جاپونيادا 2015 جىلى 2 ميلليون ادامنىڭ جەكە مالىمەتتەرى ۇرلانعان

استانا. 6 قاڭتار. جاپونيادا 2015 جىلى كيبەر شابۋىلداردىڭ سالدارىنان 2,07 ميلليون ادامنىڭ جەكە مالىمەتتەرى ۇرلانعان. بۇل تۋرالى Kyodo اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. حاكەرلەردىڭ ارەكەتىنەن 140-قا جۋىق مەكەمە زارداپ شەكتى. ولاردىڭ باسىم كوپشىلىگى پوليتسيا قىزمەتكەرلەرىنەن ارنايى حابارلاما كەلگەننەن كەيىن بارىپ مالىمەتتەردىڭ ۇرلانعانىن بىلگەن. ەل بيلىگىنىڭ ايتۋىنشا, قولعا تۇسكەن اقپاراتتاردىڭ بۇل كورسەتكىشتەن ارتىپ كەتۋى دە عاجاپ ەمەس. قولدى بولعانداردىڭ قاتارىندا نەسيە كارتانىڭ, مەكەن-جاي جانە تۋعان كۇندەردىڭ دەرەكتەرى بار. وتكەن جىلى ەڭ ءىرى كيبەر شابۋىلداردىڭ ءبىرى جاپونيانىڭ زەينەتاقى قورىنا جاسالدى. سالدارىنان 1,25 ميلليون جەرگىلىكتى حالىقتىڭ زەينەتاقى شوتى ۇرلاندى. پوليتسيا قىزمەتكەرلەرى 8 ءىرى مەملەكەتتىك مەكەمەنىڭ كيبەر شابۋىلدارعا تاپ بولعانىن مالىمدەدى. ولاردىڭ قاتارىندا توكيونىڭ ساۋدا-ونەركاسىپتىك پالاتاسى, حيروسيمانىڭ حالىقارالىق ورتالىعى, جاپونيانىڭ مۇناي كومپانيالار قاۋىمداستىعى بار. ماماندار اتالعانداردىڭ بارىنە ءبىر عانا توپتىڭ شابۋىل جاساعانى جونىندە بولجام جاسادى. وتكەن جىلى جاپونيا بيلىگى كيبەر قىلمىسقا قارسى تۇرۋدىڭ جاڭا ءبىر شەشىمىن ويلاپ تاپتى. جاڭا جوسپارعا بايلانىستى مەملەكەتكە پايداسى بار بارلىق ماعلۇماتتاردى عالامتور ارقىلى ۇرلاي المايتىنداي ەتىپ «وفلاين» قويادى. كۇنشىعىس ەلى بۇل ماسەلەدە وزگە مەملەكەتتەرمەن بىرىگىپ قىزمەت ەتۋدى ماقسات ەتتى. ايان ءابدۋالي. سۋرەت: تاسس. دەرەك: interfax.ru.