ءبىزدىڭ تاڭداۋىمىز – تاعاتتىلىق

ەلباسىنىڭ «كوپۇلتتى بولۋ – ءبىزدىڭ باقىتىمىز» دەۋىنىڭ استارىندا ۇلكەن ماعىنا جاتقاندىعىن كەيبىر تۇسىنىگى تومەن, ءتۇسىنىپ تۇرىپ مويىنداعىسى كەلمەيتىن ادامدار ارقيلى ايتىپ, ءار قيىرعا تارتادى. ساقالىنا شىركەي ۇيالاپ, كۇن-ءتۇن بەس قارۋىن اسىنىپ, ات ۇستىندە جۇرگەن اتا-بابامىزدىڭ ارمانى ەشكىمگە تاۋەلسىز, ءوز الدىنا بولەك ەل بولۋ ەدى. سول ءۇشىن جان-جاعىنان تونگەن جاۋلارىنا قارسى تۇردى, شابىسسا شابىستى, جەرىنىڭ ءبىر پۇشپاعىن جات تابانى باسپاس ءۇشىن قيدالاستى. ءارتۇرلى ناۋبەتتەردى باستان وتكەردى. تاريحى قالىڭ, وقۋلىعى جۇپ-جۇقا حالقىمىز بوداندىقتىڭ قاسىرەتىن تارتۋداي تارتتى. تىڭ يگەرۋ كەزىندە قازاق ءوز ەلى, ءوز جەرىندە 30 پايىزعا جەتپەي قالدى. تاۋەلسىزدىك الار تۇستا دا كوسەگەمىزدىڭ كوگەرىپ تۇرعانى شامالى ەدى. كەشە عانا دۇنيەدەن وتكەن ابىزىمىز, قازاقتىڭ ءسوزىن ۇستاعان مارعاسقامىز ءابىش كەكىلباەۆ وڭتۇستىككە كەلگەن ساپارلارىنىڭ بىرىندە «ءبىز تاۋەلسىزدىك العان تۇستا حالقىمىزدىڭ سانى 40 پايىزدان ەندى اسقان ەدى. ەلباسىمىزعا راحمەت. قازاقستاندا تۇراتىن ۇلتتار مەن ۇلىستاردىڭ وكىلدەرىن ءبىر ماقسات, ءبىر مۇددەگە بىرىكتىرىپ, مەملەكەتىمىزدى بولشەكتەۋدەن امان ساقتاپ قالدى», دەگەندەي وي ايتقان بولاتىن. ەلباسىنىڭ «ۇلت جوسپارى – قازاقستاندىق ارمانعا باستايتىن جول» ماقالاسىنداعى «رەفورمالار تابىسى – ۇلت بىرلىگىنە باستار جول» بولىمىنەن وسى اقيقاتقا تاعى دا كوز جەتكىزە تۇستىك. قازاقستاندى مويىنداي قويمايتىن, بىلگەن جاعدايدا ءوزىن بيىك ۇستاعىسى كەلەتىن تالاي مىقتى مەملەكەتتەر ۇلتتار اراسىنداعى بەيبىتشىلىك پەن كەلىسىمنىڭ قانشالىقتى ماڭىزدى ەكەندىگىنە كەزىندە ءمان بەرمەي, قازىر قىرعي-قاباق سوعىس جاعدايىندا وتىر. مەملەكەت باسشىسى: «بۇگىندە الەمنىڭ بارلىق دامىعان ەلدەرى وزدەرىنىڭ جاڭعىرتۋشى جوبالارىن بۇرىننان قالىپتاسقان بىرتەكتىلىك نەگىزىندە جۇزەگە اسىرادى. قازاقستانعا كەلەر بولساق, ءبىز دە وسى جولعا تۇستىك. الەمدىك تاجىريبە كورسەتىپ وتىرعانداي, بىرتەكتىلىك پەن بىرتۇتاستىق سالاسىندا امبەباپ ستاندارتتار مەن ۇسىنىمدامالار جوق. الەمدە بىردە-ءبىر ەل وسى سالاداعى سىن-قاتەرلەرگە دايىن رەتسەپتەرگە, مودەلدەر مەن جاۋاپتارعا يە ەمەس. الەمدە ءالى ەشكىم دە ءومىردىڭ وسى سالاسىن ولشەۋگە قابىلەتتى قانداي دا ءبىر جالپىعا ورتاق بىرتەكتىلىك پەن بىرتۇتاستىق يندەكسىن نەمەسە فورمۋلاسىن ويلاپ تاپقان جوق. سونىمەن بىرگە, ءبىزدىڭ بىرتەكتىلىك پەن ۇلت بىرلىگى سالاسىنداعى جۇمىستارىمىزدىڭ تۇپكى ماقساتتارى نەمەسە تەحنوكراتتىق تۇردە بەينەلەگەندە, كۇتىلەتىن ناتيجەلەر – ەىدۇ ەلدەرىمەن ورتاق. ءبىزدىڭ جولىمىز – ول بىرلىك جولى جانە ازاماتتىق بىرتەكتىلىك نەگىزىندە ۇلتتى دايەكتىلىكپەن قالىپتاستىرۋ جولى. قازاقستاندىقتاردىڭ ازاماتتىق بىرتەكتىلىگى مەن بىرتۇتاستىعىن نى­عاي­تۋعا باعىتتالعان ءتورتىنشى رەفور­مانىڭ ءمانى دە ءدال وسىندا», دەدى. مەملەكەت باسشىسىنىڭ پايىمداۋلارىنا قازاقستان حالقى تولىقتاي كەلىسىپ, بىرلىكتى نىعايتۋ باعىتىندا جۇمىس جاساپ كەلەدى. قازاقستان – بولاشاعى ايقىن, ۇلى ماقساتتاردى جۇزەگە اسىرۋعا قاۋقارى جەتەتىن, ارمانىن ورىنداي الاتىن مەملەكەت. نۇرسۇلتان ءابىش ۇلى بىرىككەن ۇلتتار ۇيىمىنىڭ تورىندە قازاق تىلىندە بايانداما جاساعاندا وسى مەملەكەتتىڭ ءبىر پاتريوت ازاماتى رەتىندە قاتتى تولقىعانبىز. كەشە عانا وزگەگە بودان بولىپ, ەسىك كوزىندە جۇرگەن, ىشىندەگى ويىن اشىپ ايتا المايتىن, بۇراتانا سانالعان ۇلتتىڭ وكىلى الەمدىك مىنبەدە قازاقتىڭ مىقتى حالىق ەكەندىگىن تانىتىپ, ابىرويىمىزدى اسقاقتاتتى. ارمان ورىندالادى ەكەن. ءبىز ماقساتتارىمىزعا ءبىر ءۇيدىڭ بالاسى, ءبىر قولدىڭ سالاسىنداي بىرلىگىمىزبەن جەتەمىز. قۇدايبەرگەن ەرجان, وڭتۇستىك قازاقستان وبلىستىق ءماسليحاتىنىڭ حاتشىسى. شىمكەنت.