اتىراۋ اۆتوبۋستارىندا جولاقى قىمباتتادى

اتىراۋ. 8 قاڭتار. جاڭا جىلدان باستاپ اتىراۋدىڭ جولاۋشى تاسىمالدايتىن اۆتوبۋستارىنداعى جولاقى قۇنى كوتەرىلىپ, ەندى قالاىشىلىك باعىتتاردا جولاۋشىلار 80 تەڭگەدەن, ال وبلىس ورتالىعىنا ىرگەلەس ورنالاسقان ەلدى مەكەندەرگە قاتىناۋشىلار 90 تەڭگەدەن تولەيتىن بولدى. بۇل تۋرالى egemen.kz ءتىلشىسى حابارلادى. بۇعان دەيىن اتىراۋ قالاسىنداعى اۆتوبۋستاردا جولاۋشىلار 50 تەڭگەدەن جولاقى تولەۋشى ەدى. ال قالا ماڭىنداعى ەلدى مەكەندەرگە قاتىنايتىن باعىتتاردا جولاۋشىلار 70 تەڭگەسىن جولاقى ءۇشىن بەرىپ كەلدى. ەندى اتىراۋ قالاسى اكىمىنىڭ ءبىرىنشى ورىنباسارى ادىلبەك ءزايدۋلليننىڭ ءمالىم ەتكەنىندەي, جولاۋشى تاسىمالىمەن اينالىساتىن اۆتوبۋستارداعى جولاقى قۇنى كوتەرىلدى. وسىلايشا, جاڭا جىلدان بەرى اتىراۋ قالاسىنداعى باعىتتاردا ءار جولاۋشى ءۇشىن جولاقى قۇنى 30 تەڭگەگە قىمباتتاپ, 80 تەڭگەنى قۇراپ وتىر. ال قالا ماڭىنداعى ەلدى مەكەندەرگە بارۋ ءۇشىن ەندى جولاۋشىلار 90 تەڭگەدەن تولەيتىن بولدى. ياعني, وبلىس ورتالىعىنا تاياۋ ورنالاسقان ەلدى مەكەندەرگە اۆتوبۋستارمەن جەتۋ قۇنى 90 تەڭگەدەن بەلگىلەندى. جولداسبەك شوپەعۇل. دەرەك: egemen.kz. سۋرەت: راحىم قويلىباەۆ.