جۋىردا قىتايدىڭ ءۇرىمشى قالاسىندا العاش رەت حالىقارالىق بالالار فەستيۆالى ءوتتى. وعان استانا قالاسىنداعى №2 بالالار مۋزىكا مەكتەبىنىڭ “استانا سازى” فولكلورلىق ءانسامبلى قاتىسىپ, تابىسپەن ورالدى.
استانالىق ءانسامبلدى №2 بالالار مۋزىكا مەكتەبىنىڭ ديرەكتورى, سازگەر وسپان سۇلەيمەن ۇلى باستاپ باردى. ەلوردالىق ونەرلى بالالار قۇرمانعازىنىڭ “بالبىراۋىن” جانە نۇرعيسا تىلەنديەۆتىڭ “اتا تولعاۋى” كۇيلەرىن ورىنداپ, قوشەمەتكە بولەندى. سونىمەن قاتار №2 بالالار مۋزىكا مەكتەبىنىڭ ۇستازى كارىمبەك ەندىباەۆتىڭ “استانا سالتاناتى” اتتى كۇيىن بىرنەشە ەلدەن جينالعان كورەرمەندەردىڭ نازارىنا تارتۋ ەتتى. جەكە ورىنداۋشىلار دا ءان شىرقادى.
“بالالار كونتسەرتتەن تىس ۋاقىتتاردا ورتالىق ساياباقتى, زووباقتى ارالاپ كوردى. اسىرەسە وزىق زاماناۋي تەحنولوگيانىڭ دامۋىنا ارنالعان مۇراجاي بالالاردىڭ وتە قىزىعۋشىلىعىن تۋعىزعان. وندا ءالى قولدانىسقا ەنبەگەن تەحنيكا تۇرلەرىمەن, ءار ءتۇرلى “ونەر” كورسەتە الاتىن روبوتتارمەن تانىستى. ونەرلى بالالارعا قۇلتەمىرلەردەن قۇرالعان وركەستر ەرەكشە اسەر ەتتى. جيىرمادان استام مۇشەسى بار “ونەرپاز” وركەستردىڭ ءوز ديريجەرلەرى بار. ولاردىڭ ورىنداعان شىعارماسى ءار بالانى وزىنە تارتىپ, قىزىقتىرا ءتۇستى. سونىمەن قاتار, قىتاي ەلى عارىشتى زەرتتەۋگە وتە ءمان بەرىپ وتىرعانىن انىق بايقادىق. ءويتكەنى, وسى مۇراجايدىڭ ءبىر قاباتىن تۇگەلدەي عارىش سالاسىنا ارناعان. وندا بالالار جەر شارى مەن عالامشاردىڭ قۇپيا الەمىنەن مول ماعلۇمات الدى دەپ ويلايمىن”, – دەيدى №2 بالالار مۋزىكا مەكتەبىنىڭ ديرەكتورى و.سۇلەيمەن ۇلى.
“ەگەمەن-اقپارات”.
استانا.
* * *
ء“شامشى الەمى” شاعىن باعى نەمەسە جاقسى باستاما جالعاسىن تابۋدا
وبلىس ورتالىعىنداعى ءال-فارابي اۋدانىنا قاراستى “كول” ماڭىنداعى جاڭادان سالىنعان سكۆەرگە – ء“شامشى الەمى” شاعىنباعى دەپ اتاۋ بەرىلدى. بۇل اسەم اتاۋ ەندى عاسىرلار بويى حالىققا قىزمەت ەتە بەرمەك. ء“شامشى الەمى” شاعىنباعىندا كوپتەگەن وبلىستىق, رەسپۋبليكالىق, حالىقارالىق بايقاۋلار, فەستيۆالدار مەن تاعى باسقا دا ءتۇرلى جارىستار وتكىزىلەتىن بولادى. ەندى 45-50 جىلدان كەيىن (مۇمكىن ءشامشى قالداياقوۆتىڭ 125 جىلدىعىنا وراي), وسى اتاۋدى كىمنىڭ قويعانى تۋرالى ءسوز قوزعالۋى مۇمكىن. سوندا كەيبىر كىسىلەر بۇل اتاۋدى مەن قويدىم دەپ ايتىپ قالۋى دا عاجاپ ەمەس! ويتكەنى, ەلۋ جىلدا ەل جاڭا دەمەكشى, بۇگىنگى تاڭدا اۋدان, قالا, وبلىستا قىزمەت ىستەپ جۇرگەندەردىڭ ول كەزدە بۇل ءپاني دۇنيەدە بولۋى نەمەسە بولماۋى ءبىر اللاعا عانا ايان. سوندىقتان, وسى اتاۋدىڭ قالاي بەرىلگەنىن بىلەتىن مامان رەتىندە ءارى تاريح ءۇشىن مىنا جايتتەردى ايتا كەتسەم دەيمىن. جىلداعى ءداستۇر بويىنشا وبلىستىق ونوماستيكا كوميسسياسىنىڭ حاتشىسى رەتىندە كوميسسيانىڭ 2010 جىلعا ارنالعان جۇمىس جوسپارىن جاساپ, وبلىستىق ونوماستيكا كوميسسياسىنىڭ ءتوراعاسى ا.مىرزاحمەتوۆكە بەكىتۋگە ۇسىنعان ەدىك. كەلەسى كۇنى قۇجات كەڭسەدەن شىققاننان كەيىن بايقاسام, اسقار يسابەك ۇلى بيىلعى جىلدىڭ جۇمىس جوسپارىنا شىمكەنت قالاسىنداعى “كول” ماڭىنداعى سكۆەردى ء“شامشى الەمى” شاعىنباعى دەپ اتاۋ جانە “ەتنوقالاشىققا” “تاۋەلسىزدىك الاڭى” اتىن بەرۋ تۋرالى ماسەلەنى ءوز قولىمەن جازىپ, جوسپارعا ەنگىزگەن ەكەن. وسى جوسپارعا سايكەس شىمكەنت قالالىق ونوماستيكا كوميسسياسى ءوز ماجىلىسىندە “كول” ماڭىنداعى سكۆەردى ء“شامشى الەمى” شاعىنباعى دەپ اتاۋ تۋرالى ۇسىنىستى شىمكەنت قالالىق ءماسليحاتىنىڭ قاراۋىنا جولداپ, بۇل ماسەلە قالالىق ءماسليحاتتىڭ كەزەكتى سەسسياسىندا قارالىپ, قولداۋ تاپقان. ياعني, اسقار يسابەك ۇلىنىڭ قولعا العان يدەياسى ىسكە اسىپ, ءشامشى قالداياقوۆتىڭ ەسكەرتكىشى تۇرعىزىلدى. سونداي-اق وسى ء“شامشى الەمى” شاعىنباعىندا “جۇلدىزدار اللەياسى” اشىلىپ, وعان ەلىمىزگە بەلگىلى سازگەرلەر مەن انشىلەردىڭ اتى-ءجونى جازىلىپ, وسى اتاۋ اياسىندا دۇركىرەگەن فەستيۆال وتپەك. دەمەك, 1992 جىلى شىمكەنت قالاسىنىڭ اكىمى امالبەك تشانوۆ پەن قالالىق كەڭەستىڭ ءتوراعاسى قۋانىش تولەمەتوۆتىڭ باستاماسىمەن باستالعان ش.قالداياقوۆ اتىنداعى فەستيۆال ودان ءارى وبلىس باسشىلارىنىڭ تىڭ يدەيالارىمەن جالعاسىن تاۋىپ جاتقانى جۇرتشىلىقتى قۋانتىپ, ەلدىڭ ەلدىگىن تانىتا تۇسپەك! قابىل دۇيسەنبي, وڭتۇستىك قازاقستان وبلىستىق ونوماستيكا كوميسسياسىنىڭ حاتشىسى.
