اتىراۋدا بوران كۇنى اداسقان شوپاندى قويلار قۇتقارىپ قالدى

استانا. 6 قاڭتار. اتىراۋ وبلىسىنىڭ يندەر اۋدانى, ەلتاي اۋىلدىق وكرۋگىنە قاراستى «بايبوز» قىستاعىنىڭ شوپانى قويلارىن جايۋ ءۇشىن دالاعا شىعىپ, بوراندى كۇنى اداسىپ كەتكەن. بۇل تۋرالى ras.kz سايتىنا سىلتەمە جاساعان egemen.kz ءتىلشىسى حابارلادى. وقيعا 2 قاڭتار كۇنى بولعان. العاشىندا كۇن اشىق بولىپ, مالشى ەش ۋايىمسىز قويلارىن قورادان شىعارادى. الايدا, اياق استىنان اۋا رايى بۇزىلىپ, بوران سوعا باستايدى. سول كەزدە شوپاندى ىزدەۋ جۇمىستارى دا قولعا الىنادى. مالشى كەلەسى كۇنى امان-ەسەن تابىلعان. ول سۋىقتا وتاردىڭ ورتاسىنا كىرىپ, قويلاردىڭ دەنە جىلۋىمەن جىلىنعان ەكەن. سونىمەن قاتار, ءدال سول كۇنى كوكتوعاي اۋىلدىق وكرۋگىنە قاراستى «سارتەبىن» قىستاعىنان كەشكى 6-لار شاماسىندا «نيۆا» اۆتوكولىگىمەن شىققان مالشىنىڭ جوعالعانى بەلگىلى بولدى. «بىزگە مالشىنىڭ قىستاقتان جۇمىستارىمەن 55 شاقىرىم جەردەگى كوكتوعاي اۋىلىنا شىققانى جانە قايتا ورالماعانى تۋرالى حابارلاما كەلىپ ءتۇستى. سول كۇنى تولاسسىز قار جاۋىپ, سوڭى بورانعا ۇلاسقان ەدى. ءبىز اۋداننىڭ توتەنشە جاعدايلار قىزمەتىنىڭ ماماندارىمەن بىرلەسىپ ىزدەۋ جۇمىستارىنا كىرىستىك. وعان ارنايى تەحنيكالار جۇمىلدىرىلدى جانە اۋىل تۇرعىندارى دا قول ۇشتارىن سوزدى. جوعالعان مالشى 3 قاڭتار كۇنى, ياعني, 11 ساعاتتان كەيىن تابىلدى. ول كولىگىمەن كۇرتىك قارعا مالتىعىپ قالعان. ءبىز دەر كەزىندە باردىق. سەبەبى, مالشىنى تاپقان كەزدە كولىكتەگى جانارماي دا تاۋسىلۋعا جاقىنداعان», – دەيدى كوكتوعاي اۋىلدىق وكرۋگىنىڭ اكىمى مامبەتقالي قۇسايىنوۆ. ەلامان قوڭىر. دەرەك: ras.kz. سۋرەت: azh.kz.