سوزدەن ىسكە كوشۋ كەرەك

«ەگەمەنگە» شىققان ەلباسى ماقالاسىن وقىپ شىقتىم. ماقالا «ۇلت جوسپارى – قازاقستاندىق ارمانعا باستايتىن جول» دەپ اتالىپتى. ءبىز ءوزىمىزدىڭ قازاقستاندىق ارمانىمىزدىڭ ورىندالۋىنا جانە ەلىمىزدىڭ وركەندەۋىنە سەنىمدى تۇردە قول جەتكىزەتىن بولامىز دەگەن سوزدەر, ارينە, ماقالانى وقىپ شىققان ءار قازاقستاندىققا وي سالۋى كەرەك دەپ ويلايمىن. بۇل ماقالا – حالىققا ار­نالعان جولداۋدىڭ جالعاسى رەتىندە تاعى دا ەلىمىزدىڭ ەرتەڭىن, دامۋ جوسپارىن انىقتاپ بەرەتىن ماڭىزدى ساياسي قۇجات. بۇل ۇلت جوس­پارى قازاقستاندىقتاردىڭ دامۋى مەن ەلىمىزدىڭ بولاشاعىنا ارنالىپ وتىر. بىرىنشىدەن, «ءبىلىم بەرۋ, دەن­ساۋ­لىق ساقتاۋ جانە حالىقتى الەۋمەتتىك قورعاۋ سالالارىن رەفورمالاۋ ادام الەۋەتىنىڭ ساپاسىن ارتتىرۋعا جاعداي جاسايدى. ءبىلىم بەرۋ سالاسىندا مەكتەپكە دەيىن جانە مەكتەپتە ءبىلىم بەرۋدىڭ جاڭا ۇيلەستىرىلگەن ستاندارتتارىن ازىرلەۋ جانە بەكىتۋ بويىنشا جۇمىستار جۇرگىزىلۋدە. ءبىلىم بەرۋ ءۇش تىلدە – قازاق, ورىس جانە اعىلشىن ءتىل­دەرىندە جۇرگىزىلەدى», دەلىنەدى ماقالادا. بۇل ساپالى ءبىلىم جانە باتىل رەفورمالار ارقىلى الەمنىڭ 30 دامىعان ەلدەر قاتارىنا ەلىمىزدىڭ ەنۋى, عىلىم جانە ەكونوميكا, تۇراقتى قارقىندى دامىپ كەلە جاتقان نارىق قۇرۋ دەگەن ءسوز. كەزىندە الاش زيالىلارى: ­­«…­جۇرت­ ىسىنەن كىمگە دە بولسا جۇمىس تا­بى­لادى. اركىم ءالى كەلەتىن جۇمىس ال­سىن. جادىمىزدا بولسىن. از نارسە كوپكە سەپ بولماقشى», دەپ ۇندەۋ تاستاعان ەدى. بۇل ءسوز – بۇگىن دە وزەكتى. كەز كەلگەن ينتەگراتسيا الدىمەن ءبىلىم, عىلىم, ينتەللەكتۋالدىق ءبا­­سەكەلەستىكتەن شىعادى. باسەكەلەستىك تالابىنا ساي ءبىلىم بەرۋ مەن عى­لىمدى يگەرۋدىڭ زامانعا لايىق ۇلگىسى, جاستاردى تاربيەلەۋدىڭ مەم­لەكەتتىك تۇجىرىم مەن ۇستانىمدار «قازاقستان-2050» ستراتەگيالىق جوسپارىندا بار. ەلباسىنىڭ ۇسىنىسىمەن قابىل­دانعان «نۇرلى جول» باعدارلاماسى, «100 ناقتى قادام» ۇلت جوسپارى وسى ماڭىزدى سترا­تەگيانى جۇزەگە اسى­رۋعا باعىت­تالعان. ءبىزدىڭ ۋني­ۆەرسيتەت ۇدەمەلى يننوۆاتسيا­لىق يندۋستريالاندىرۋ باعدار­لاماسىنا ماماندار دايارلايتىن 10 جوعارى وقۋ ورنىنىڭ قاتارىنا قوسىلدى. ساپالى ءبىلىم بەرۋ ۇردىسىندە ەلىمىزدىڭ ەكونوميكا­سىن دامىتۋعا, بولاشاق جاس ماماندى جۇمىسقا الدىن الا ورنالاستىرۋ, باسەكەلەستىككە قابىلەتتىلىكتى ارت­تىرۋ باعىتىندا جۇمىس جاساۋدامىز. ەكىنشىدەن, كوپتىلدىلىكتىڭ بولا­شاقتا جاستاردىڭ مادەني دەڭگەيىنىڭ كورسەتكىشىنە اينالاتىنىن ەلباسى ۇنەمى ايتادى. بۇل وسى ماقالادا دا ايتىلدى. ۋنيۆەرسيتەتتە تىلدەردى ۇيرەتۋ وقۋ ورتالىعى اشىلدى. ءاربىر ستۋدەنت وقۋ ورنىنان پاتريوت رەتىندە, وتانىن, ەلىن سۇيگەن مامان بولىپ قالىپتاسىپ شىعۋى ءتيىس. «ماڭگىلىك ەل» يدەياسى مىنە, وسى ءۇشىن قاجەت. .ياعني, تەك قانا ەكونوميكالىق ماقساتتا الەمدىك قاتارعا قوسىلۋ ەمەس, ەڭ الدىمەن, ءبىلىم بەرۋ جانە ساياسي دامۋ ارقىلى كورىنۋىمىز قاجەت. «كەز كەلگەن ەلدىڭ بەرىكتىگى ەڭ الدىمەن مورال, ءبىلىم بەرۋ جانە مادەنيەتى جوعارى دەڭگەيىمەن انىقتالادى», دەپ ەلباسىنىڭ بۇل سوزدەردى ءجيى قايتالايتىنى دا سون­دىقتان. ماقالادا اتالىپ وتكەن 59 زاڭ ەلىمىزدىڭ يگىلىگى ءۇشىن قابىلداندى. ەلبا­سىنىڭ ماقالاسىندا بەس رە­فورمانىڭ ارقايسىسىنا جان-جاقتى تالداۋ جاسالىپ, ءىس-قيمىل باعدارى ايقىندالدى. بيۋروكراتتىق شىعىنسىز ەكونوميكاعا قادام باسۋ ارقىلى سالىقتىق جانە كەدەندىك اكىمشىلىك جۇرگىزۋدى جاقسارتۋعا باعىتتالعان شارالار ىسكە اسادى. ۇشىنشىدەن, مەملەكەت فۋنكتسيالارى باسەكەلەس ورتاعا جانە جەرگىلىكتى ءوزىن-ءوزى باسقارۋعا بەرىلەدى. ەلباسى ايتقانداي, قازىر بىزگە سوزدەن ىسكە كوشىپ, جۇمىس جاساۋ كەرەك, ورىندالۋ ناتيجەسىن كۇتۋ قاجەت. ەكونوميكا عانا ەمەس, ەندى مەملەكەتتى, قوعامدى, ورتانى جاڭعىرتۋ يدەيالارىن قول­عا الۋعا كوشكەنىمىز دۇرىس بولدى. رەفورمالاردىڭ ورىندالۋى ۇلكەندى-كىشىلى باسشىلارعا بايلانىستى. الدىمەن پاتريوتتىق سەزىمى كۇشتى, انا ءتىلىن قۇرمەتتەيتىن, رۋحاني باي, كۇندەلىكتى ومىردە نە بولىپ جاتقانىنان حاباردار مەملەكەتتىك قىزمەتشىلەر كەرەك بىزگە. جۇمابەك وماروۆ, سۇلتانماحمۇت تورايعىروۆ اتىنداعى مەملەكەتتىك ۋنيۆەرسيتەتتىڭ وقىتۋشىسى. پاۆلودار.