سۋتەگى بومباسىن سىناقتان وتكىزدى

قاڭتاردىڭ 5-ىنەن 6-ىنا قاراعان ءتۇنى سولتۇستىك كورەيادا سۋتەگى اتوم بومباسى سىناقتان ءساتتى وتكىزىلدى. كحدر-ءدىڭ ورتالىق تەلە­ۆيدەنيەسى تاراتقان بۇل اقپاردا پحەنيان­نىڭ, سونىمەن بىرگە, ەلدىڭ ەگەمەندىگىنە قول تيگىزىلمەسە, يادرولىق قارۋدى ەشكىمگە قولدانبايتىنى جەتكىزىلگەن. سولتۇستىك كورەيا بيلىگى, سونداي-اق, مۇنىمەن توقتالىپ قالماي, ءوزىنىڭ يادرولىق الەۋەتىن ۇدايى ارتتىرا بەرەتىنىن مالىمدەگەن. بۇرناعى كۇنى تۇندە اقش, كورەيا جانە جاپونيا سەيسموستانسالارى سولتۇستىك كورەيانىڭ يانگاندو پروۆينتسياسىنداعى پحۋنگەري يادرولىق پوليگونى اۋدانىندا تەحنوگەندىك سيپاتتاعى وتە كۇشتى جەراستى ءدۇمپۋىنىڭ ورىن العانىن تىركەگەن. مۇندا سەيسميكالىق ءدۇمپۋ كۇشىنىڭ ماگنيتۋداسى ريحتەر باعاناسى بويىنشا 4,2-ءنى قۇرادى. وسىعان بايلانىستى جاپونيا مەن كورەيا رەسپۋبليكاسىنىڭ ۇكىمەتتەرى قاۋىپسىزدىك كەڭەستەرىنىڭ شۇعىل وتىرىستارىنا جينالدى. بۇل ەكى ەلدىڭ بيلىكتەرى يادرولىق سىناقتار سالدارىنان ورىن الاتىن جەراستى سىلكىنىستەرىنىڭ 2005 جىلدان باستالعانىن ايتىپ وتىر. سول كەزدەن كحدر ءوزىن يادرولىق دەرجاۆا رەتىندە جاريالاعان بولاتىن. بۇدان كەيىن بۇل ەل سونداي سىناقتاردى 2006, 2009 جانە 2013 جىلدارى جاسادى. سونىڭ سالدارىنان بۇۇ قاۋىپسىزدىك كەڭەسى كحدر-گە قارسى سانكتسيا ەنگىزگەن ەدى. جاپونيا ساراپشىلارى كەزەكتى يادرولىق سىناققا بايلانىستى ايماقتاعى رادياتسيالىق فوننىڭ ارتىپ كەتپەگەنىن اتاپ ءوتتى. دامير قوجامقۇل.