ۇلتتىق رۋحتى تەربەگەن شىعارما تۇركيادا جەكە كىتاپ بولىپ شىقتى

ادەبيەتكە تسەنزۋرا قاتاڭ باقىلاۋ جاساعان كەڭەس ۇكىمەتى كەزىندە, كوپ قيىنشىلىقپەن جارىق كورگەن كوركەم شىعار­مانىڭ ءبىرى – «اق ارۋانا» اتتى پوۆەست بولاتىن. ءسابيت دوسا­نوۆتىڭ ۇلتتىق رۋحتى تەربەگەن وسى سۇيەكتى شىعارماسى جاقىندا تۇركيادا جەكە كىتاپ بولىپ شىقتى. «اق ارۋانا» كىتابىندا جازۋشىنىڭ ءومىردىڭ وزەكتى پروبلەمالارىن وتكىر كوتەرگەن «جۋسان ءيىسى», «سىڭسىپ ۇشقان سىڭار اققۋ» سىندى اڭگىمەلەرى دە بار. كىتاپقا العىسوز جازعان بەلگىلى ادەبيەت سىنشىسى يمدات افشار. انكارادا وتكەن تۇرىك الەمى اقىندارى مەن جازۋشىلارىنىڭ فەستيۆالىندە تۇرىك تىلىندە شىققان وسى «اق ارۋانا» كىتا­بىنىڭ تۇساۋى كەسىلدى. تۇساۋ­كەسەر ءراسىمىن جۇرگىزگەن ازەر­بايجاننىڭ كورنەكتى مەملەكەت جانە قوعام قايراتكەرى, ازەر­بايجان پارلامەنتىنىڭ دەپۋتاتى گانيرا پاشاەۆا تۇركى الەمى قالامگەرىنىڭ «اق ارۋانا» كىتابى جايلى جىلى لەبىزدى پىكىرلەر ءۇشىن العىس ايتتى. «اق ارۋانانى» تۇرىك تىلىنە اۋدارعان تۇرىكتىڭ كورنەكتى جازۋشىسى يمدات افشار, ونى جارىققا شىعارعان تۇركياداعى بەدەلدى باسپالاردىڭ ءبىرى – «ايسۋ يايىنچىلىك». «اق ارۋانا» ۇستىمىزدەگى جىلى باكۋدە, بىشكەك پەن تاشكەنتتە دە جارىق كورگەن بولاتىن.تۇركيانىڭ بەدەلدى باسىلىمدارىندا جاريالانعان ماقالالاردا قازاق قالامگەرىنىڭ شىعارمالارىنا تەرەڭ تالداۋ جاسالعان. «كوروگلۋ» جۋر­نالىنىڭ جەلتوقسان ايىنداعى سانىندا ءسابيت دوسانوۆ شى­عار­ماشىلىعى جايلى كو­لەمدى ماقالا جاريالاندى. «اق ارۋانانىڭ» تۇساۋ كەسەر ءراسىمى تاياۋ كۇندەرى الماتىدا وتپەك. وعان تۇركيا مەن ازەر­بايجاننىڭ, وزبەكستان مەن قىر­عىزستاننىڭ كورنەكتى جازۋشىلار قاتىسادى دەپ كۇتىلۋدە. «ەگەمەن-اقپارات». سۋرەتتە: تۇرىكتىڭ كورنەكتى جازۋشىسى يمدات افشار جانە ازەربايجاننىڭ كورنەكتى مەملەكەت جانە قوعام قايراتكەرى, ازەربايجان پارلامەنتىنىڭ دەپۋتاتى گانيرا پاشاەۆا.