جولبارىس پەن ەشكىنىڭ دوستىعى

رەسەيدىڭ پريمورە ولكەسىندەگى سافاري-ساياباعىندا امۋر ەسىمدى جولبارىس پەن تيمۋر اتتى ەشكىنىڭ دوستىعى جۇرتتى قايران قالدىرىپ كەلەدى. بۇگىندە ءاربىر اتقان تاڭىن دوپ ويناۋدان باستايتىن ەكەۋىن كورۋ ءۇشىن تۇكپىر-تۇكپىردەن اعىلعان ساياحاتشىلار سانى كۇن ساناپ ارتۋدا. «كۇندە تاڭ بوزىمەن ەكەۋىنە دوپ بەرەمىز. سول ساتتە ولار ءوز بەتتەرىمەن ءتۇرلى ويىن ويناي جونەلەدى. ءبىر قاراساڭ, رەگبي ويىنىنا ۇقسايدى, ەندى بىردە فۋتبول ما دەپ قالامىز. امۋر دوپتى الىپ ۇزاپ كەتەدى, تيمۋر بولسا, دوپقا تالاسامىن دەپ بىردەن قۋا جونەلەدى. سىرتتاي باقىلاپ تۇسىنگەنىمىز – دوپتى كىم مەيلىنشە تەزىرەك جارىپ تاستاسا نەمەسە تىستەرىمەن ۇزاعىراق ۇستاپ تۇرسا, سول جەڭىمپاز اتانادى. سونداي-اق, ەكەۋى ارنايى قويىلعان تورلى ورىنداعى شىرشانى تەكسەرۋ ءۇشىن كەلەدى. بۇل اعاشتا ەشكىگە ارناپ ءتۇرلى جەمىس-جيدەكتەر مەن كوكونىستەردى دايىنداپ قويامىز. امۋر ءۇشىن بۇتاقتارعا ەت ىلەمىز. ەرتەڭىندە ودان دا بيىكتەۋ جەرگە جىپكە بايلايمىز. جولبارىستىڭ بارىنشا سەكىرىپ, ازىعىن الىپ جاتقانىن ارنايى قويىلعان كامەرا ارقىلى ءتۇسىرىپ الامىز», – دەيدى ساياباق ديرەكتورى دميتري مەزەنتسەۆ. ونىڭ ايتۋىنشا, مەرەكە كۇندەرى ساياباققا كەلگەندەر سانى بۇرىنعىسىنان الدەقايدا ارتقان ەكەن. وسىنىڭ ارقاسىندا مەكەمە جۇمىس ۋاقىتىن دا ۇزارتقان. ءاربىر ەكسكۋرسياعا 7-8 مينۋت كەتەدى. ايتا كەتەيىك, وسىدان ءبىر اي بۇرىن ساياباق قىزمەتكەرلەرى ەشكىنى جولبارىسقا ارناپ تۇسكى اس رەتىندە جىبەرگەن. الايدا, كۇنى ءبۇ­گىنگە دەيىن جىرتقىش اڭ ەنشىلى سىباعاسىنا تيىسپەي كەلەدى. قايتا بىرگە سەرۋەندەپ, بىرگە ءجۇرۋى كوپشىلىكتى تاڭعالدىرۋدا. تيمۋر, ءتىپتى, كەلگەن كۇنى-اق دوسىنىڭ جاتىن ورنىن تارتىپ العان. ولاردىڭ بۇل قىلىعىن حالىققا كورسەتۋ ماقساتىندا ساياباق قىزمەتكەرلەرى ونلاين-ترانسلياتسيا ءۇشىن ارنايى ءتورت جەردەن ۆەب-كامەرالار ورناتتى. YouTube سايتىنا شىعارىلعان بەينە-روليكتەرىنىڭ قارالۋى ميلليوننان اسىپ-جىعىلادى. ايان ءابدۋالي.