اۋقىمدى شاراعا ازىرلىك جولىندا

استانادا وتەتىن سامميتكە دەيىن 100 كۇن بۇرىن ەقىۇ-نىڭ ءىس باسىنداعى توراعاسى مۇشە مەملەكەتتەردى ورتاق سىناقتارعا بىرلەسە جاۋاپ ىزدەۋگە شاقىرادى. كەشە ەقىۇ-نىڭ ءىس باسىنداعى توراعاسى, قازاقستاننىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆ “56 مۇشە مەملەكەتتەر كوشباسشىلارىنىڭ استانادا 1-2 جەلتوقسان ارالىعىندا وتەتىن كەزدەسۋى بۇگىن ءبىزدىڭ الدىمىزدا تۇرعان سىناقتار مەن قاۋىپتەرگە ءتيىستى جاۋاپ قايتارۋعا تاماشا مۇمكىندىك بەرەدى” دەپ مالىمدەدى. “11 جىلدىق ۇزىلىستەن كەيىن قازاقستان پرەزيدەنتى نۇرسۇلتان نازارباەۆتىڭ باس­تاماسىمەن العاش رەت ۇيىمداستىرى­ل­عالى وتىرعان استانا ءسامميتى ءبىزدىڭ ەلدەر مەن ولاردىڭ ساياسي كوشباسشىلارىنا, 21-عاسىردا دا ءوز وزەكتىلىگى مەن قاجەتتىلىگىن جوعالتپاعان, ەقىۇ نەگىزگە العان جال­پى­عا ورتاق قاۋىپسىزدىك پەن ىنتىماقتاس­تىق­تى قامتاماسىز ەتۋ پرينتسيپتەرىن الەمگە پاش ەتكىزۋگە ەرەكشە مۇمكىندىك. سامميتكە دەيىن قالعان 100 كۇن ىشىندە استانادا وتەتىن سوناۋ تاريحي كەزدەسۋ جوعارى ماز­مۇن­دى جانە ۇيىمداسقان دەڭگەيدە ءوتۋ ءۇشىن جانە ەقىۇ-عا مۇشە مەملەكەت­تەر­دىڭ كوشباسشىلارى ۆانكۋۆەردەن ۆلا­دي­ۆوس­توكقا دەيىن “قاۋىپسىزدىك كەڭىستىگى” تۇ­جىرىمداماسىنان “قاۋىپسىزدىك قوعام­داستىعىنا”, ءبىزدىڭ ورتاق ۇيىمنىڭ نى­عايۋى مەن جاڭارۋىنا جول اشۋ ءۇشىن ءۇل­كەن جۇمىس اتقارۋىمىز قاجەت”, دەدى ق.ساۋداباەۆ. ەقىۇ-عا مۇشە مەملەكەتتەر باسشى­لارى­نىڭ سوڭعى ءسامميتى 1999 جىلى ىستامبۇلدا وتكەن بولاتىن. وسى جىلى ۇيىم­نىڭ ءسامميتىن وتكىزۋ تۋرالى شە­شىم ۇيىم مەملەكەتتەرىنىڭ سىرتقى ىستەر مينيسترلەرىمەن الماتى جانىندا وتكەن مينيسترلەردىڭ بەيرەسمي كەزدەسۋىندە قول جەتكىزىلگەن كەلىسىم ناتيجەلەرى بويىنشا 3 تامىز كۇنى قابىلداندى. استانا سام­ميتى ۇيىم تاريحىنداعى جەتىنشى سامميت بولماق. وسىنىڭ الدىنداعى سامميتتەر 1975 جىلى حەلسينكيدە, 1990 جىلى پا­ريجدە, 1992 جىلى حەلسينكيدە, 1994 جىلى بۋداپەشتە, 1996 جىلى ليسسابوندا جانە 1999 جىلى ىستامبۇلدا وتكەن بولاتىن. ءسامميتتىڭ ءىزاشارى رەتىندە ۆارشاۆا, ۆەنا جانە استانادا وتەتىن ءۇش بولىكتەن تۇراتىن شولۋ كونفەرەنتسياسى بولادى. اتالعان كونفەرەنتسيا 30 قىركۇيەكتەن باستالدى.