210 932!

مەرەكەلى جىلعى بەرەكەلى بيىگىمىز وسىنداي ەلباسىمىزدىڭ قازاقستان حالقىن جاڭا 2016 جىلمەن قۇتتىقتاۋىنىڭ ءماتىنى الگىندە عانا قولىمىزعا ءتيدى. قۇتتىقتاۋدىڭ ءبىر تۇسىندا نۇرسۇلتان ءابىش ۇلى: «جاڭا جىل بارشامىزدى قاشاندا جاڭا جەتىستىككە, جاڭا بيىككە جەتەلەيدى», دەپتى. سول جاڭا جەتىستىكتىڭ, جاڭا بيىكتىڭ ءبىرىن جاڭا جىلدىڭ العاشقى اق تاڭىندا سىزدەرگە قۋانا حابارلاعالى وتىرمىز, قادىرمەندى وقىرمان. «الدىڭعى كۇنى, ياعني 28 جەلتوقساندا وبلىس­تارداعى مەنشىكتى تىلشىلەرىمىزدەن تۇسكەن مالىمەتتەردىڭ ءوزى گازەت تارالىمى قازىر-اق 200 مىڭدىق مەجەنى ەركىن ەڭسەرگەنىن كورسەتەدى. «قازپوشتا» قاپتىڭ ءتۇبىن قاققاندا, بۇعان دەيىن ەسەپكە الىنباي كەلگەن «ەۆريكا پرەسس», «نوماد پرەسس», «Ernur press», «Alash press», «ەۆرازيا پرەسس», «كا­زاح پرەسس» سياقتى سەرىكتەستىكتەر جان-جاقتان جۇرگىز­گەن جازىلىمدى قوسقاندا جەلتوقساننىڭ سوڭعى كۇندەر­ىندە كەلەر جىلعى وقىرماندار قاتارىنا شامامەن ون مىڭ­داي, كەيدە ءتىپتى ودان دا كوپ سان قوسىلاتىنىن ءتاجى­ري­بە­دەن جاقسى بىلەمىز», دەپ جازعان ەدىك 30 جەلتوق­ساندا جارىق كورگەن «عۇمىرناما عيبراتتارى» اتتى ماقا­لا­مىزدا. ايتقانىمىز ايداي كەلدى. مىنە, ءبىزدىڭ قولىمىزدا گازەت باسىلاتىن 15 باسپاحانانىڭ كەشە كەشكى ساعات 17-دە جولداعان ەڭ سوڭعى, ەڭ دالدەنگەن مالىمەتتەرى تۇر: ءبۇ­گىنگى, 2016 جىلعى 1 قاڭتارداعى 1-ءشى, گازەت تاري­حىنداعى 28 729-شى ءنومىردى استاناداعى «ERNUR» 12 434 دانا, الماتىداعى «ءداۋىر» 17 060 دانا, تال­دىقورعانداعى «الماتى-بولاشاق» 3 854 دانا, قوس­تانايداعى «كوستانايپوليگرافيا» 4 735 دانا, قارا­عاندىداعى «اركو» 14 916 دانا, تارازداعى «سەنىم» 18 339 دانا, شىمكەنتتەگى «ERNUR print» 39 536 دانا, قىزىلورداداعى «ەنەرگوپرومسەرۆيس» 21 312 دانا, اقتوبەدەگى «ا-پوليگرافيا» 10 853 دانا, ورالداعى «WESTA» 14 515 دانا, پاۆلودارداعى «دوم پەچاتي» 12 884 دانا, وسكەمەندەگى «رەكلامنىي دايدجەست» 11 947 دانا, اتىراۋداعى «اتىراۋ-اقپارات» 13 514 دانا, اقتاۋداعى «CASPIY PRINT» 6 862 دانا, پەترو­پاۆل­داعى «ەRNUR» 8 171 دانا ەتىپ باسىپ شىعاردى. سوندا قورى­تىن­دىسىندا نە بولادى دەيسىز عوي؟ قورىتىن­دىسىندا ەل گازەتى «ەگەمەن قازاقستاننىڭ» 2016 جىلعى تارالىمى ەكى ءجۇز ون مىڭ توعىز ءجۇز وتىز ەكى دانا بولىپ شىعا كەلەدى. بۇل سان وتكەن جىلعى 203 مىڭنان استام تارالىمنان 7 مىڭنىڭ ۇستىندە ارتىق ەكەنىن ءوزىڭىز دە كورىپ وتىرسىز. 210 932! بۇل سانعا ارتىق تۇسىنىكتەمە قاجەت بولماس. بۇل سان­نىڭ استارىندا كوپ جاي جاتىر. ەڭ باستىسى – ەل حال­قى­نىڭ ەرتەڭگى كۇنگە سەنىمىنىڭ, ەل گازەتى تىنباي, تال­ماي ناسيحاتتايتىن ەلباسى ساياساتىن قولداۋىنىڭ, وقىرمانداردىڭ بويىندا وتانشىلدىق, ەلدىك سەزىمدەر­دىڭ سەرپىلە تۇسكەنىنىڭ كەلىستى كورىنىسى بۇل. وسىنداي مەرەيلى ساتىمىزدە ءبىز گازەتكە تاعى دا سەنىم ارتقان بارشا وقىرماندارىمىزعا, جازىلىمدى ۇيىمداستىرۋعا اتسالىسقان ازاماتتاردىڭ بارىنە شىن كوڭىلدەن رازىلىعىمىزدى ءبىلدىرىپ, العىسىمىزدى ايتامىز, تاۋەلسىزدىگىمىزدىڭ شيرەك عاسىرلىق مەرەيلى جىلىندا دا «ەگەمەن قازاقستان» ءجۇز جىلعا جۋىقتاعان تاريحىنداعى داڭقتى داستۇرلەرىنەن اينىمايتىنىن جەتكىزەمىز. قاشاندا جازار جاقسىلىعىمىز, جەتكىزەر جاڭا­لىعىمىز كوپ بولسىن! ساۋىتبەك ابدراحمانوۆ.