قازاقستان تاياۋ شىعىستاعى احۋالعا بايلانىستى تۇسىندىرمەسىن جاريا ەتتى

استانا. 6 قاڭتار. سىرتقى ىستەر مينيسترلىگى تاياۋ شىعىستاعى احۋالعا بايلانىستى تۇسىندىرمەسىن جاريالادى. بۇل تۋرالى مينيسترلىكتىڭ ءباسپاسوز قىزمەتى حابارلادى. حابارلامادا: «قازاقستان تاياۋ شىعىستاعى بولىپ جاتقان ۇدەرىستەردى ءجىتى نازاردا ۇستاپ جانە الاڭداۋشىلىقپەن باقىلاۋدا», – دەلىنگەن. سونىمەن قاتار, اتالعان ۆەدومستۆو: «الەمدىك قاۋىمداستىقتىڭ جاۋاپتى مۇشەسى رەتىندە قازاقستان وڭىردەگى قاۋىپسىزدىك پەن تۇراقتىلىققا قاتەر تونگەن كەزدە جانە تەرروريزمگە قارسى جاھاندىق كۇرەستى ۇلعايتۋ قاجەتتىگى جاعدايىندا ساۋد ارابياسى كورولدىگى مەن يران يسلام رەسپۋبليكاسىنىڭ اراسىنداعى قارىم-قاتىناستاردىڭ شيەلەنىسە تۇسۋىنە الاڭداۋشىلىق بىلدىرەدى. ءبىز وسى وڭىردەگى بىزگە دوستىق قاتىناستاعى باۋىرلاس مەملەكەتتەر – ساۋد ارابياسى جانە يراننىڭ باسشىلىعىن, سونداي-اق, باسقا دا مەملەكەتتەردى كونفەسسياارالىق شيەلەنىستىڭ ءارى قاراي ءورشىپ كەتپەۋى ءۇشىن, كەلىسىمدى قامتاماسىز ەتۋ مەن ديپلوماتيالىق قاتىناستاردى قايتا قالپىنا كەلتىرۋ ءۇشىن ساياسي ديالوگتى ورناتۋعا جانە ەلدەر اراسىندا كەلىسسوزدەر جۇرگىزۋگە شاقىرامىز. ءبىز بارلىق تارتىلعان تاراپتاردى قاۋىپتى دەڭگەيدەن وتپەۋگە شاقىرامىز. شەتەلدىك ديپلوماتيالىق وكىلدىكتەرگە شابۋىل جاساۋعا جول بەرىلمەۋى ءتيىس, ال اككرەديتتەۋ ەلدەرى ۆەنا كونۆەنتسياسىنا سايكەس ولاردىڭ قاۋىپسىزدىگىن قامتاماسىز ەتۋگە مىندەتتى. وسىعان وراي, قازاقستان قالىپتاسقان احۋالدى شەشۋدىڭ ءبىر عانا دۇرىس جولى رەتىندە ساياسي شەشىم مەن ديالوگتى جاقتايدى», – دەپ ءمالىم ەتتى. ەلامان قوڭىر. دەرەك, سۋرەت: سىرتقى ىستەر مينيسترلىگىنىڭ ءباسپاسوز قىزمەتى.