وسىدان جەتى-سەگىز جىل بۇرىن سارىاعاش اۋدانىنا ىسساپارمەن «ەگەمەن قازاقستان» رەسپۋبليكالىق گازەتى» اق پرەزيدەنتى ساۋىتبەك ابدراحمانوۆ كەلدى. جيىننان شىققاننان كەيىن شاي ءىشىلدى. داستارقانداعى «سارىاعاش» اراسان سۋىنا كوزى تۇسكەن ساۋكەڭ «ابەكە, (سارىاعاشتىڭ سول كەزدەگى اكىمى ابدىباقىت ماقۇلباەۆ) كەي جەردە سارىاعاشتىڭ اراسان سۋىنىڭ ورنىنا قۇدىق سۋىن قوسىپ ساتادى دەگەن ءسوز بار. وسىنداي ارەكەتى ءۇشىن ۇستالعاندار تۋرالى تەلەديداردان كورسەتىلەدى. وسى قانشالىقتى راس, دەپ سۇرادى. سوندا اۋدان اكىمى ك ۇلىپ:
– ساۋكە, سارىاعاشتا اراسان سۋىنىڭ ورنىنا تازا سۋ قوسىپ ساتۋ تىم قىمباتقا تۇسەدى, – دەگەن.
ونىسى راس. سارىاعاش اۋدانىنىڭ جەراستى تەلەگەي تەڭىز اراسان سۋى. مىڭ ءبىر اۋرۋعا ەم. ءبىر قىزىعى, ەلۋشاقتى ارتەزيان قۇدىعى بولسا ارقايسىنىڭ قۇرامى بولەك. اعزاداعى ىشەك, ازقازان اۋرۋلارىن ايتپاعاندا ءوتىن الدىرعاندارعا سارىاعاشتىڭ سۋىنداي پايدالى ەم قازاقستاندا جوق.
سارىاعاش – كۋرورتتى ايماق. قازىر وندا 16-دان استام ەمدەۋ-ساۋىقتىرۋ ورتالىقتارى جۇمىس جاسايدى. بۇگىندە اراسان سۋىمەن اتاعى شىققان اۋدانداعى ەمدەۋ-ساۋىقتىرۋ ورتالىقتارىن حالىقارالىق دەڭگەيگە كوتەرەتىن جاڭا جوبا ىسكە اسىرىلىپ جاتىر. ءبىز وسى جاعدايلارعا بايلانىستى وبلىس اكىمى بەيبىت اتامقۇلوۆپەن سۇحباتتاسقان ەدىك.
– ەلباسى بىزگە قولداعى بار قارجىعا مالدانا بەرمەي جاڭا تابىس كوزدەرىن اشۋدى تاپسىرىپ وتىر. الەمدە تۋريزمنەن كۇرەپ اقشا تاۋىپ وتىرعان مەملەكەتتەر كوپ. ال, قازاقتىڭ تۇگەلگە جۋىق اۋليە, امبيەلەرى, حان, سۇلتان, باتىر, بيلەرى ماڭگىلىك تىنىشتىق تاپقان وڭتۇستىكتىڭ تۋريستىك الەۋەتى كۇشتى. بىراق, ءار تۋريستىك كومپانيالار ءار جاققا تارتقاندىقتان بەيبەرەكەتتىك كوپ. ءبىز وسىنىڭ ءبارىن قورىتىندىلاي كەلە «Ontustik Tourism Center» تۋريستىك-اقپاراتتىق ورتالىعىن قۇرۋ ارقىلى ەكونوميكالى تابىسقا جەتۋدىڭ جايىن سارالادىق.
– سارىاعاش كۋرورتتىق كلاستەرى وسى ۇلكەن ءىستىڭ ءبىر قۇرامىنا كىرەتىن سياقتى.
– دۇرىس ايتاسىز. سارىاعاش اللانىڭ قالاۋىمەن ادام اعزاسىن ەمدەيتىن قاسيەتتى سۋى بار ايماق. اكىمدىكتىڭ زەردەلەۋى بويىنشا جىل باسىنان بەرى تۇركىستانعا ءبىر ملن-عا جۋىق ادام تۋريستىك ساپارمەن كەلسە, سارىاعاشقا 70 مىڭعا جۋىق حالىق ەم الۋعا كەلىپتى. سول سەكسەن مىڭعا جۋىق ادامنىڭ دەنى ەلىمىزدىڭ باتىس جانە شىعىس وڭىرىنەن كەلگەندەر. ءبىر سارىاعاشتىڭ وزىندە 300 مىڭعا جۋىق, كورشى ماقتاارالدا 400 مىڭعا جۋىق حالىق بار. بۇل كەرەمەت مۇمكىندىك. ءبىز ەلباسىنىڭ تاپسىرماسى بويىنشا سارىاعاش دەمالىس ايماعىن حالىقارالىق كۋرورتتار جۇيەسىنە جەتكىزۋ جوباسى ارقىلى سىرتتان عانا ادامدار تارتىپ قويمايمىز, ەكى اۋدانداعى 700 مىڭعا جۋىق حالىقتىڭ دا دەنساۋلىعىن نىعايتۋعا زور مۇمكىندىكتەر اشامىز.
– ناقتى ايتقاندا, قانداي جۇمىستار قولعا الىنادى. كەلەس وزەنىنىڭ ۇستىنەن سالىنعان كوپىر حالىقارالىق ستاندارتقا كەلمەيتىن سياقتى ەدى.
– «تەاتر كيىم ىلگىشتەن باستالادى» دەپ ستانيسلاۆسكي ايتتى دەگەن ءتامسىل بار عوي. كەلەستى كەسىپ وتەتىن كوپىردى حالىقارالىق دەڭگەيگە جەتكىزۋ جۇمىستارى ءجۇرىپ جاتىر. بۇگىندە سارىاعاشتىڭ وزىندە جيىرماعا جۋىق ەمدەۋ-ساۋىقتىرۋ ورتالىقتارى بار. ەندى ولاردىڭ قاتارى جاقىن جىلداردا 96-عا كوبەيەتىن بولادى. قۇرىلىس جۇمىستارىنا نەگىزىنەن جەكە ينۆەستورلار تارتىلىپ جاتىر. جوبا بويىنشا 600 گەكتار اۋماقتا ساۋلەتى جاراسقان 1500 ورىندىق كۋرورتتى قالاشىق سالىنباق.
كاسىپكەرلەر وڭتايلى جۇمىس جاساۋ ءۇشىن وبلىس ءوز قارجىسىنا ينفراقۇرىلىم جۇمىستارىن رەتتەپ, ارنايى سۋ جۇيەلەرىن سالىپ بەرەدى. سارىاعاشتا حالىقارالىق تۋريستەردىڭ تالابىنا ساي گولف الاڭشاسى بار. ايماقتا ەكى شاعىن كول قىزمەت ەتەدى. ەندى ونىڭ قاتارىن ويىن-ساۋىق ورتالىقتارى, اكۆاپارك, شاعىن اۋەجاي تولىقتىرادى. شىمكەنتتەن سارىاعاشقا قاتىناۋدى جاقسارتۋ ءۇشىن جۇردەك پويىز, جايلى اۆتوبۋستار جۇرمەك. سەرۆيستىك قىزمەت جاقسارتىلادى.
وسى جوبانى ىسكە اسىرۋ ارقىلى مەملەكەت باسشىسىنىڭ بىزگە قويىپ وتىرعان تاپسىرماسىنىڭ ۇدەسىنەن شىعامىز دەپ ويلايمىز. بۇل قۇرعاق قيال ەمەس, بۇگىندەرى حالىقارالىق دەڭگەيدەگى دەمالىس ايماعىندا ناقتى جۇمىستار ءجۇرىپ جاتىر.
اڭگىمەلەسكەن
باقتيار تايجان,
«ەگەمەن قازاقستان».
وڭتۇستىك قازاقستان وبلىسى.
