ماسەلەنىڭ ءمانىسى
ءورت بولاردان ءبىر كۇن بۇرىن عانا ءبىز شالداي ورمان شارۋاشىلىعىندا بولىپ, “ەرتىس ورمانى” تابيعي رەزەرۆاتىنىڭ باسشىسى قازبەك امەتوۆپەن كەزدەسىپ, ورمان شارۋاشىلىقتارىندا جاسالىپ جاتقان جۇمىستار بارىسىمەن تانىسىپ قايتقان ەدىك. وكىنىشكە قاراي, 8 قىركۇيەك كۇنى باستالعان داۋىل كەزىندە شارباقتى جانە لەبياجى اۋداندارىنا قاراستى ورمان شارۋاشىلىقتارى قىزىل ورتكە وراندى. وبلىستىق توتەنشە جاعدايلار باسقارماسىنىڭ حابارىنا قاراعاندا, ورمانعا جاقىن ورنالاسقان كوكجال, شوقتال, جاباعىلى اۋىلدارىندا ورمانشىلار اراسىندا ادام شىعىنى ورىن الدى, 6 ادام قازا بولدى, جاراقات العاندارى دا بار. كوپشىلىك تۇرعىندار كورشىلەس بەگەن, توساعاش اۋىلدارىنا ۋاقىتشا كوشىرىلدى. شامامەن ورمان شارۋاشىلىعىنىڭ 2 مىڭ گەكتارداي جەرى ورتەنىپ كەتتى.
ورمان ءورتى ورىن العان اۋماققا ۇكىمەتتىڭ وسى وقيعانى ەرەكشە نازارعا الۋى ناتيجەسىندە توتەنشە جاعدايلار ءمينيسترى ۆلاديمير بوجكو جانە وبلىس اكىم باقىتجان ساعىنتاەۆ تا جەدەل كەلىپ جەتتى. ءورتتى اۋىزدىقتاۋ جانە تۇرعىنداردىڭ قاۋىپسىزدىگىن قامتاماسىز ەتۋ جونىندەگى جەدەل شتاب قۇرىلدى. قازىر بارلىق تەحنيكالار جۇمىلىپ, ۇشاقتار كەلىپ, ءورتتى سوندىرۋگە ءاسكەريلەر, قۇقىق قورعاۋ ورىندارى, ءورت ءسوندىرۋ قىزمەتتەرىنىڭ جانە جەرگىلىكتى اكىمدىكتەر تاراپىنان بۇكىل كۇش-قۋاتتار جۇمىلدىرىلۋدا. استانادان وسى سالاعا قاتىسى بار مينيسترلىك وكىلدەرى دە كەلىپ جەتتى. لەبياجى اۋداندىق اۋرۋحاناسىندا وبلىستىق دەنساۋلىق ساقتاۋ باسقارماسى تاراپىنان بارعان جەدەل سانيتارلىق بريگادالار ورتكە كۇيىپ جارالانعان ورمانشىلارعا, اۋىل ادامدارىنا كومەك جاساۋدا. ءسويتىپ, الا جازداي تىنىش جاتقان شالداي ورماندارىنا ءورت قايتا اينالىپ سوقتى. قاتتى جەلدەن ەلەكتر سىمدارى ورالىپ ۇشقىننان ءورت شىقتى ما دەگەن ءدۇدامال بار. جەرگىلىكتى جۇرتشىلىق مۇنىڭ سەبەبى, قالىڭ اعاشتى قىرقىپ, پايدا كورمەك بولعانداردىڭ ورمان ءىشىن بولىسە الماي بىرىمەن-ءبىرى “قىرىق پىشاق” بولۋىنىڭ كەسىرىنەن بولۋى دا مۇمكىن دەپ وتىر. بىرەۋلەر شىرپى شاقپاسا وزدىگىنەن تۇرعان قالىڭ اعاش قانداي جەل بولسا دا وزىنەن-ءوزى تۇتانبايدى عوي... فاريدا بىقاي. پاۆلودار وبلىسى.
