كۇتپەگەن سىي

بالالار اۋىلىنىڭ تاربيەلەنۋشىلەرىن ۇلكەن قۋانىشقا بولەدى

«قازپوشتا» اق ۇيىم­داس­تىر­عان «اياز اتاعا حات جاز» اكتسيا­سىنا سولتۇستىك قازاقستان وبلىسىنان 167 ءبۇلدىرشىن ۇلكەن بەلسەندىلىكپەن قاتىستى. ولاردىڭ اراسىندا پەتروپاۆل بالالار اۋىلىنىڭ تاربيەلەنۋشىلەرى دە بار. بۇگىندە مۇندا 7 مەن 18 جاس ارالىعىنداعى 51 جەتكىنشەك تۇرادى. دەنى جەتىمدىكتىڭ اۋىر زاردابىن ەرتە تارتقان سا­ناتقا جاتادى. سولاردىڭ ءبىرى ۆيكتوريا گولۋبتسوۆا وتباسىلىق ۇلگىدەگى ۇيگە ع.مۇسىرەپوۆ اۋدانىنان 2008 جىلى كەلگەن. شەشەسى قايتىس بولعان, اكەسى اۋرۋشاڭ. سودان بەرى انانىڭ جىلى قۇشاعىن, ايالى الاقانىن «اق ماما» اتانىپ كەتكەن بوتاگوز امانتايقىزى مەيىرلەنە توگىپ, وزگە تاعدىرلاستارىمەن بىرگە ۇيدە دە, تۇزدە دە جۇپتارىن جازباي كەلەدى. وتكەن جىلدىڭ جەلتوقسان ايىندا «اياز اتاعا حات جاز» جوباسى باستالعاندا وسىنداعى 41 تاربيەلەنۋشى جۇرەك تۇكپىرىنەن شىققان جىلى لەبىزدەرى مەن اق ارماندارىن نۇرسۇلتان اتالارىنا جولداعان. سولاردىڭ قاتارىندا جازۋى مارجانداي ۆيكتوريا دا ساۋساقتارى مايى­سا وتىرىپ اقجارما تىلەگىن اق قاعازعا تۇسىرگەن. بارشا بالالار اتىنان جاڭا جىلمەن قۇتتىقتاعان. زور دەنساۋلىق تىلەگەن. حاتىن مۋزىكالىق ورتا­لىعىمىز ەسكىردى, جاڭاسى بولسا دەگەن تىلەكپەن اياقتاعان. ويىن بالاسى ەمەس پە. ۇمىتىلىپ كەتكەن. كۇتپەگەن سالەمدە جەتكەندە ابدىراپ, ساسىپ قالعان. سويتسە, پرەزيدەنت ونىڭ تىلەگى بويىنشا مۋزىكالىق ورتالىق پەن قازاق جازۋشىلارىنىڭ شىعارمالار جيناعىن ارنايى تارتۋ ەتكەن. جاقسى وقۋعا ۇندەگەن. – ينتەرنات 2001 جىلى «ءبو­بەك» قايىرىمدىلىق قورى­نىڭ باس­تاماسىمەن قۇرىلعان بو­لا­تىن. باستاپقىدا 4 ءۇي ەدى. بىلتىر ايماق باسشىسى ەرىك سۇلتانوۆتىڭ قولداۋىمەن تاعى ەكى ءۇي تۇرعىزىلىپ, كەڭەيتىلدى. مۇندا بالالار ءۇشىن بارلىق جاعداي جاسالعان. ەل ازاماتتارى دەمەۋشىلىك قولداۋ كورسەتىپ تۇرادى. بىلتىر 2,5 ميلليون تەڭ­گەگە كيىم-كەشەك اپەرىلدى. دە­سەك تە جاڭا جىل الدىنداعى ەلباسى سالەمدەمەسىنىڭ ءجونى مۇلدەم بولەك. بۇل قولداۋ تاربيە­لەنۋشىلەردى جاقسى وقۋعا, ۇلگىلى, ءتارتىپتى بولۋعا جەتەلەيدى, – دەدى سويلەسكەنىمىزدە بالالار اۋى­لىنىڭ ديرەكتورى ارىستان اكىمجانوۆ. ءسوز اراسىندا ەل تاۋەلسىزدىگى مەرەكەسى قارساڭىندا ارىستان مىرزاحمەت ۇلىنىڭ قازاقستان پرەزيدەنتىنىڭ قۇرمەت گراموتا­سى­مەن ماراپاتتالعانىن ايتا كەتكەن ءجون. بۇل مەكەمەدە ۇلگى بولارلىق باستامالار از ەمەس دەگەن ءسوز. باسقا قاتارلاستارى سياقتى ۆيكتوريانىڭ دا باستى ارمانى – جوعارى ءبىلىم الۋ, قازاقستاننىڭ جاقسى ازاماتى بولىپ ءوسۋ. ءومىر ەسقالي, «ەگەمەن قازاقستان». سولتۇستىك قازاقستان وبلىسى.