40 اۆتوكولىك قار قۇرساۋىنان قۇتقارىلدى

اقتوبە وڭىرىندە ءبىراز جىلدان بەرى اق شۇناق اياز بەن اق باسقىن بوران بولماپ ەدى. مەشىن جىلى تابالدىرىقتان اتتاعالى بەرى «كارى قۇداڭ» قىس كۇشىنە ءمىنىپ تۇر. بىرنەشە تاۋلىك بويى تولاسسىز سوققان بوراننىڭ سالدارىنان وبلىس اۋماعى ارقىلى وتەتىن رەسپۋبليكالىق ماڭىزعا يە «سامارا-شىمكەنت» تاسجولىنىڭ بەلوگوركا اۋىلى تۇسىنداعى 794-شاقىرىمىن (اقتوبە قالاسىنان 40 شاقىرىم قاشىقتىقتا) قالىڭ قار باسىپ, 40-قا تارتا اۆتوكولىك جول بويىندا كەپتەلىپ قالدى. وبلىس باسشىسى بەردىبەك ساپارباەۆ اتالعان جول تەلىمىندە بولىپ, جۇرگىزىلىپ جاتقان جولدى قاردان تازالاۋ جۇمىستارىمەن تانىستى. وبلىس اكىمىنىڭ تاپسىرماسىمەن ازاماتتىق قورعانىس كۇشتەرى مەن قۇرالدارى توتەنشە جاعداي رەجىمىنە كوشىرىلدى. ءتيىستى قىزمەتتەر جولدا قالعان ادامدار مەن تەحنيكانى قۇت­قارۋعا جۇمىلدىرىلىپ, جولداردىڭ قار باسىپ, كولىك قوزعالىسىنا بوگەت بولعان تۇستارىن ارشىپ, تازالاۋ جۇمىستارى جۇرگىزىلدى. اتاپ ايتقاندا, اقتوبە قالاسى مەن ايتەكە بي, حرومتاۋ جانە مارتوك اۋدانى اكىمدىكتەرى بوراندا قالعان جولاۋشىلاردى ىستىق تا­ماقپەن قامتۋ شارالارىن ۇيىمداستىردى. جاڭا جىلدىڭ العاشقى ءۇش تاۋلىگىندە بارلىعى 544 ادامعا تاماق جەتكىزىلگەن. ولاردىڭ اراسىندا بالالار دا بار. اپاتتىق-قۇتقارۋ جۇمىستارى كەزىندە 213 ادام قۇتقارىلىپ, 571 ادام باسقا جەرگە كو­شى­رىلگەن. جولدا قۇتقارىلعانداردىڭ 351-ءى وزبەك­ستان رەسپۋبليكاسىنىڭ ازاماتتارى. «اقتوبە-اتىراۋ» باعىتىنداعى جول قاتى­ناسى دا قالپىنا كەلتىرىلىپ, قاندىاعاش قالاسىنىڭ تۇسىندا جينالىپ قالعان 200-گە تارتا اۆتوكولىك ساپارىن ءارى قاراي جالعاس­تىرۋعا مۇمكىندىك الدى. اقتوبە قالاسىنداعى №26 ورتا مەكتەپ پەن مۇحتار ارىن اتىنداعى قارعالى ورتا مەكتەبى عيماراتتارىندا جولاۋشىلاردى ورنالاستىرۋ ءۇشىن جىلىنۋ پۋنكتتەرى اشىلدى. مۇنداي جىلىنۋ پۋنكتتەرى مارتوك جانە ايتەكە بي اۋداندارىندا دا جۇمىس ىستەۋدە. وبلىستىق توتەنشە جاعدايلار دەپار­تامەنتىنىڭ ءباسپاسوز قىزمەتى تاراتقان ءمالى­مەتتەرگە سايكەس, اپاتتى-قۇتقارۋ جۇمىس­تارىنا 371 ادام, 273 بىرلىك تەحنيكا تارتىل­عان. بۇل جۇمىستارعا وبلىستىق توتەنشە جاعدايلار جانە ىشكى ىستەر دەپارتامەنتتەرى مەن «قازاۆتوجول» مەكەمەسىنىڭ, اكىمدىكتەردىڭ قىزمەتكەرلەرى, سونىمەن قاتار اسكەري بولىمشەلەر جاۋىنگەرلەرى مەن «تازالىق» جشس مەكەمەسى جۇمىلدىرىلعان. ساتىبالدى ءساۋىرباي, «ەگەمەن قازاقستان», قۋات مۇحتار, جۋرناليست. اقتوبە وبلىسى. سۋرەتتى تۇسىرگەن حايرەدەن راۋشانوۆ.