بيۋدجەت زاڭنامالارى اينالىمعا الىندى

ءماجىلىس توراعاسى ورال مۇحامەدجانوۆتىڭ جەتەكشىلىگىمەن وتكەن پالاتانىڭ سارسەنبى كۇنگى پلەنارلىق وتىرىسىنىڭ كۇن تارتىبىندە 2011-2013 جىلدارعا ارنالعان رەسپۋبليكالىق بيۋدجەتكە قاتىستى زاڭدىق قۇجاتتار قارالىپ, قورىتىندى ازىرلەۋ ۋاقىتى بەلگىلەندى. “2011-2013 جىلدارعا ارنالعان رەسپۋبليكالىق بيۋدجەت تۋرالى” زاڭ جوباسى, ۇلتتىق قوردان 2011-2013 جىلدارعا ارنالعان كەپىلدەندىرىل­گەن ترانسفەرت جانە رەسپۋبلي­كا­لىق, وبلىستىق بيۋدجەتتەر, رەس­پۋب­ليكالىق ماڭىزى بار قالا, استانا بيۋدجەتتەرى اراسىنداعى 2011-2013 جىلدارعا ارنالعان جالپى سيپات­تا­عى ترانسفەرتتەردىڭ كولەمى تۋرالى زاڭدىق قۇجاتتار اينالىمعا الىن­دى. سول سياقتى “قازاقستان رەس­پۋب­ليكاسى مەن كورەيا رەسپۋب­لي­كا­سى اراسىنداعى ۇستاپ بەرۋ تۋرالى شارتتى راتيفيكاتسيالاۋ تۋرالى” جانە سوعان جاپسارلاس قىلمىستىق ىستەر بويىنشا ءوزارا قۇقىقتىق كو­مەك تۋرالى شارتتى بەكىتۋ زاڭ جو­با­لارى قولداۋ تاۋىپ, قورىتىندى ازىرلەنەتىن بولىپ شەشىلدى. سون­داي-اق وتىرىس بارىسىندا كەزىندە ءماجىلىس دەپۋتاتى بولعان, بەلگىلى قو­عام قايراتكەرى قاراتاي تۇرى­سوۆ­قا استاناداعى ءبىر كوشەنىڭ اتى بە­رىلۋىنە وراي وسىنداي شەشىم شى­عارعان ءماسليحات دەپۋتاتتارىنا ري­زاشىلىق حاتىن جولداۋ تۋرالى شەشىم قابىلداندى. دەپۋتاتتىق ساۋالدار ادەتتەگىشە ءبىر ساعاتقا سوزىلدى. زاعيپا با­ليەۆا مەملەكەتتىك قىزمەت كورسەتۋ سالاسىندا, اسىرەسە, جەكە كۋالىكتەر مەن پاسپورت بەرۋ ورىندارىنىڭ جۇ­مىسىن تەكسەرۋ ماقساتىندا پار­تيالىق كوميسسيا قۇرۋ قاجەتتىگىنە نازار اۋدارتتى. ەگەر ونداي كوميس­سيا قۇرىلعانداي بولسا, وندا ونىڭ قۇرامىنا پارلامەنت دەپۋتاتتارىن دا ەنگىزۋ كەرەك, دەپ سانايدى ز.باليەۆا. قوجا احمەت ياساۋي كەسەنەسىنىڭ قا­زىرگى مۇشكىل جاعدايى روزاقۇل حال­مۇرادوۆ ساۋالىندا وتكىر قويىلدى. دەپۋتات كەسەنەگە 1993-2002 جىلدار ارالىعىندا تۇركيا­لىق ءبىر فيرمانىڭ كۇردەلى جوندەۋ جۇرگىزگەندىگىن تىلگە تيەك ەتە كەلىپ, ءتيىستى قۇزىرەتتى مەكەمەلەر تارا­پى­نان قابىلدانىپ العان نىساندا گيدرويزولياتسيا جانە بولمەلەرىنىڭ ۆەنتيلياتسيا جۇيەلەرى بۇزىلعان­دىعى انىقتالعاندىعىن العا تارتتى. سونىڭ سالدارىنان كەسەنە قابىر­عا­لارى سىزدانىپ, كىرپىشتەرى ءمۇجى­لە باستاعان. ەگەر جاعداي وسىلايشا قالا بەرسە, وندا كەسەنەنىڭ ۇستىندەگى ۇلكەن كۇمبەز ءبىر كۇنى قۇلاۋى دا مۇمكىن ەكەن. قازىرگى تاڭدا “ق.ياساۋي كەسەنەسىن قورعاۋ” قو­عامدىق بىرلەستىگى جانە وبلىستىق اكىمشىلىك تاراپىنان قۇرىلعان كو­ميسسيا ساۋلەت ونەرىنىڭ جاۋھارىن ساقتاپ قالۋعا كىرىسىپ تە كەتىپتى. الايدا دەپۋتات ۇكىمەت تاراپىنان نەن­دەي ءىس-شارالار قولعا الىنارىن بىلگىسى كەلەرىن ايتىپ, پرەمەردىڭ اتىنا ساۋال جولدادى. اسقار تۇراپباي ۇلى.