قىزىلوردالىق كومپانيا 50 ملن.تەڭگە گرانت الدى

استانا. 6 قاڭتار. قىزىلوردالىق كاسىپكەر 50 ملن.تەڭگە گرانت الدى. بۇل تۋرالى egemen.kz ءتىلشىسى حابارلادى. قىزىلوردا وبلىستىق كاسىپكەرلەر پالاتاسى ديرەكتورىنىڭ مىندەتىن اتقارۋشى دارحان مىرزاليەۆتىڭ ايتۋىنشا, بىلتىر «قىزىلوردانىڭ قۇرىلىس ماتەريالدارى» جشس كاسىپكەرلەر پالاتاسىنا ءوتىنىش جاساعان بولاتىن. كومپانيانىڭ باسشىسى «تەحنولوگيالىق دامۋ جونىندەگى ۇلتتىق اگەنتتىك» اق-نىڭ ۇيىمداستىرۋىمەن وتەتىن يننوۆاتسيالىق گرانتتار بايقاۋىنا قاتىسقىسى كەلەتىنىن ايتىپ, پالاتادان بيزنەس-جوسپار جانە وزگە دە قۇجاتتاردى ازىرلەۋگە كومەك كورسەتۋىن سۇرادى. «قىزىلوردانىڭ قۇرىلىس ماتەريالدارى» جشس-ءى 2014 جىلى قۇرىلعان كومپانيا. ول وبلىستا وندىرىسكە يننوۆاتسيالىق تەحنولوگيالاردى جانە جوعارى تەحنولوگيالىق, ءتيىمدى جانە ەكولوگيالىق قاۋىپسىز ازىرلەمەلەردى ەنگىزۋمەن اينالىسادى. «بۇگىندە كومپانيا «پەنوبەتون ءوندىرىسى ءۇشىن كوبىك شىعارۋ» جوباسىمەن «تەحنولوگيالىق دامۋ جونىندەگى ۇلتتىق اگەنتتىك» اق-نىڭ ۇيىمداستىرۋىمەن وتكەن جوعارى تەحنولوگيالى ونىمدەردى ءوندىرۋدىڭ باستاپقى كەزەڭىنە ارنالعان بايقاۋعا قاتىسىپ, نەگىزگى كەزەڭىنەن ءوتتى. سونداي-اق وڭ ساراپتامالىق قورىتىندى الدى. جالپى گرانت كولەمى 50 ملن.تەڭگە.  جاقىن كۇندەرى كەلىسىم شارتقا قول قويىلادى دەپ كۇتىلۋدە», دەيدى دارحان مىرزاليەۆ. جالپى, بۇگىندە يننوۆاتسيالىق گرانتتاردىڭ 9 ءتۇرى بار. وتاندىق كاسىپكەرلەر جوعارى تەحنولوگيالى ونىمدەردى ءوندىرۋدىڭ باستاپقى كەزەڭىندە 50 ملن.تەڭگەگە دەيىن, تەحنولوگيانى كوممەرتسيالاندىرۋعا 100 ملن.تەڭگەگە دەيىن, ونەركاسىپتىك زەرتتەۋگە 30 ملن.تەڭگەگە دەيىن, پاتەنتتەۋ ءۇشىن 6 ملن.250 مىڭ تەڭگەگە دەيىن قولداۋ الا الادى. جۇمىس ىستەر تۇرعان كاسىپورىندار باسقارۋشىلىق-وندىرىستىك تەحنولوگيالاردى ەنگىزگەنى ءۇشىن 15 ملن.تەڭگەگە دەيىن, ينجەنەرلىك-تەحنيكالىق پەرسونالدىڭ شەت ەلدە بىلىكتىلىگىن جەتىلدىرۋ ءۇشىن 2 ملن.تەڭگەگە دەيىن, جوعارى بىلىكتى شەتەلدىك ماماندى تارتۋ ءۇشىن 9 ملن.تەڭگەگە دەيىن, كونسالتينگتىك, ينجينيرينگتىك جانە جوبالىق ۇيىمداردى تارتۋ ءۇشىن 35 ملن.تەڭگەگە دەيىن, تەحنولوگيانى الۋ ءۇشىن 150 ملن.تەڭگەگە دەيىن گرانتتار الا الادى. باعدارلاما ينۆەستيتسيالار جانە دامۋ مينيسترلىگى ارقىلى جۇزەگە اسىرىلۋدا. باعدارلاما وپەراتورى «تەحنولوگيالىق دامۋ جونىندەگى ۇلتتىق اگەنتتىك» اق. داستان كەنجالين. دەرەك, سۋرەت: قىزىلوردا وبلىسى كاسىپكەرلەر پالاتاسىنىڭ ءباسپاسوز قىزمەتى.