اقمولا وبلىسىندا جەرگىلىكتى پوليتسيا باستىعى تاعايىندالدى

كوكشەتاۋ. 8 قاڭتار. اقمولا وبلىستىق ءماسليحاتىنىڭ كەزەكتەن تىس 44-ءشى سەسسياسىندا جەرگىلىكتى پوليتسيا قىزمەتىنىڭ باستىعىن تاعايىنداۋ تۋرالى ماسەلە قارالدى.  بۇل تۋرالى egemen.kz ءتىلشىسى حابارلادى. سەسسيا جۇمىسىنا وبلىس اكىمى سەرگەي كۋلاگين مەن ونىڭ ورىنباسارلارى, بارلىق قۇقىق قورعاۋ ورگاندارىنىڭ باسشىلارى, قالالىق جانە اۋداندىق ءماسليحاتتاردىڭ حاتشىلارى, 31 دەپۋتات قاتىستى. وبلىستىق ءماسليحات حاتشىسى دۋلات نۇرمولدين كىرىسپە سوزىندە قازاقستان رەسپۋبليكاسىنىڭ زاڭدىق اكتىلەرىنە جەرگىلىكتى پوليتسيا قىزمەتىنە قاتىستى جەكەلەگەن وزگەرىستەر ەنگىزىلگەنىن اتاپ كورسەتتى. سەسسيادا بايانداما جاساعان اقمولا وبلىستىق ىشكى ىستەر دەپارتامەنتىنىڭ باستىعى, پوليتسيا گەنەرال-مايورى جايلاۋبەك حالىق ۇلى 2015 جىلى جەرگىلىكتى اتقارۋشى ورگاندارمەن بىرگەلىكتە, قۇقىقتىق تالاپتاردىڭ ءتيىستى دەڭگەيدە قامتاماسىز ەتىلگەنىنە نازار اۋداردى. جىل قورىتىندىسى بويىنشا قوعامدىق ورىندار مەن كوشەلەردە ءتارتىپ بۇزۋشىلىق, سايكەسىنشە 22 جانە 16 پايىزعا ازايعان. وبلىس اۋىر جانە وتە اۋىر قىلمىستاردىڭ اشىلۋى بويىنشا رەسپۋبليكا بويىنشا ءتورتىنشى ورىنعا كوتەرىلدى. قىلمىستىڭ الدىن الۋ, ونىڭ كەز-كەلگەن كورىنىسىنە «نولدىك توزبەۋشىلىك» جۇيەسى قالىپتاسقان. ءماسليحات حاتشىسى جەرگىلىكتى پوليتسيا باسشىسى قىزمەتىنە ۇمىتكەر جانباي جۇماجان ۇلى وماروۆتى تانىستىرىپ, ول ءبىر اۋىزدان اتالعان لاۋازىم جەتەكشىلىگىنە سايلاندى. وبلىس اكىمى سەرگەي كۋلاگين ءتيىستى جارلىققا قول قويىپ, جاڭا قۇرىلىمنىڭ باسشىسىنا تابىس تىلەدى. باقبەرگەن امالبەك. دەرەك, سۋرەت: egemen.kz