يزرايل مەن پالەستينا اۆتونومياسى اراسىنداعى تىكەلەي كەلىسسوز 2 قىركۇيەكتە ۆاشينگتوندا اقش پرەزيدەنتى باراك وبامانىڭ قاتىسۋىمەن باستالماق. بۇل جونىندەگى مالىمدەمە ءماتىنىن بىتىمگەرشىلىك ءۇردىسىنىڭ تورتتىك دەمەۋشىسى (اقش, رەسەي, ەو جانە بۇۇ) بەكىتكەن كورىنەدى. بۇل كەلىسسوز وسىدان ەكى جىل بۇرىن ءيزرايلدىڭ گازا سەكتورىنداعى راديكالدىق يسلامدىق حاماس ۇيىمى اسكەرىنىڭ قۇرىلىمىن جويۋ شارالارىنا بايلانىستى ۇزىلگەن بولاتىن.
قىتاي جاپونيادان وزدى
ۇستىمىزدەگى جىلدىڭ العاشقى جارتىسىنىڭ قورىتىندىسى بويىنشا قىتاي ىشكى جالپى ءونىم كولەمى جونىنەن جاپونيانى باسىپ وزىپ, اقش-تان كەيىنگى ەكىنشى ورىنعا شىقتى. قىتايلىق ءىجو 1,337 تريلليون دوللاردى قۇراسا, جاپونيانىكى – 1,288 تريلليون. بىراق قىتايلاردىڭ سانى جاپونداردان ون ەسە ارتىق ەكەنىن ەسكەرگەن ءجون.
بۇرىن بولماعان توپانسۋ
بۇۇ باس حاتشىسى پان گي مۋن توپانسۋ ەسەڭگىرەتكەن پاكستاندا بولىپ, مۇنداي سۇمدىقتى بۇرىن-سوڭدى كورمەگەنىن ايتىپ, حالىقارالىق باس ۇيىم تاراپىنان بۇل ەلگە كومەك كورسەتىلەتىنىن مالىمدەدى. ونىڭ ەسەبى بويىنشا, الەم ەلدەرى تاراپىنان 460 ميلليون دوللار كولەمىندە كومەك جينالماق كورىنەدى. توپانسۋ سالدارىنان بۇل ەلدە 20 ميلليونداي ادام جاپا شەگىپ, 1500 ادام قازا تاپقانىن ەسكە العاندا, بۇل قارجى تىم از.
وتكىزە الماساڭ – ايىپ تولە
يران اقپارات قۇرالدارىنىڭ حابارىنا قاراعاندا, بۇل ەلگە تۇركيا 600 ميلليون دوللار ايىپ تولەۋگە ءماجبۇر بولىپتى. الدىن الا جاسالعان كەلىسىم بويىنشا تۇركيا جىل سايىن 30 ميلليارد تەكشەمەتر گازدى يمپورتتاۋعا مىندەتتەنسە, وتكەن جىلى 9 ميلليارد تەكشەمەتر عانا يمپورتتاپتى. تۇرىك ەنەرگەتيكا ءمينيسترى تانەر يالدىز قىس جىلى بولىپ, جۇرت گازدى از پايدالاندى دەپ اقتالسا كەرەك.
كيم چەن ءيردىڭ مۇراگەرى
كحدر جونىندەگى ساراپشىلاردىڭ پىكىرىنشە, كيم چەن ءيردىڭ مۇراگەرى بولىپ ونىڭ قارىنداسىنىڭ كۇيەۋى چجان سون تحەك بەلگىلەنگەنگە ۇقسايدى. بۇرىن بۇل ورىنعا ەل بيلەۋشىسىنىڭ كىشى بالاسى كيم چەن ۋن ايتىلىپ كەلسە, ءسىرا, مۇنداي ۇلكەن جاۋاپكەرشىلىكتى ول الىپ جۇرە الماس دەگەن بولار. ءبىراز ۋاقىت بيلىكتەن شەتتەتىلگەن چجان سون تحەك حالىق قورعانىسى كوميتەتى توراعاسىنىڭ ورىنباسارى بولىپ تاعايىندالىپتى.
يران ۋراندى كوبەيتەدى
يران پرەزيدەنتى ماحمۋد احمادينەجاد “يران يسلام رەسپۋبليكاسىنىڭ بەيبىت يادرولىق جەتىستىكتەرىن قورعاۋ” دەپ اتالاتىن دەكرەتكە قول قويدى. وندا ۋراندى بايىتۋدى ارتتىرۋ جانە اتوم ەنەرگەتيكاسى جونىندەگى حالىقارالىق اگەنتتىكپەن (ماگاتە) بايلانىستى شەكتەۋ كوزدەلگەن. ال رەسەيدىڭ كومەگىمەن سالىنعان اەس-ءتى ىسكە قوسىپ, وعان قاجەتتى يادرولىق وتىندى رەسەيدەن الۋ جونىندە كەلىسىم جاسالعاننان كەيىن مىناداي دەكرەتكە قول قويىلۋى الەم جۇرتشىلىعىن تاعى دا ويلاندىرادى. بۇل بايىتىلعان ۋران نەگە پايدالانىلادى دەگەن سۇراق وزىنەن-ءوزى تۋىندايدى.
مىرزاكماتوۆتىڭ جەڭىسى
بەيسەنبى كۇنى قىرعىزستاننىڭ وش قالاسىندا جەرگىلىكتى اكىم مەليس مىرزاكماتوۆتى جاقتاعان جۇرتشىلىقتىڭ ميتينگىسى بولىپ, وعان قاتىسقاندار ۋاقىتشا ۇكىمەت پەن ەل پرەزيدەنتى روزا وتۋنباەۆانىڭ قىزمەتتەرىنەن كەتۋىن تالاپ ەتتى. جۇما كۇنى جينالعاندارمەن مىرزاكماتوۆتىڭ ءوزى كەزدەسىپ, بىشكەكتە بولعانىن, ۋاقىتشا ۇكىمەتتىڭ قارسىلىعىنا قاراماي, قىزمەتىن ساقتاپ قالعانىن بايانداعان سوڭ, جۇرت تارقاعان كورىنەدى. مۇنداي وقيعالار بۇل ەلدە تىنىشتىقتىڭ اۋىلى الىس ەكەنىن اڭعارتادى.
ءانشىنىڭ اۋزىن جاپپاق
وزبەكستاننىڭ ەڭبەك سىڭىرگەن ءارتىسى ءانشى فەرۋزا جۇمانيازوۆا جاقىندا تاجىكستاندا بولىپ, كونتسەرت قويىپ قايتتى. قايتا ەلىنە كەلگەندە, قاتتى كەيىس ەسىتىپ, ءتىپتى ونىڭ انشىلىك قىزمەتىنە جول جابىلاتىنداي بولىپ وتىر. سەبەپ – تاتۋ ەمەس كورشى ەلگە بارعانى. وعان قاراما-قايشى قىرعىزدار وزبەكستاننىڭ حالىق ءارتىسى جۇلدىز وسمانوۆانىڭ وشتاعى وقيعالارعا بايلانىستى ءان شىعارىپ, ونى ورىنداعانى ءۇشىن وعان ءوز ەلىنىڭ ەسىگىن جاباتىنىن ايتىپ, دۇرلىگىپ جاتىر. وسىدان بۇرىنىراق وزبەكتەر شىڭعىس ايتماتوۆتىڭ اتىن اتاۋعا تىيىم سالعانى بەلگىلى. ساياساتتىڭ وكتەمدىك جاساعانى جامان.
ازىرلەگەن ماماديار جاقىپ.
