ءوزارا ىنتىماقتاستىق جالعاسادى

«ەۋرازيالىق توپ» اقتوبەلىك تاۋار وندىرۋشىلەردى قولدايدى جانە قازاقستاندىق قۇرامنىڭ ۇلعايۋىنا ىقپال ەتەتىن بولادى. بۇل تۋرالى وبلىس اكىمى بەردىبەك ساپارباەۆتىڭ ەۋرا­زيالىق توپتىڭ ديرەكتورلار كەڭەسىنىڭ توراعاسى الەكساندر ماش­كەۆيچپەن جانە «قازحروم» تۇك» اق باسشىلىعىمەن كەزدەسۋى بارىسىندا بەلگىلى بولدى. كەزدەسۋ بارىسىندا جىل قورى­تىن­دىلارى تالقىلاندى. اكىم كوم­پانياداعى جۇمىس ورىندارىنىڭ ساق­تالۋى, ەڭبەكاقىنىڭ ۋاقىتىندا تولەنۋى مەن جىل قورىتىندىسى بويىن­شا ون ءۇشىنشى ايلىقتىڭ بەرىلۋى ءما­سەلەلەرىنە توقتالدى. سونداي-اق, ين­فليا­تسياعا بايلانىستى «قازحروم» تۇك» اق قىزمەتكەرلەرىنە ەڭبەكاقىنى كوتەرۋ مۇمكىندىكتەرى قاراستىرىلدى. داعدارىسقا قارسى ءتيىمدى شارالار قابىلداۋ اياسىندا وبلىس اكىمى مەن كومپانيا باسشىلىعى جەرگىلىكتى تاۋار وندىرۋشىلەردى قولداۋ جانە قازاقستاندىق قۇرامدى ۇلعايتۋ تۋرالى كەلىستى. بۇگىنگى كۇنى تاۋ-كەن كەشەنى جەر بايلىعىن پايدالانۋشىلار العان تاۋارلار مەن قىزمەتتەردىڭ جالپى كولەمىندەگى   جەرگىلىكتى قۇرامنىڭ ۇلەسى 58,5 پايىزدى قۇرايدى. وڭىردە مەتالل بۇيىمدارى, رەزەڭكە-تەحنيكالىق ونىمدەر, ەلەكترودتى ماسسا, تۇز قىشقىلى, بەتونيتتى-سازدى ۇنتاقتار, تاعى باسقا وندىرىستەر بويىنشا جوبالاردى جۇزەگە اسىرۋ مۇمكىندىكتەرى تالقىلانۋدا. بەردىبەك ساپارباەۆ «كاسپي پليۋس» جشس (بەكىتۋ دەتالدارىن جەتكىزۋ), «تەحنودوم CTKZ» جشس (تىركەمە دوڭعالاق تەحنيكاسىن جەتكىزۋ) جانە «سايلان اقتوبە» جشس (پيگمەنتتى بوياعىشتار مەن حرومدى كونتسەنتراتتار جەتكىزۋ) سەكىلدى جەرگىلىكتى تاۋار وندىرۋشىلەرمەن ونىمدەردى جەتكىزۋگە ۇزاق مەرزىمدى كەلىسىمشارتقا قول قويۋ مۇمكىندىكتەرىن قاراۋدى ۇسىندى. كومپانيا كاسىپورىندارى ورنالاسقان اقتوبە جانە حرومتاۋ قالالارىندا شاعىن جانە ورتا بيزنەستى قولداۋ ماسەلەلەرى تالقىلاندى, سونداي-اق, 2016-2018 جىلدارعا شاعىن جانە ورتا بيزنەستى دامىتۋ بويىنشا ارىپتەستىك باعدارلاماسىن جاساۋ قاراستىرىلدى. وبلىس اۋماعىندا «قازحروم» كاسىپ­ورىندارىن دامىتۋ پەرسپەكتيۆاسى تۋرالى جانە كەلەسى جىلى الەۋمەتتىك جاۋاپكەرشىلىك تۋرالى مەموراندۋمعا وتىرۋ جونىندە ايتىلدى. بارلىق قاراستىرىلعان ماسەلەلەر ەۋرازيالىق توپتىڭ قۇرىلتايشىلارىنىڭ ءبىرى جانە ديرەكتورلار كەڭەسىنىڭ توراعاسى الەكساندر ماشكەۆيچ تاراپىنان قولداۋ تاپتى. ول ءوز سوزىندە ەكونوميكالىق داعدارىسقا قاراماستان, 12 مىڭ شاماسىندا اقتوبەلىك جۇمىس ىستەيتىن ەۋرازيالىق توپ وزدەرىنىڭ 2016 جىل­عى ۇجىمدىق كەلىسىمشارتىنىڭ بار­لىق شارتتارى مەن الەۋمەتتىك مىندەت­تەمە­لەرىن ورىندايتىندىعىن اتاپ كورسەتتى. ساتىبالدى ءساۋىرباي, «ەگەمەن قازاقستان». اقتوبە وبلىسى.