“جول كارتاسى” جالعاسىن تابادى

جاقسى ناتيجە بەرگەن “جول كار­تاسى” باعدارلاماسى الداعى ۋاقىتتا دا جالعاسىن تابادى. ەڭبەك جانە حا­لىق­تى الەۋمەتتىك قورعاۋ ءمينيسترى گۇل­شارا ابدىقالىقوۆانىڭ باتىس قا­زاقستان وبلىسىنا ەكى كۇندىك جۇمىس ساپارىنان وسىنداي وي تۇيۋگە بولادى. ساپارىنىڭ العاشقى كۇنى سايا­سات­كەر ايەلدەر كلۋبىنىڭ العاشقى وتى­رىسىنا قاتىسىپ, مادەنيەت جانە الەۋ­مەتتىك سالا قىزمەتكەرلەرىمەن دە كەزدەسىپ ۇلگەرگەن گۇلشارا ناۋشا­قى­زى بۇدان كەيىنگى ۋاقىتىن “جول كار­تاسىنىڭ” جەرگىلىكتى جەردە ورىندالۋ بارىسىمەن تانىسۋعا ارنادى. اۋەلى كۇر­دەلى جوندەۋدەن وتكەن جەڭىس الا­ڭىندا بولعان مينيستر مۇنداعى اتقا­رىل­عان جۇمىس ساپاسىنا وڭ باعا بەردى. باتىس قازاقستاندا سوڭعى كەزدە الەۋمەتتىك سالا نىساندارى كوپتەپ اشى­لىپ جاتقانى بەلگىلى. قالانىڭ حالىق تىعىز قونىستانعان 9-شاعىن اۋدانىندا پرەمەر-مينيستر كارىم ءما­سىموۆتىڭ قاتىسۋىمەن بيىل اشىل­عان №5 قالالىق ەمحانانى سونىڭ بىرەگەيى دەۋگە بولادى. جاڭا ۇلگىمەن سالىنعان ەمدەۋ ورنىنىڭ ءىشى-سىرتى بىردەي جارقىراپ تۇر. مينيستر دە عيماراتتى اسىقپاي ارالاپ, مەدي­تسي­نانىڭ سوڭعى جەتىستىكتەرىمەن جاراق­تان­دىرىلعان ەمدەۋ كابينەتتەرىن كوز­بەن كوردى. عيماراتتىڭ ماڭايى ابات­تاندىرىلىپ, تال-تەرەك وتىرعىزىل­عان. گۇلشارا ابدىقالىقوۆا بۇدان كەيىن ماسكەۋ كوشەسى بويىنداعى ۇزىندىعى ەكى شاقىرىم قۇرايتىن كۇرەجول قۇرىلىسىمەن دە تانىستى. بۇرىن جاۋىن-شاشىندى كۇندەرى لايساڭ بولىپ جاتاتىن كوشەگە قات­قىل تاباندى جول توسەلگەن. مەردىگەر ۇجىم — “ۋرالسكدورستروي” جشس جول قۇرىلىسىنا 212 ادامدى تارتىپ, 213 ملن. تەڭگە قارجى يگەرگەن. ءار جۇمىسشى ورتا ەسەپپەن 35-40 مىڭ تەڭگە مولشەرىندە تابىس تاپقان. “جول كارتاسى-2010” باعدارلاماسى شەڭبەرىندە شەشىمىن تاپقان جول قۇرىلىسىنىڭ ساپاسى ۇدايى باقى­لاۋدا جانە جوعارى دەڭگەيدە. كوشە بو­لىپ ەسەپتەلگەندىكتەن مۇندا كولىك­پەن قاتار جاياۋ جۇرگىنشىگە ارنالعان تروتۋار دا سالىنۋدا. مارتەبەلى مەيمان ارالاپ كورگەن سوڭ­عى نىسان — ەۋرازيا كوشەسى بويىن­داعى №3 “ەلوچكا” بالاباقشا­سى 1975 جىلى سالىنعان عيماراتتا ورنالاسقان. سودان بەرى كۇردەلى جوندەۋ كورمەگەن بالاباقشا ەكى جىل ىشىندە ادام تانىماستاي وزگەرىپتى. جاقسىلىققا جول باستاعان سول “جول كارتاسى”. بالاباقشا ديرەكتورى ولگا كاناشكينانىڭ سوزىنە قاراعاندا, ەكى كەزەڭنەن تۇرعان جوندەۋ جۇمىستارىن جۇرگىزگەن “سپس” جشس 59 ادامدى قۇرىلىسقا تارتقان. عيماراتتىڭ ءىشى-سىرتى تۇگەلدەي جاڭارتىلعان, بالالار وينايتىن توبەسى جابىق ون الاڭقاي جاساقتالعان. مينيستر مۇنداعى جۇمىس ساپاسىنا دا وڭ باعا بەردى. “جول كارتاسى-2010” باعدارلا­ما­سىنا سايكەس باتىس قازاقستان وبلىسىنا 5 ملرد. تەڭگەدەن استام قارجى بولىنگەن ەدى. سول قارجىنىڭ كۇنى بۇگىن 90 پايىزى يگەرىلگەن. جالپى, وبلىستاعى بۇل باعىتتاعى جۇمىستاردىڭ قارقىنى مەن ساپاسى جاقسى. الەۋمەتتىك نىسانداردى جوندەۋ, جول سالۋ ءىسى وسىمەن توقتاپ قالمايدى. يندۋستريالاندىرۋ, “جول كارتاسى” باعدارلامالارى شەڭبەرىندە جالعاسا بەرەدى, دەدى گ.ابدىقالىقوۆا ساپارىنىڭ سوڭىندا. تەمىر قۇسايىن.