مۇندا قىسقى جانە جازعى سپورتتىڭ بىرنەشە تۇرىمەن جاتتىعۋعا مۇمكىندىك بار
بىلتىر جوبالىق قۇنى 3 ميلليارد تەڭگە بولاتىن سپورت سارايىنىڭ جۇرتشىلىق يگىلىگىنە بەرىلۋىنىڭ ارقاسىندا بىرقاتار قاداۋ ماسەلەلەر ءوز شەشىمىن تاپقانى جايلى وبلىستىق دەنەشىنىقتىرۋ جانە سپورت باسقارماسىنىڭ باسشىسى رۋسلان ەسەنالين اڭگىمەلەيدى.
– رۋسلان باقىتتى ۇلى, قاراساڭ كوز سۇيسىنەتىن ءارى قالانىڭ شىرايىن اشا تۇسەتىن كەشەندى نىساننىڭ ىسكە قوسىلۋى وبلىس ءومىرىندەگى ايشىقتى وقيعا ەكەنى تالاسسىز. ونىڭ اشىلۋ سالتاناتىن جۇرتشىلىق قالاي قابىلدادى؟
– دەنە كۇشىن جەتىلدىرىپ, سالاماتتى ءومىر سالتىن سەرىك ەتكەن جەرلەستەرىمىزدىڭ قاتارى ءوڭىرىمىزدە جىل وتكەن سايىن مولايىپ كەلەدى. بۇگىنگى كۇنى ءسولتۇستىكقازاقستاندىقتاردىڭ 28,2 پايىزى سپورتپەن اينالىسادى. بۇل – 160 مىڭ ادام قامتىلدى دەگەن ءسوز. ولارعا 2700-گە جۋىق سپورت نىساندارى قىزمەت ەتكەنىمەن, ءالى دە ازدىق قىلاتىن. اسىرەسە, گيمناسشىلار, اكروباتشىلار, جەڭىل اتلەتشىلەر, كۇشتىك جەكپە-جەك زالدارى, ۆەلوترەك الاڭدارى جەتىسپەيتىن. سونىڭ سالدارىنان باسقا ايماقتاردا جاتتىعۋعا ءماجبۇر بولاتىن. جابىق مۇز ايدىنىنىڭ بولماۋى سالدارىنان حوككەيشىلەر كومانداسىن قۇرۋ ەلەۋلى قيىندىق تۋدىرىپ كەلگەن.
ايماق باسشىسى ەرىك سۇلتانوۆتىڭ تىكەلەي قولداۋىمەن تۇرعىزىلعان ءسان-سالتاناتى كەلىسكەن امبەباپ عيماراتقا ەرەسەكتەرمەن قاتار بالالار دا قاتتى قۋاندى. سپورت سارايىنىڭ جوباسى بويىنشا نەگىزگى ءۇش بلوك – جەڭىل اتلەتيكالىق مانەج, 1 مىڭ جانكۇيەر تاماشالاي الاتىن جابىق مۇز ايدىنى جانە ۆەلوشاباندوزدار مەكتەبى ورنالاسقان. سوعان سايكەس شايبالى حوككەي, كونكي, شورت-ترەك, شاعىن فۋتبول, ۆولەيبول, باسكەتبول, كۇش جەكپە-جەگى, تاەكۆوندو, دزيۋدو, بوكس سياقتى سپورت تۇرلەرىمەن اركىم ەركىن شۇعىلدانا الادى. ۆەلوشاباندوزدارعا لايىقتالعان ەكى ترەك الاڭى, ترەناجەر, كوركەم گيمناستيكا, اكروباتيكا زالدارى جۇمىس ىستەيدى. امبەباپ سپورت زالى 500 ورىنعا شاقتالعان. بالالار مەن جاسوسپىرىمدەرگە ارنالعان سپورت مەكتەپتەرىنىڭ جەڭىل اتلەتشىلەرى, گيمناسشىلارى مەن اكروباتشىلارى, حوككەيشىلەرى بۇعان دەيىن تار جەرلەردە قىسىلىپ-قىمتىرىلىپ كەلسە, ەندى ولارعا دا جان-جاقتى جاعداي جاسالعان.
– لوندون وليمپياداسىنىڭ جەڭىمپازى, اتاقتى جەرلەسىمىز الەكساندر ۆينوكۋروۆتىڭ جولىن قۋعان ءىزباسارلاردىڭ دا جاتتىعۋ ماسەلەسى شەشىلگەن بولار؟
– ءيا, قىس ايلارىندا تىنىمسىز جاتتىعۋ جۇمىستارىن ءجۇرگىزەتىن كەڭ سپورت زالدارىنىڭ بولعانىنا نە جەتسىن! بۇدان كەيىن جاس ورەندەردىڭ ۆەلوسپورتقا قىزىعۋشىلىعى ارتپاعاندا قايتەدى؟ ءوڭىر ۆەلوشاباندوزدارى وتكەن ماۋسىمدى تاماشا جەتىستىكتەرمەن قورىتىندىلادى. ەلىمىزدىڭ ءتورتىنشى سپارتاكياداسىندا جالپىكوماندالىق ەسەپ بويىنشا جەڭىستىڭ ەڭ بيىك تۇعىرىنا كوتەرىلدى. الەكسەي لۋتسەنكو الەم جەڭىمپازى اتانسا, كاسىبي ۆەلوكوماندانىڭ ساپىندا رۋسلان تىلەۋباەۆ, ارمان قامىشەۆ, باحتيار قوجاتاەۆ تاماشا ونەر كورسەتىپ ءجۇر. «استانا» قۇرلىقتىق كومانداسىنىڭ مۇشەلەرى جاندوس بيجىگىتوۆ, تىلەگەن مايدوس, ۆيكتور وكيشەۆ, ۆاديم گالەەۆ حالىقارالىق, رەسپۋبليكالىق سايىستاردا توپ جاردى. ازيا ويىندارىنىڭ كۇمىس جۇلدەگەرى ولەگ زەملياكوۆ بولاشاعىنان ۇلكەن ءۇمىت كۇتتىرەدى. ۆەلوسپورت مەكتەبى جۇمىس ىستەگەن 17 جىل بەدەرىندە 1 ەڭبەك سىڭىرگەن سپورت شەبەرى, 5 حالىقارالىق دارەجەدەگى سپورت شەبەرى, 20-عا جۋىق قازاقستاننىڭ سپورت شەبەرى ازىرلەندى. جۋىردا ەلوردالىق «Astana Pro Team» ۆەلوكومانداسىمەن ەكى جىل كەلىسىمشارت جاساسقان باحتيار قوجاتاەۆقا حالىقارالىق دارەجەدەگى سپورت شەبەرى كۋالىگى تاپسىرىلدى.
كونكيشىلەرىمىز بەن اكروباتشى-گيمناسشىلارىمىزدىڭ ەرەن تابىستارى قالاي ۇلىقتاساق تا جاراسادى. وعان حالىقارالىق دارەجەدەگى سپورت شەبەرلەرى رومان كرەچ پەن دميتري بابەنكونىڭ كونكيمەن سىرعاناۋدان ەل مەرەيىن ءوسىرىپ جۇرگەندەرى دالەل. رومان سوچي وليمپياداسىندا 500 مەتر قاشىقتىقتا 7-ءشى ورىندى يەمدەنىپ, ۇلتتىق رەكوردتى جاڭارتسا, گەرمانيادا الەم كۋبوگىنىڭ كەزەكتى كەزەڭىنىڭ جەڭىمپازى بولدى. ولەسيا كولىشەۆا كوركەم گيمناستيكادان, ۆيتالي دەل اكروباتيكادان حالىقارالىق دودالاردا جاسىنداي جارقىراپ ءجۇر.
– ايتپاقشى, جەڭىل اتلەتشىمىز يرينا ەكتوۆا بيىلعى وليمپيا ويىندارىنا ليتسەنزيا ۇتىپ العان جوق پا؟
– ءيا, ريو دە جانەيرو قالاسىندا وتەتىن بايراقتى باسەكەگە قاتىساتىنى ءبارىمىز ءۇشىن زور قۋانىش. ول قازاقستاننىڭ جاستار بىرىنشىلىگىندە ءۇش قارعىپ سەكىرۋدەن 14,32 مەتر ناتيجە كورسەتىپ, قارسىلاستارىنان باسىم شىقتى. مۇنىڭ الدىندا اتاقتى جەلاياق ع.قوسانوۆتى ەسكە الۋعا ارنالعان حالىقارالىق جارىستا ءبىرىنشى ورىندى جەڭىپ العان بولاتىن. جەڭىل اتلەتشىلەر مارگاريتا مۇقاشەۆانىڭ, يرينا جانە ەۆگەني ەكتوۆتاردىڭ, ۆەلوشاباندوزدار الەكسەي لۋتسەنكونىڭ, ارتەم زاحاروۆتىڭ, ناتاليا سايفۋتدينوۆانىڭ, زىلتەمىرشى ايدار قازوۆتىڭ وليمپياداعا بارۋ مۇمكىندىكتەرى مول.
ءسوز اراسىندا سولتۇستىكقازاقستاندىق سپورتشىلاردىڭ 16 الەمدىك, 15 ازيالىق, 48 حالىقارالىق, 154 ەلىشىلىك جارىستارعا قاتىسىپ, جالپى جيىنتىعى 530 مەدال ۇتىپ العانىن, ولاردىڭ 194-ءى وليمپيادالىق سپورت تۇرلەرىنە جاتاتىنىن ايتا كەتكەن ءجون. حالىقارالىق, رەسپۋبليكالىق ءباسەكەلەردە ۇزدىك كورسەتكىشتەرگە جەتىپ جۇرگەن 90 سپورتشى وبلىس اكىمى شاكىرتاقىسىنىڭ يەگەرلەرى. 6 جاتتىقتىرۋشى مەن سپورتشى پاتەرلەرگە قول جەتكىزدى.
بۇرناعى جىلعا قاراعاندا سپورت نىساندارى 374 بىرلىككە كوبەيىپ, سپورت الاڭدارىنىڭ تاپشىلىعى ايتارلىقتاي ازايدى. شاعىن فۋتبول الاڭدارى مەن حوككەي كورتتارى كوپتەپ سالىندى. 3 سپورت كلۋبى قۇرىلدى. سولتۇستىك قازاقستان كاسىپتىك-تەحنيكالىق كوللەدجى جانىنان «سپورت جونىندەگى جاتتىقتىرۋشى» ءبولىمى اشىلىپ, 75 ستۋدەنت ءبىلىم الادى. ولاردىڭ 35-ىنە اكىمنىڭ شاكىرتاقىسى تولەنەدى. بيىلعى جىلى نوۆونيكولسكوە جانە جاڭاجول ەلدى مەكەندەرىندە دەنەشىنىقتىرۋ-ساۋىقتىرۋ كەشەندەرى بوي كوتەرەتىن بولادى. كىشكەنەكول اۋىلىندا وسى ۇلگىدەگى نىساننىڭ جوباسى جاسالدى.
– ەسكى جىلعا وكپەمىز جوق, جاڭا جىلدا كوڭىلىمىز توق بولسىن.
اڭگىمەلەسكەن
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.
