اكتسيا جالعاسادى

جاڭا وقۋ جىلى قارساڭىندا جەر-جەردە مەكتەپكە دايىندىق جۇمىستارى قىزۋ جۇرگىزىلۋدە. مۇنداي دايىندىق ناۋقانىنان “نۇر وتان” حالىقتىق-دەموكراتيالىق پارتياسى دا سىرت قالمادى. كەشە پارتيا توراعاسىنىڭ ءبىرىنشى ورىنباسارى نۇرلان نىعماتۋليننىڭ قاتىسۋىمەن وتكەن شارادا بالالارعا مەكتەپتىك قۇرال-جابدىقتار ۇلەستىرىلىپ بەرىلدى. كوپبالالى جانە تۇرمىسى تومەن وتباسىلارعا قوعام نازارىن اۋدارۋ ماقساتىندا پارتيا ەلىمىزدىڭ بارلىق ايماقتارىندا “بالالاردى مەكتەپكە جينايىق!” اتتى قايى­رىم­دىلىق اكتسياسىن وتكىزۋدە. وسى­عان وراي مىڭداعان ازاماتتار اكتسياعا قولداۋ كورسەتىپ, شارا ايا­سىندا تۇرمىسى تومەن جانە كوپ­ با­لالى وتباسى بالالارىنا ءوز سىي-سياپاتتارىن جاساۋدا. پارتيانىڭ ورتالىق اپپاراتى الدىندا وتكەن ءىس-شارا دا سونىڭ ءبىر كورىنىسى بولدى. وسىندا جينالعان 200 بالا اۋا رايىنىڭ سالقىندىعىنا قارا­ماس­تان, وزدەرىنە تيەسىلى سىي-سيا­پاتتى تاعاتسىزدانا كۇتتى. اتا-انالار مەن بالالار الدىنا شىققان “نۇر وتان” حدپ توراعا­سى­نىڭ ءبىرىنشى ورىنباسارى نۇرلان نىعماتۋلين ءسوز سويلەدى: “ەلبا­سى­مىز, پارتيامىزدىڭ توراعاسى نۇرسۇلتان ءابىش ۇلى نازارباەۆ ساياساتىنىڭ ارقاسىندا قازاقستاندا جاڭا مەكتەپتەر قۇرىلىسى اياقتا­لىپ, پايدالانۋعا بەرىلۋدە. وسىن­داي شارالار سىزدەردىڭ بولاشاق­تارى­ڭىز ءۇشىن جاسالۋدا”, – دەدى ول. جينالعانداردى الداعى ءبىلىم مەرەكەسىمەن قۇتتىقتاعان ن.نىع­ما­تۋلين ءسوزىن ءارى قاراي ساباقتاي كەلىپ, بىلاي دەدى: “ارينە, مەكتەپكە دايىندالۋ دەگەن دە وڭاي شارۋا ەمەس, سول ۇلكەن جۇمىستى جەڭىلدە­تۋ­گە ۇلەس قوسۋ ءۇشىن بۇگىن وزدەرى­ڭىز­دى شاقىرىپ وتىرمىز. جاڭا وقۋ جىلىنىڭ سىزدەر ءۇشىن تابىستى بولاتىنىنا سەنەمىز, بارشاڭىزعا زور دەنساۋلىق, مول باقىت تىلەيمىز!”. شىنىندا دا, جاڭا وقۋ جىلى قارساڭىندا قولعا الىنعان وسىنداي يگى شارالار بالالار كوڭىلىنە دەمەۋ, اتا-انالارىنا كومەك بولارى ايتپاسا دا تۇسىنىكتى. ولاي بولسا, “نۇر وتاننىڭ” بۇل يگى باستاماسى وزگەلەرگە دە قوزعاۋ سالۋى ءتيىس. ۇيىمداستىرۋشىلاردىڭ ايتۋىنشا, اكتسيا تامىز ايىنىڭ سوڭىنا دەيىن جالعاساتىن بولادى. اسقار تۇراپباي ۇلى.