بىلىك پەن ءبىلىم ۇشتاسقان جەردە

قازاقستاننىڭ داع­دارىسقا قارسى ءمۇم­كىن­دىكتەرى مول ەكەنىن ءبىز سياقتى زەينەتكەرلەر دە ايقىن سەزىنىپ وتىر. ەلباسى رەسپۋب­ليكا جۇرتشىلىعىنا ارناعان جولداۋىندا اتاپ وتكەندەي, تاۋەلسىزدىكتىڭ قا­لىپ­تاسۋىنىڭ ەڭ قيىن كەزەڭ­دە­رىندە قابىلدانعان ستراتەگيالىق شەشىمدەر مەن ءىس-قيمىلدار بۇگىنگى كۇنى وڭ سيپاتتى مانگە يە بولعانىن اڭعارۋ قيىن ەمەس. سول سەبەپتى ەكونوميكالىق قيىندىقتاردى ەڭسەرۋدىڭ جانە قۇرىلىمدىق جاڭارۋلاردىڭ بەس باعىتى ىشىندە جاڭا الەۋمەتتىك ساياساتقا ەرەكشە ەكپىن ءتۇسىرىلۋىن زاڭدى قۇبىلىسقا باعالاعان ءجون بولار ەدى. ويتكەنى, پرەزيدەنتىمىزدىڭ بەلسەندى قولداۋى ارقاسىندا سەرپىندى ەكونوميكالىق وسىمگە قول جەتىپ, ادامداردىڭ ءومىر ساپاسى ىلگەرىلەدى. بۇگىندە مەملەكەتتىڭ 1,5 ميلليون تۇرعىندى جاردەماقى جانە تولەمدەرمەن قامتاماسىز ەتىپ وتىرعانىن ايتساق تا جەتكىلىكتى. ەندى, مىنە, جان-جاقتان قىسپاققا العان الەمدىك داعدارىستارعا قاراماستان, الەۋمەتتىك قولداۋ شارالارىنىڭ دايەكتىلىكپەن جال­عاس­تىرىلۋى حالىق الدىنداعى الەۋمەتتىك مىندەتتەمەلەردىڭ ءسوز­سىز ورىندالاتىنىن, ەر­تەڭ­گى كۇن ءۇشىن ەش­قان­داي الاڭداۋعا نە­گىز جوق ەكەندىگىن كورسەت­سە كەرەك. مۇنداي قا­رىم­­دى قادامدار بيۋد­جەت­­­تىك شىعىنداردى وڭتاي­لان­­دىر­عان­نان كەيىن ەڭبەكاقى, الەۋ­مەت­تىك جاردەماقى ءۇشىن قار­جى تابۋ ارقىلى مۇمكىن بولعانىن جۇرتشىلىق جاقسى ءتۇسىنىپ, بويلارىنداعى بارلىق كۇش-جىگەرلەرىن ورتاق ماقساتقا جۇمىلدىراتىنىنا سەنىمدىمىن. ەلىمىزدە ەڭبەك ەتە الاتىندارعا جان-جاقتى مەملەكەتتىك قولداۋ تۋدىرىلعانىن جاڭا تۇزەتۋلەرمەن قابىلدانعان ەڭبەك كودەكسى باپتارىنان دا تابۋعا بولادى. ەندى جاڭا زاڭ بويىنشا جۇمىس بەرۋشى كاسىبي شەبەرلىگى جوعارى, بەلسەندى, باستاماشىل زەينەتكەر قىزمەتكەرلەردىڭ ۇجىمدا قالىپ, ەڭبەك ەتۋىن اتتاي قالاپ الارى ءسوزسىز. مۇنىڭ ءوزى ادام كاپيتالىن دامىتۋ ەكەنىن ايعاقتايدى. ءبىزدىڭ ۇجىمدا 100-گە جۋىق ادام قىزمەت ەتەدى. بالا كۇتۋشى, اۋلا تازالاۋشى, وت جاعۋشى سەكىلدى زەينەتىنەن بەينەتى باسىم ءارى جالاقىسى از جۇمىستارعا جاستار كەلە بەرمەيدى. سوندىقتان بۇل ساناتتاعى زەينەتكەرلەر زەينەتاقىسىنىڭ كوبەيگەنىن الەۋمەتتىك جاعىنان ءالسىز قورعالعان جىكتەرگە جاسالعان قامقورلىق رەتىندە ءتۇسىنىپ, قاناعاتتانعاندىق سەزىممەن قارسى الدى. ولاردىڭ دا ءبىلىم مەن بىلىكتىلىكتى ۇشتاستىرىپ, ايانىپ قالماسى انىق. مەن ۇجىمداعى جاس زەينەتكەرلەردىڭ ءبىرىمىن. كورشىلەس «الەنۋشكا» بالاباقشاسىنىڭ مەڭگەرۋشىسى ليۋبوۆ زايتسەۆا دا مەنىمەن قاتارلاس زەينەتكە شىقتى. الايدا, قالالىق ءبىلىم ءبولىمىنىڭ باسشىلىعى جۇمىس ىستەۋ مەرزىمدەرىمىزدى ۇزارتۋعا شەشىم قابىلدادى. شاماسى, ءبىلىم بەرۋ جۇيەسىندەگى كوپ جىلعى تاجىريبەمىز ەسكەرىلگەن بولۋ كەرەك. 12 جىلدىق وقىتۋعا كوشۋ جاعدايىندا مەملەكەتتىك, ورىس جانە اعىلشىن تىلدەرىن مەكتەپكە دەيىنگى جاستان باستاپ مەڭگەرتۋ جالپى ءبىلىم بەرۋدىڭ اجىراماس بولىگى ەكەنى ءمالىم. بالاباقشانىڭ پەداگوگيكالىق ۇجىمىنداعى زەينەتكەرلەر دە جاسالىپ وتىرعان جاقسىلىقتىڭ قارىمى رەتىندە بالعىنداردىڭ تاربيەسىن, وتباسىنىڭ الەۋمەتتىك ءرولىن ارتتىرۋ باعىتىندا تىنباي ەڭبەك ەتە بەرەرى ءسوزسىز. التىن سەيىتوۆا, «اق بوتا» بوبەك­-جاي-باقشاسىنىڭ ديرەكتورى. پەتروپاۆل.