بۇل مەرەكە كەنشىلەر قالاسى – ەكىباستۇزداعى “ونەر” مادەنيەت سارايىندا اتالىپ ءوتتى. كومىر ءوندىرەتىن “شىعىس” كەنىشى – “ENRC”-ءدىڭ نە ماعىنا بەرەتىنىن تاراتىپ ايتار بولساق, ول ەۋرازيالىق تابيعي رەسۋرستار كورپوراتسياسى قۇرامىنا قارايتىن “ەۋرازيالىق ەنەرگەتيكالىق كورپوراتسياسى” اكتسيونەرلىك قوعامىنىڭ بولىمشەسى دەگەن ءسوز. كەنىشتىڭ جىلدىق كومىر ءوندىرۋ مەجەسى قازىرگى كۇندەرى 22 ميلليون تونناعا جەتىپ وتىر. مەرەكە كۇنى ارداگەر كەنشى, پارلامەنت ءماجىلىسىنىڭ دەپۋتاتى امانقوس وتەگەنوۆ: “بۇل جەر ميداي جازىق دالا ەدى, ءبىز ول جەردى وسىلاي يگەرىپ, ەل يگىلىگىنە اينالدىردىق”, – دەپ ەسكە الدى.
كەنشىلەردى وبلىس اكىمى باقىتجان ساعىنتاەۆ قۇتتىقتادى. كەنىش ەلىمىزدە قابىلدانعان ۇدەمەلى يننوۆاتسيالىق-يندۋستريالىق باعدارلامانى دامىتاتىن كاسىپورىندار قاتارىندا تۇر. جۋىردا كومىردى جەر استىنان تازالاپ, ارشىپ الىپ شىعاتىن كارەرلىك-كونۆەيەرلىك جۇيە ىسكە قوسىلدى. بۇل جۇمىسقا 85 ميلليون اقش دوللارى جۇمسالدى. جاڭا نىساندا 200 ادام جۇمىسپەن قامتىلعان. كەنىشتىڭ تابىستى جۇمىس جاساۋى ءۇشىن ەڭبەك ەتكەن كەنشىلەرگە سىي-قۇرمەت جاسالدى, كەش سوڭىنان “ ۇلىتاۋ” توبىنىڭ جىگىتتەرى ونەر كورسەتتى.
فاريدا بىقاي. پاۆلودار وبلىسى.
* * *
بولاشاققا ساۋ كوزبەن قارايىق
ەلباسىنىڭ جولداۋلارىندا قوعامداعى ادام دەنساۋلىعىن قورعاۋ مەن سالاماتتى ءومىر سالتىن قالىپتاستىرۋعا باسا ءمان بەرىلسە, وڭىردە وسى ماقساتتاعى جۇمىستاردىڭ تياناعى كەلتىرىلىپ كەلە جاتقانى قۋانتادى. ءوڭىر حالقىنا مەديتسينالىق قىزمەت كورسەتۋ باعىتىنداعى ناقتى جۇمىستارمەن بىرگە, اۋىرىپ ەم ىزدەگەنشە, اۋىرمايتىن جول ىزدە قاعيداتىنا باعىتتالعان شارالاردىڭ جالعاسىن تابۋى وسىنىڭ ناقتى دالەلى. “دەنساۋلىق جولى-2010” باعدارلاماسى بويىنشا “بولاشاققا ساۋ كوزبەن قارايىق” تاقىرىبىنداعى وبلىستىڭ بارلىق ايماقتارىن قامتىعان ناسيحات جۇمىسى كوپشىلىكتەن قولداۋ تاۋىپ, تالدىقورعان, تالعار, ىلە, قاراساي جانە باسقا ءوڭىرلەردە جالعاستى. اكتسيا بارىسىندا دامىعان قوعامداعى تەحنيكانى مەڭگەرۋ كەزىندە قوس شىراقتى ساقتاۋ, ونى ءتۇرلى اۋرۋلاردان قورعاۋ ماسەلەلەرى ورتاعا سالىندى. كوز – ادامنىڭ ايناسى دەگەن. تاڭنىڭ اتىسى, كۇننىڭ باتىسى كومپيۋتەر مەن تەلەديدارعا تەسىلىپ, ونى ءومىرىنىڭ بەلگىلى بولشەگىنە اينالدىرعاندىقتان, جالت ەتكەن جانارعا تۇسەتىن سالماق ۇلكەن ەكەنى داۋسىز. ءار ادامنىڭ دەنىنىڭ ساۋلىعى – قوعامنىڭ ساۋلىعى دەگەن اكتسيا بارىسىندا دارىگەرلەر كەڭەسىن تىڭداپ, كورۋ شاماسىن انىقتاۋ مەن ەمدەۋگە قاتىسقاندار العىستارىن جەتكىزدى. كۇمىسجان بايجان. الماتى وبلىسى. * * *ساعىندىرعان اندەر-اي!
“ساعىندىرعان اندەر-اي” رەترو اندەر فەستيۆالى تۇڭعىش رەت وسكەمەندە دۇرىلدەپ ءوتتى. وعان وبلىس اكىمى ب. ساپارباەۆ قاتىستى. قازاقستاننىڭ ونەر جۇلدىزدارى نۇرعالي ءنۇسىپجانوۆ, مايرا ءىلياسوۆا, ماقپال ءجۇنىسوۆا, مايرا نۇركەنوۆا, ماحمۋت تويكەنوۆ اننەن شاشۋ شاشتى. نۇرعالي سوناۋ جەتپىسىنشى جىلداردا اقىن زارىقباي ىبىراەۆتىڭ شىعارعان “وسكەمەنىم” ءانىن شىرقاعان كەزدە اتشاپتىرىم زال ءىشى سىلتەدەي تىندى. وڭداسىن ەلۋباي. وسكەمەن. * * *“بايانتاۋدىڭ” رەداكتورى – قۇرمەتتى جۋرناليست
شاكرات شالباي اۋداندىق گازەتتە 50 جىل بويى قىزمەت ەتىپ, عاجايىپ جەردىڭ, ەلدىڭ قادىرىن ۇلىقتاپ, وتكەننىڭ شەجىرەسىن, تاۋ باۋرايىندا وتىرعان اۋىلداردىڭ تىنىس-تىرشىلىگىن قولىنداعى قالاممەن ورنەكتەپ بۇگىنگە جەتكىزىپ كەلەدى. تابيعاتىنا بۇكىل قازاق تامساناتىن باياناۋىلداي جەردىڭ اتاعىنا ساي اۋداندىق گازەت تە “بايانتاۋ” دەپ اتالادى. وسى جەردە وسكەن كىشكەنە بالادان قارتتارىنا دەيىن “بايانىم, بايانتاۋىم” دەپ وتىرادى. بۇگىنگى “ەگەمەن” كەلدى مە دەپ ەلەڭدەپ, گازەت قولىنا تيگەنشە تىقىرشىپ وتىراتىن اعامىز وقي سالا ءبىزدىڭ تىلشىلەر قوسىنىنا ءجيى تەلەفون شالىپ, ماقالالار جايىندا وي ءبولىسىپ, پىكىر ءبىلدىرىپ جاتادى. “ەگەمەن” دەگەن ءسوزدىڭ ءوزى قانداي, ءا! كەزىندە وسى ءبىر اۋىز ءسوز ەلدىڭ شاڭىراعىن بيىككە قاشان شىعارادى دەپ ارمانداۋشى ەدىك, سول كۇنگە قول جەتتى, ەندى سول ەگەمەندىكتى, ەلدىكتى قورعاپ, ساقتاپ قالۋ – ءبىزدىڭ ءمىندەتىمىز, ال باياناۋىل دەگەنىڭىز تۇنىپ تۇرعان شەجىرە, تاريح, جيعان-تەرگەن جەتەدى, ونى كەيىنگى ۇرپاققا نەسىبە عىپ جازىپ قالدىرارمىز”, – دەيدى شالباي. ارداگەر جۋرناليست 50 جىل بويى اۋداندىق گازەتتە ەڭبەك ەتسە, اۋدان اكىمى ەرنۇر ايتكەنوۆ باستاپ اۋدان اكىمدىگى شىعارماشىلىق كەشىن وتكىزدى. قالام تەربەگەن كوپ جىلعى قىزمەتى ءۇشىن “ەرەن ەڭبەگى ءۇشىن” مەدالىنىڭ يەگەرى بولعان اعامىز ەندى ەلىمىزدىڭ جۋرناليستەر وداعى ۇسىنعان “قازاقستاننىڭ قۇرمەتتى ءجۋرناليسى” بەلگىسىمەن ماراپاتتالدى. ول ءوز ماڭايىنا جاس ءتىلشىلەردى توپتاستىردى, جۋرناليستيكانىڭ قىر-سىرىن ۇيرەتىپ, كوپ ءبىلۋ, كوپ وقۋ-توقۋ كەرەكتىگىن نازارعا سالدى. – ال قولعا قالام العان قازاق جۋرناليسى ءۇشىن ءتىل تاعدىرى, ەل مەن جەردىڭ بەرىكتىگى, اۋىل-ەلدىڭ ءبۇتىندىگى, جالپى وتانىمىزدىڭ پاتريوتتىق ءۇنى, داۋىسى بولۋى كەرەك, –دەيدى ش.شالباي. كورگەنى مەن بىلگەنى كوپ, تاۋ باۋرايىنداعى قاسيەتتى جەردىڭ سىر بۇككەن ءار تاسىن سويلەتە الاتىن, سارعايعان قويىن داپتەرلەرىن بايلىعى كورەتىن جۋرناليست اعامىزعا ءبىز دە شىعارماشىلىق تابىس تىلەيمىز. فاريدا بىقاي. پاۆلودار وبلىسى.
