پارتيا سپورتتى قولدايدى

قازاقستان سپورتى دامۋدىڭ جاڭا كەزەڭىنە اياق باستى. ەلىمىزدە حالىقارالىق دەڭگەيدەگى جارىستار مەن چەمپيوناتتار وتكىزىلىپ, سپورت­شىلارىمىز اسا ابىرويلى جارىس­تاردا بيىك تۇعىردان كورىنىپ ءجۇر. وعان تامىز ايىنىڭ 14-ءى مەن 26-سى ارالىعىندا سينگاپۋردە وتكەن العاشقى جازعى جاسوسپىرىمدەر وليمپيا ويىنى دالەل بولا الادى. قازاقستان بەيرەسمي كوماندا­لىق ەسەپ بويىنشا 205 ەلدىڭ اراسى­نان 24-ءشى ورىندى ەنشىلەدى. 10 قىركۇيەكتە ورتالىق اپپاراتتا وسى حالىقارالىق شارادا لايىقتى ونەر كورسەتكەن قازاقستاندىق سپورتشى­لارعا قۇرمەت كورسەتىلدى. سايىس جۇلدەگەرلەرىمەن بولعان كەزدەسۋدى اشقان پارتيا توراعاسىنىڭ ءبىرىنشى ورىنباسارى نۇرلان نىعماتۋلين: “سىزدەر, الەمنىڭ 200-دەن استام ەلى قاتىسقان حالىقارالىق جازعى جاسوسپىرىمدەر وليمپيا ويىنىنا قاتىسىپ, جوعارى كورسەتكىشكە قول جەتكىزدىڭىزدەر. سينگاپۋردە العاش رەت وتكىزىلگەن مارتەبەلى جارىستا, سىزدەر التىن, كۇمىس, قولا مەدالدار يەلەنىپ, بۇكىل الەم الدىندا تاعى ءبىر رەت قازاقستانىمىزدىڭ ابىرويىن, مەرەيىن كوتەرىپ قايتتىڭىزدار. بۇل ەلباسىمىز, پارتيامىزدىڭ توراعاسى نۇرسۇلتان ءابىش ۇلى نازارباەۆتىڭ بارلىق سالاعا, سونىڭ ىشىندە سپورتقا دا ەرەكشە قولداۋ كورسەتىپ وتىرعانىنىڭ ناتيجەسى دەۋگە بولادى”, – دەپ اتاپ ءوتتى. ءوز كەزەگىندە سپورتشىلار مەن جاتتىقتىرۋشىلار قۇرامى دەنى ساۋ ۇرپاق تاربيەلەۋ يدەياسىن قولداۋعا, سپورتپەن شۇعىلدانۋدى كەڭ كولەمدە ناسيحاتتاۋعا دايىن ەكەندىكتەرىنە سەندىردى. كەزدەسۋ بارىسىندا “نۇر وتان” پارتياسىنىڭ باسىم باعىتتارىنىڭ ءبىرى حالىقتى سپورتپەن شۇعىلدانۋعا ىنتالاندىرۋ جانە دەنە تاربيەسىن دامىتۋ ەكەنى ايتىلدى. جىل سايىن پارتيادا ءتۇرلى جاستاعى مىڭداعان تۇرعىندار قاتىساتىن كوپتەگەن سپورتتىق شارالار مەن اكتسيالار وتكىزىلىپ تۇرادى. بۇل سالاماتتى ءومىر سالتىن قالايتىنداردىڭ سانىن ارتتىرۋعا ىقپال ەتىپ كەلەدى. ايتا كەتەيىك, قازاقستاندىق سپورتشىلار گرەك-ريم كۇرەسى, اۋىر اتلەتيكا, تاەكۆوندو تۇرلەرىنەن ەكى التىن, ەكى كۇمىس, ەكى قولا مەدالدى قانجىعاسىنا بايلادى. سونىمەن قاتار, دزيۋدو بويىنشا سىناقتان تىس ارالاس كوماندالىق ەسەپتە جوعارى دارەجەلى ءبىر مەدال جەڭىپ الدى.