ەلباسى بەس ينستيتۋتسيونالدىق رەفورمانى جۇزەگە اسىرۋ جونىندە كەڭەس وتكىزدى

استانا. 2 قاڭتار. ەلباسى بەس ينستيتۋتسيونالدىق رەفورمانى جۇزەگە اسىرۋ جونىندە كەڭەس وتكىزدى. كەڭەسكە پرەمەر-مينيستر كارىم ءماسىموۆ, پرەزيدەنت اكىمشىلىگىنىڭ باسشىسى نۇرلان نىعماتۋلين جانە پرەزيدەنت اكىمشىلىگى باسشىسىنىڭ ورىنباسارى باعلان مايلىباەۆ قاتىستى. بۇل تۋرالى akorda.kz حابارلادى. مەملەكەت باسشىسى ەلىمىز وتكەن جىلدى الەمدىك نارىقتاعى كۇردەلى جاعدايعا قاراماستان, جاقسى ەكونوميكالىق كورسەتكىشتەرمەن اياقتاعانىن اتاپ ءوتتى. «ءبىز بەس ينستيتۋتسيونالدىق رەفورمانى جۇزەگە اسىرۋدى باستايتىن ەڭ كۇردەلى كەزەڭگە كەلدىك. اۋقىمدى دايىندىق جۇمىستارى اتقارىلدى, ءتيىستى قۇجاتتار قابىلداندى. پرەزيدەنت اكىمشىلىگى, ۇكىمەت, ءاربىر مينيسترلىك جانە اكىمدىكتەر قويىلعان مىندەتتەردى ناقتى ورىنداۋعا اتسالىسۋى قاجەت. جاڭعىرتۋ جونىندەگى ۇلتتىق كوميسسيا قىزمەتىن جالعاستىرىپ, مەنىڭ الدىمدا ەسەپ بەرەتىن بولادى جانە بارلىق باعىتتار بويىنشا قانداي دا ءبىر بوساڭسۋعا جول بەرمەۋى ءتيىس», – دەدى قازاقستان پرەزيدەنتى. نۇرسۇلتان نازارباەۆ رەفورمالاردىڭ ۋاقتىلى جانە ءتيىمدى جۇزەگە اسىرىلۋىنىڭ ماڭىزدىلىعىن اتاپ ءوتتى. «مەملەكەتتىك قىزمەتتى جەتىلدىرۋ جۇمىسىن ورتالىقتا دا, جەرگىلىكتى جەرلەردە دە جۇرگىزۋ كەرەك. زاڭ ۇستەمدىگىن قامتاماسىز ەتۋ اياسىندا سوت جۇيەسىنىڭ ءوزى دە وزگەرىستەرگە باستاماشى بولۋى قاجەت. سونىمەن قاتار, پاتريوتتىق اكت قابىلداۋ جوسپارلانىپ وتىر, وندا حالىق بىرلىگىن, تولەرانتتىلىق پەن سەنىمدى ودان ءارى نىعايتۋ جونىندەگى قىزمەتتىڭ نەگىزگى باعىتتارى كورسەتىلەتىن بولادى. سونداي-اق, ەسەپ بەرۋشى مەملەكەت قالىپتاستىرۋ مىندەتىنە سايكەس, بارلىق دەڭگەيدەگى اتقارۋشى بيلىك تۇراقتى نەگىزدە حالىققا ەسەپ بەرىپ وتىرۋى ءتيىس. جالپى العاندا, ناتيجەگە باسشىلار جەكە جاۋاپتى بولادى. بۇل رەتتە, رەفورمالاردى كوزبوياۋشىلىققا اينالدىرۋعا جول بەرۋگە بولمايدى. وزگەرىستەردى جۇزەگە اسىرۋعا كەدەرگى بولاتىندار لاۋازىمىنان بوساتىلادى», – دەدى مەملەكەت باسشىسى. قازاقستان پرەزيدەنتى كەزدەسۋ قورىتىندىسى بويىنشا بىرقاتار ناقتى تاپسىرما بەردى. ەلامان قوڭىر. دەرەك, سۋرەت: akorda.kz.