتىك مەكەمەلەر مەن مەملەكەتتىك قىزمەتكەرلەردىڭ ەڭبەكاقىسى ءوستى. قازىرگى جاعدايدا ءمۇنداي كەپىلدىكتى كەز-كەلگەن مەملەكەت قامتاماسىز ەتە بەرمەيتىنى بەلگىلى. بۇگىنگى كۇنى ءبىزدىڭ بارشامىز, ورتاق وتانىمىزدىڭ پاتريوتى رەتىندە, ناقتى ىستەرگە جاۋاپكەرشىلىكپەن كىرىسۋىمىز كەرەك. تاۋەلسىزدىك مۇراتتارىنا ادال بولۋ, شىرايلى شاڭىراعىمىزدىڭ شاتتىعىن ەسەلەۋ ءاربىر ازاماتتىڭ اسىل پارىزى سانالادى.
سونداي-اق, اكتسياعا قاتىسۋشىلار الدىندا «قازاق ءتىلى مەن مادەنيەتى» قوعامدىق ۇيىمىنىڭ توراعاسى مەيرامبەك قيىقوۆ, «ورىس قاۋىمداستىعى» جانە «ۆيدەرگەبۋرت» نەمىس قوعامدىق بىرلەستىگىنىڭ جەتەكشىلەرى الەكساندر ارتەمەنكو مەن ليۋبوۆ لەنەۆا ءسوز الىپ, «تاۋەلسىزدىكتىڭ 25 جىلدىعىنا تۇعىرلى 30 شارا» باستاماسىن كوتەردى.
سالتاناتتى باسقوسۋدا ءبىر توپ بەلسەندى ازاماتقا مەملەكەت باشىسىنىڭ, وبلىس اكىمىنىڭ العىس حاتتارى مەن «قازاقستان حالقى اسسامبلەياسىنىا – 20 جىل» مەرەكەلىك مەدالدارى تابىس ەتىلى.
اكتسيا قورىتىندىسىندا تاۋەلسىزدىگىمىزدىڭ 25 قۇرداسىنىڭ «العا, قازاقستان!» ءانىن شىرقاۋى جۇرتشىلىقتى تەبىرەنىسكە بولەدى.
باقبەرگەن امالبەك.
دەرەك, سۋرەت: egemen.kz
