سولتۇستىك پوليۋستە 0 گرادۋستان جوعارى اۋا تەمپەراتۋراسى تىركەلدى

مۇز قۇرساۋىندا جاتقان سولتۇستىك پوليۋستە كۇن كۇرت جىلىنىپ, اۋانىڭ تەمپەراتۋراسى تسەلسي باعاناسى بويىنشا +1 گرا­دۋسقا دەيىن كوتەرىلدى. بۇل جايت مامانداردىڭ الاڭداۋشىلىعىن تۋدىرىپ وتىر. سەبەبى, جىلدىڭ بۇل مەزگىلىندە اتالعان وڭىردە -30 گرادۋس اياز بولۋى ءتيىس. اقش-تىڭ ۇلتتىق مۇحيت جانە اتموسفەرالىق زەرتتەۋلەر باسقارماسى وكىلىنىڭ ايتۋىنشا, پوليۋستەگى اۋا رايى­ن عارىشتان باقىلايتىن قۇرىلعى از ۋاقىت وسىنداي تەمپەراتۋرانى كورسەتكەن. ال اتالعان ولكەنىڭ وزىندە ازىرگە وسى باعىتتاعى ارنايى اسپاپتار جوق. مەتەورولوگتار بۇعان جىلدىڭ باسىم بولىگىندە مۇز باسىپ جاتۋى سەبەپ ەكەنىن ايتۋدا. عالىمداردىڭ ءبىرى: «بۇل قۇبى­لىس ۇلىبريتانيا جاعالاۋىن­دا سوققان «فرەنك» داۋىلىمەن تىكەلەي بايلانىستى. ويتكەنى, داۋىل سالدارىنان بولعان تروپيكالىق جىلى اۋا اعىنى سولتۇستىك پوليۋسكە جەتىپ, اۋا تەمپەراتۋراسىنىڭ دابىل قاعارلىق دەڭگەيگە دەيىن كوتەرىلۋىنە اكەلىپ سوقتى. بۇگىنگىدەي جاھاندىق جىلىنۋ ماسەلەسى الەمدى الاڭداتىپ تۇرعان كەزدە بۇل پوليۋستە پليۋستىك تەمپەراتۋرا تىركەلۋى جاعدايدى تىم ۋشىقتىرىپ جىبەرۋى ابدەن مۇمكىن», – دەيدى. ايتا كەتەيىك, انگليانىڭ سول­تۇستىك-باتىسىندا جەلتوقسان ايىنىڭ باسىندا باستالعان نوسەر جاۋىن مەن جويقىن داۋىل ءالى جالعاسۋدا. تابيعاتتىڭ توسىن مىنەزى سالدارىنان العاشقى كۇندەرى 60 مىڭ ءۇي جارىقسىز قالسا, ەپلبي ەلدى مەكەنىنەن مىڭداعان تۇرعىن قاۋىپسىز جەرگە كوشىرىلدى. ال جاڭاجىلدىق مەرەكە كۇندەرى داۋىل تاعى دا كۇشەيىپ, جەتى مىڭ ءۇيدى جارىقپەن قامتاماسىز ەتىپ وتىرعان ەلەكتر جەلىلەرىنە زالالىن تيگىزدى. سونداي-اق, كامبريا گرافتىعىنداعى قالالار مەن ەلدى مەكەندەردى سۋ باسىپ قالدى. ەلامان قوڭىر, «ەگەمەن قازاقستان».