اۋا رايى قۇبىلىپ تۇر...

اۋا رايى اياق-استىنان بۇزىلسا, تۇكپىردەگى اۋىل ادامدارى «بايقوڭىردان زىمىران ۇشتى!..» دەپ تابان استىنان ءسوز تاۋىپ جاتادى. بۇل ءۇشىن اۋىل ادامدارىن جازعىرۋ دا ۇيات: ويتكەنى, بۇكىل باق بايقوڭىردان عارىش كەمەسىنىڭ ءساتتى ستارت العانىن حابارلايدى, كوپ ۇزاماي كۇللى توڭىرەكتە اۋا رايى وزگەرەدى. شايداي اشىق اسپاننان قار جاۋادى, 30 سانتيمەتر قالىڭدىقپەن جاۋعان قار كەلەسى كۇنى جىپ-جىلماعاي ەرىپ كەتىپ جاتادى... ءبىر سوزبەن ايتقاندا, اۋا رايى وسىلاي قۇبىلادى. اۋا رايىنىڭ بۇل قۇبىلىسىن بايقوڭىرعا اكەلىپ تىرەپ قويعانىمىز ءجون بولماس, ارينە. قازىر جەر شارى عالامدىق جىلىنۋ ءۇردىسىن باسىنا وتكەرۋدە. ونىڭ كەرى قايتار جولى جوق, بىراق قامدانۋ امالى بار. 2015 جىلدىڭ جەلتوقسانىنىڭ باسىندا پاريجگە دۇنيەجۇزىنىڭ 150 مەملەكەتىنىڭ باسشىلارى اتباسىن بۇرىپ, بۇۇ تالابىنىڭ اياسىندا الەمدىك كليماتتىق كونفەرەنتسيا وتكىزدى. كونفەرەنتسيا جۇمىسىنا مەملەكەت باسشىلارىنان تىس 40 مىڭ ادام تىكەلەي قويان-قولتىق ارالاستى. تىركەلگەن جۋرناليستەردىڭ سانى 3 مىڭعا جەتتى. كەزەك سانى 21-ءشى رەت (سور-21) وتكىزىلگەن دۇنيەجۇزىلىك وسى جينالىستا پەرۋلىك اتاقتى ەكولوگ, مەملەكەت جانە قوعام قايراتكەرى مانۋەل پۋلگار-ءۆيدالدىڭ وتكەن 20-شى كەزدەسۋدە «دۇنيەجۇزى ءۇشىن قازىر اسا قورقىنىشتى ەكى قاۋىپ بار, ول – تەرروريزم مەن كليماتتىڭ وزگەرۋى» دەپ ايتقان ءسوزى تەكتەن-تەك ەسكە الىنباعان شىعار. قاۋىپ بار. تابيعاتقا قول ۇشىن تەزدەتىپ بەرۋ كەرەك. بۇكىل الەم ءبىر ساتكە تىنا قالىپ قۇلاق تۇرگەن بۇل ءماسليحاتتا عالامدىق جىلىنۋدىڭ بىردەن-ءبىر سەبەپشىسى – اۋاعا ءبولىنىپ شىعىپ جاتقان ەسەپسىز كومىرقىشقىل گازىنىڭ زاردابى ەكەنى تاعى دا تالقىلاندى. الەمدىك سامميتتە كوپ نارسەگە كوز جەتكىزگەن ەل باسشىلارى جەر بەتىن تۇمشالاعان زارداپتى گازدىڭ كولەمىن بەلگىلى مولشەردە قىسقارتۋعا كەلىستى. ەلىنىڭ وركەندەۋى ءۇشىن وندىرىستە كومىر قىشقىل گازىن ەسەلەپ شىعارىپ جاتقان مەملەكەتتەر بولاشاق ۇرپاق ءۇشىن جاۋاپكەرشىلىگىن تۇسىنگەندەي... بۇۇ-نىڭ باس حاتشىسى پان گي مۋن شىن كوڭىلمەن «ءبىز بالالارىمىز بەن نەمەرەلەرىمىزدىڭ الدىنداعى بورىشىمىزدى ازداپ بولسا دا ورىندادىق. كوزىنە ءتۇزۋ قارايتىن بولدىق. ولاردىڭ كەلەشەكتە لايىقتى ءومىر ءسۇرۋى ءۇشىن ازداپ بولسا دا الەمدى تازارتتىق», دەۋىندە ۇلكەن ءمان جاتىر. سونىمەن, ەندىگى جەردە الپاۋىت ءوندىرىس وشاقتارىنان ءسات سا­يىن ءبولىنىپ كۇن كوزىن بۇركەمەلەگەن زيان­دى قالدىقتار كولەمى ازداپ بولسا دا ازاياتىن سياقتى. بۇكىل الەمنىڭ نازارىن وزىنە اۋدارعان پاريجدەگى سور-21 وسىنداي شەشىممەن اياقتالدى. ادامدار وزدەرى قولدان جاساعان عىلىمي جەتىستىكتەرىنە وزدەرى توسقاۋىل قويا الماي وسىلايشا ابىگەرگە ءتۇسۋ ۇستىندە. ...بورتىندا «ەكسپرەسس-امۋ1» دەپ اتالاتىن كەشەندى بايلانىس جەر سەرىگى بار «پروتون-م» زىمىران-تاسىعىشى بايقوڭىردان بەلگىلەنگەن مەرزىمنەن كەشىگىپ ۇشتى. بۇل – 25 جەلتوقسان, استانا ۋاقىتىمەن تۇنگى ساعات 03.31. جەكسەنبى كۇنى, 27 جەلتوقساندا, تاڭەرتەڭ الماتىعا 15 سانتيمەترلىك قار ءتۇستى. جاي سايكەستىك تە بولۋى مۇمكىن... ويتكەنى, اۋا رايىنىڭ بۇگىندە تەز قۇبىلۋى بارشامىزعا تاڭسىق بولماي بارادى. تالعات ءسۇيىنباي, «ەگەمەن قازاقستان». الماتى.