ەۋروپارلامەنت دەپۋتاتتارى – ماجىلىستە

قر پارلامەنتى ءماجىلىسى توراعاسى­نىڭ ورىنباسارى, “قازاقستان رەسپۋب­لي­كاسى – ەۋروپالىق وداق” اتتى پارلا­مەنت­ارالىق ىنتىماقتاستىق كوميتەتىنىڭ تەڭ توراعاسى ۆلاديمير بوبروۆ ەۋرو­پارلامەنتتىڭ سىرتقى ساياسات جونىندەگى ۆيتسە-پرەزيدەنتى ادريان سەۆەرين باستاعان ەۋروپارلامەنت پەن دەموكراتيا جانە ىنتىماق جولىنداعى ەۋروپالىق فورۋم دەلەگاتسياسىمەن كەزدەستى. ۆلاديمير بوبروۆ مەيماندارعا سوڭعى جىلدارى جۇزەگە اسىرىلعان كونستيتۋ­تسيا­لىق رەفورمالار ناتيجەسى, پارلامەنت ءماجىلىسىنىڭ قۇرىلىمى, زاڭ شىعارۋ ىسىندەگى تاجىريبەلەر تۋرالى ايتىپ بەردى. ەۋروپالىق وداق قازاقستاننىڭ ساۋدا-ەكونوميكالىق سالاداعى ماڭىزدى ارىپتەسى بولىپ تابىلادى. ءماجىلىس توراعاسىنىڭ ورىنباسارى قازاقستاننىڭ ەۋروپالىق وداقپەن ىنتىماقتاستىقتى نىعايتۋى تۋرالى ايتا كەلىپ, بۇگىنگى تاڭدا ەلىمىزدىڭ سىرتقى ساۋدا اينالىمىنىڭ 40 پايىزى ەۋروپالىق وداقپەن بايلانىستى ەكەنىن تىلگە تيەك ەتتى. جۋىردا قازاقستان پرەزي­دەنتى نۇرسۇلتان نازارباەۆتىڭ بەلگيا كورولدىگىنە رەسمي ساپارى ىنتىماق­تاستىقتى دامىتۋعا سەرپىن قوستى. كەزدەسۋدە تاراپتار ساۋدا-ەكونومي­كا­لىق, گۋمانيتارلىق جانە ساياسي بايلا­نىس­تار تۋرالى پىكىر الماستى. سونىمەن قا­تار, قازاقستاننىڭ ەقىۇ-عا توراعالىق ەتۋى جونىندە وي قوزعالدى. “وسى جىلى ءبىز قازاقستاندى جاقىنىراق بىلە تۇستىك. جاس مەملەكەت ماڭىزدى ماسەلەلەردى شەشۋگە ۇمتىلىستا ءوزىنىڭ ۇستامدىلىعىن كورسەتە ءبىلدى”, – دەدى دەلەگاتسيا جەتەكشىسى, ەۋرو­پارلامەنت دەپۋتاتى ادريان سەۆەرين. استانادا 1-2 جەلتوقسان كۇندەرى وتكەلى تۇرعان ەقىۇ-نىڭ سامميتىنە ۇلكەن ماڭىز بەرىلىپ وتىرعانى ايتىلدى. سونداي-اق پارلامەنتارالىق بايلا­نىستاردى دامىتۋ, دەپۋتاتتىق كوميتەت­تەردىڭ ءرولىن ارتتىرۋ جايى ءسوز بولدى. وسى كەزدەسۋگە ەۋروپارلامەنت دەپۋ­تات­تارى كريستيان ۆيگەنين, ريچارد نوۋيت, مارتين ۆان دامم, نوربەر جۋس­تەن, يان مارينۋس ۆيەرسما, كاتارينا نە­ۆەدالوۆا قاتىستى. قازاقستان تارابىنان ءماجىلىس دەپۋتاتتارى امزەبەك جولشى­بەكوۆ, گۇلجان قاراعۇسوۆا, شالاتاي مىر­زاحمەتوۆ, التاي تىلەۋبەردين قاتىستى. ايباتىر سەيتاق, جۋرناليست.