العاشقى اينالىم اياقتالدى

بوكس جاقىندا وسىدان ەكى اي بۇرىن باستالعان قازاقستان بوكس فەدەراتسياسىنىڭ كۋبوگى جولىندا وتكەن 1/8 فينالدىق جەكپە-جەكتەر اياقتالدى. قوستاناي قالاسىندا وسى اينالىمنىڭ سوڭعى كەزدەسۋى وتكەن ايقاستا جەرگىلىكتى بوكسشىلار سولتۇستىك قازاقستان كومانداسىن 8:2 ەسەبىمەن جەڭىسكە جەتتى. بۇل كەزدەسۋدە قوستانايلىق 75 كگ. سالماقتاعى ان­تون پينچۋك پەن اسا اۋىر سالماقتاعى يۆان دىچكو جەك­پە-جەكتەرىن ۋاقىتىنان بۇرىن اياقتادى. العاش­قىسى نۇرسۇلتان ءباشىموۆتى شارشى الاڭدا ەش مۇمكىن­دىك بەرمەي ۇتسا, دىچكو مەحرۋز اليەۆتى 5:0 ەسەبىمەن ادەمى جەڭدى. ال پينچۋك قارسىلاسىنان ەكى سوققى جىبەرىپ الىپ, 10:2 ەسەبىمەن ۇتتى. مۇنىڭ الدىندا جانە ودان كەيىن بولعان ايقاستار دا تارتىستى ءوتتى. مىسالى, ەڭ جەڭىل 49 كگ. سالماقتا كۇش سىناسقان دامير جاقىپوۆ (سولتۇستىك قازاقستان وبلىسى) پەن دانيار الپىسباەۆ ءبىر-بىرىنە سوققىلارىن اياماي ايقاس­تى. سونىڭ ناتيجەسىندە العاشقىسى 17:11 ەسەبىمەن جەڭ­سە, ودان كەيىنگى 52 كگ. سالماقتاعى كەزدەسۋدە قوستا­نايلىق ەۆگەني گۋسەۆتىڭ مىسى قارسىلاسىنان باسىم تۇردى. ول وسى سالماقتا شارشى الاڭدا ەندى عانا تانىلىپ جۇرگەن انۋاربەك بايجانوۆتى وزىنە ءبىر سوققى جاساتپاي 10:0 ەسەبىمەن ۇتتى. بۇدان كەيىن قوستانايلىق زاكير سافيۋللين مەن گەرمان وكۋنەۆتىڭ (56 كگ.) ارا­سىنداعى كەزدەسۋدە ەسەپ 7:0 بولىپ تىركەلدى. قىسقاسى, وسى ايقاستاردا قوستانايلىق كوماندا 8 رەت قارسىلاسىن جەرگە قاراتسا, سولتۇستىكتەگى كورشىلەس­تەرىنىڭ تەك ەكى جەكپە-جەكتە عانا مەرەيى ۇستەم بولدى. ونىڭ ءبىرىنشىسى, جوعارىدا ايتقانىمىزداي, 49 كگ. سال­ماقتا بولسا, ەكىنشىسى, 64 كگ. سالماقتاعى ەرلان سما­عۇلوۆ ءمىر­بولات كوپجاساروۆتى 8:4 ەسەبىمەن ۇتقان كەزدەسۋدە ءتىر­كەل­دى. ال وسى كۇنگى شارشى الاڭدا ەڭ كوپ سوققى جا­سال­­عان ايقاس يۆان زاحارەنكو (سولتۇستىك قازاقستان وب­لى­سى) مەن نۇرلان نۇرسەيىتوۆتىڭ ارا­سىندا ءوتتى. مۇندا كەزدەسۋ 26:3 ەسەبىمەن سوڭعىسىنىڭ پايداسىنا شەشىلدى. بۇل كۇنى قوستانايلىقتار قاتارىنداعى سپارتاك باقتياروۆ (91 كگ.), ۇلىقبەك عيازوۆ (75 كگ.) قارسى­لاستارىنان باسىم ءتۇستى. دەگەنمەن سولتۇستىك قازاقستان بوكسشىلارىنىڭ كوبىسىنىڭ جەڭىلگەندەرىنە قاراپ, ولاردىڭ شەبەرلىكتەرى تومەن بولدى دەپ ايتا المايمىز. مۇندا ءوز سالماقتارىندا جالعاس تورتىلوۆ (69 كگ.), يگور شانين (91 كگ.) سىندى بىلعارى قولعاپ يەلەرى بارىن سالىپ كۇش سىناستى. ەندى 1/8 فينالدا جەڭگەن وبلىستاردىڭ كومان­دالارى شيرەك فينالدا ءوزارا كەزدەسەدى. بۇل جەكپە-جەكتەردىڭ باسى 18 قىركۇيەك كۇنى ماڭعىستاۋ مەن اتىراۋ وبلىس­تارى اراسىندا باستالادى. ودان كەيىن 2 قازان كۇنى شار­شى الاڭعا استانا قالاسى مەن شىعىس قازاقستان وبلى­سى­نىڭ ورەندەرى كوتەرىلەدى. ال جامبىل مەن وڭتۇستىك قازاقستان وبلىستارى اراسىن­داعى ايقاس 16 قازان كۇنى وتسە, ودان سوڭ 30 قازاندا قاراعاندى مەن قوستاناي ءوڭىر­­لەرىنىڭ كوماندالارى قولعاپ تۇيىستىرەدى. بۇل باسەكە­دە جەڭىسكە جەتكەندەرى جارتىلاي فينالعا شىعادى. ال 13 جانە 27 قاراشا كۇندەرى وتەتىن وسى اينا­لىمدا ۇتقان كوماندالار 16 جەلتوقسان كۇنى قازاق­ستان بوكس فەدەرا­تسياسىنىڭ كۋبوگى ءۇشىن فينالدىق كەزدەسۋ وتكىزەدى. * * *

بۇرىمدىلار باربادوستا باس قوستى

باربادوستا بوكستان ايەلدەر اراسىندا الەم چەمپيوناتى وتۋدە. بۇرىمدىلار باسەكەسىنە ۆاديم پريسياجنيۋك جات­تىق­تىراتىن قازاقستان قۇراماسىنىڭ بويجەتكەندەرى دە باق سىناسۋدا. وعان قۇراما ساپىندا نازگۇل بورانباەۆا (48 كگ.), ايگەرىم اسقاروۆا (51 كگ.), وكسانا كورولەۆا (54 كگ.), دينا جولامان (57 كگ.), گۇلجان ءۇبنيازوۆا, سايدا حا­سەنوۆا (ەكەۋى دە 64 كگ. ), ءمولدىر بازارباەۆا (69 كگ.), دا­­ري­عا شاكىموۆا (75 كگ.), مارينا ۆولنوۆا (81 كگ.) جانە اسا اۋىر سالماقتاعى جۇلدىز ماماتقۇلوۆا قاتىسۋدا. ەستەرىڭىزگە سالا كەتسەك, وسىلاردىڭ ىشىندە 2006 جىلى وتكەن الەم چەمپيوناتىندا نازگۇل بورانباەۆا قولا جۇلدەنى جەڭىپ السا, ەكى جىلدان كەيىن ونىڭ جەتىس­تىگىن ەلەنا كولتسوۆا قايتالادى. ال بيىلعى ازيا چەم­پيوناتىندا قىزدارىمىز سولتۇستىك كورەيا, ءۇندىستان, تايپەي, قىتاي, ۆەتنام سياقتى ەلدەردىڭ الدىن وراپ, چەمپيون اتانعان بولاتىن. باربادوستاعى باسەكە 18 قىركۇيەك كۇنى اياقتالادى. * * * كۇرەس

ازىرشە قورجىندا ەكى قولا

وسى كۇندەرى ماسكەۋ تورىندە كۇرەستىڭ ءۇش تۇرىنەن الەم چەمپيوناتى وتۋدە. وعان قاتىسىپ جاتقان گرەك-ريم كۇرەسىنەن قازاقستان قۇراماسىنىڭ قورجىنىنا ازىرشە ەكى قولا ءتۇسىپ وتىر. العاشقى قولا­نى بوز كىلەمگە ءبىرىنشى بولىپ شىققان 60 كگ. سالماقتاعى المات كەبىسباەۆ جەڭىپ السا, ودان كەيىن ونىڭ جەتىستىگىن اسا اۋىر سالماقتاعى نۇرماحان تىناليەۆ قاي­تالادى. وسى بەلدەسۋلەردە نۇرماحان يتاليا مەن يزرايل بالۋان­دارىن وڭاي ۇتىپ, شيرەك فينالدا افينا وليمپيا­داسىنىڭ چەمپيونى, بەيجىڭ وليمپياداسىنىڭ كۇمىس جۇلدەگەرى, الەمنىڭ ەكى دۇركىن چەمپيونى رەسەيلىك حاسان باروەۆتى 3:1 ەسەبىمەن جەڭگەننەن كەيىن 2008 جىلعى وليم­پيادا چەمپيونى كۋبالىق لوپەس نۋنەستەن ايلا­­سىن اسىرا المادى. دەگەنمەن قولا جۇلدە ءۇشىن كۇرەستە چەحيالىق مارەك سۆەچتى ۇتتى. ال المات بولسا بول­گاريالىق يۆو انگەلوۆتەن باسىم ءتۇستى. باسقا كەزدە­سۋلەردە 96 كگ. سالماقتاعى اسەت مامبەتوۆ ەكى كەزدەسۋ وتكىزىپ, ونىڭ بىرىنشىسىندە يوردا­نيالىق بالۋاندى جەڭ­سە, ەكىن­شىسىندە وليمپيادا چەمپيونى رەسەيلىك اسلانبەك حۋسيتوۆ­تەن ۇتىلىپ قالدى. تاعى ءبىر ءۇمىت ارتقان بالۋانى­­مىز 66 كگ. سالماقتاعى دارحان باياحمەتوۆ تە ءبىرىن­شى بەل­دەسۋىندە جەڭىپ, ەكىنشىسىندە جەڭىلۋگە ءماجبۇر بولدى. ال 84 كگ. سالماقتا كۇرەسكەن الزاحۋر وزديەۆ 1/8 فينالدا كۋبالىق بالۋاندى جەڭگەنىمەن شيرەك فينالدا تۇرىك قارسىلاسىنان ايلاسىن اسىرا المادى. داستان كەنجالين.