جاڭا جىلدى جەڭىسپەن باستادى

جەكسەنبى كۇنى «بارىس» كومانداسى قۇرلىقتىق حوككەي ليگاسى شەڭبەرىندە حانتى-مانسيسكىنىڭ «يۋگراسىمەن» سىنعا ءتۇستى. استانادا وتكەن كەزدەسۋدە ايدىن يەلەرى ويىن سوڭىنداعى بۋلليت ارقىلى 3:2 ەسەبىمەن جەڭىسكە جەتتى. ماتچ قوناقتاردىڭ بەلسەن­دىلىگىمەن باستالدى. بار بول­عانى ءۇشىنشى مينۋتتا ويىن تاياعىن جوعارى كوتەرگەنى ءۇشىن «بارىس» حوككەيشىسى كونس­تانتين رومانوۆ ايدىننان قۋىلدى. وزدەرىنە بە­رىلگەن ءمۇم­كىندىكتى ۇتىمدى پاي­دا­لانعان رەسەيلىكتەر 4-مينۋتتا دەنيس گوربۋنوۆتىڭ كو­مەگىمەن ەسەپ اشتى. الايدا, ولار بۇل باسىمدىقتى ءبىر جارىم مينۋت قانا ۇستاپ تۇرا الدى. اتاپ ايتقاندا, 5-مينۋت تۇگەسىلەر تۇستا «بارىستىڭ» قورعاۋشىسى مايك لاندين مەرگەندىگىمەن كوزگە ءتۇسىپ, تارازى باسىن تەڭەستىردى. ەكىنشى كەزەڭنىڭ باسىندا, ياعني, 26-مينۋتتا «يۋگرا» تاعى دا العا شىقتى. بۇل جولى گول ەۆگەني ورلوۆتىڭ ەنشىسىنە جازىلدى. ۇزىلىسكە دەيىن قانشا شابۋىلداسا دا اندرەي نازاروۆتىڭ شاكىرتتەرى قارسىلاستار قاقپاسىنان ساڭىلاۋ تابا المادى. ابىروي بولعاندا, سوڭعى بولىكتە, ياعني, ويىننىڭ 56-مينۋتىندا داستين بويد ناتيجەلى سوققى جاساپ, كوماندامىزدى جەڭىلىستەن قۇتقارىپ قالدى. وۆەرتايمدا ءبىر-ءبىرىنىڭ وسال جەرىن تابا الماعان كوماندالار ويىن سوڭىنداعى بۋلليتكە جۇگىندى. بۇل سىندا «بارىستىڭ» جولى بولىپ, ماۋسىمداعى 22-جەڭىسىنە قول جەتكىزدى. بۇگىن­دە ەلامان قوڭىر, «ەگەمەن قازاقستان».