50 ءۇيلى ەلدى مەكەننىڭ مارتەبەسىن وسىنداعى سولتۇستىك قازاقستان مال شارۋاشىلىعى عىلىمي-زەرتتەۋ ينستيتۋتى كوتەرە تۇسەتىن. ەندى, مىنە, اۋدان اكىمدىگى مەن ءماسليحاتتىڭ بىرلەسكەن شەشىمىمەن ەليتنوە سەلوسى بايتەرەك اۋىلى بولىپ وزگەرىپ, جاڭا اتاۋعا يە بولدى. بىلتىر وسى ماڭعا شەتەلدەن كەلگەن اعايىندارىمىز ءۇشىن 23 ءۇي سالىنىپ, جۇرتشىلىق اراسىندا قۇلاققا جاعىمدى ەستىلەتىن بايتەرەك اۋىلى اتانىپ كەتكەن بولاتىن. بيىل “نۇرلى كوش” مەملەكەتتىك باعدارلاماسى اياسىندا 140 ءۇيدىڭ قاداسى قاعىلىپ, رەسپۋبليكالىق قازىنادان بولىنگەن قاراجاتتىڭ 350 ميلليون تەڭگەسى يگەرىلدى. مۇندا قۇرىلىس جۇمىستارىمەن 300-گە جۋىق ادام اينالىسادى.
ءومىر ەسقالي. سولتۇستىك قازاقستان وبلىسى.
زاڭ تالاپتارى قاتاڭ قاداعالانادى
وبلىس اكىمى بولاتبەك قۋاندىقوۆتىڭ توراعالىعىمەن “باتىس ەۋروپا – باتىس قىتاي” حالىقارالىق ءدالىزى قۇرىلىسىنىڭ جۇزەگە اسىرىلۋ بارىسىنا قاتىستى كەڭەيتىلگەن ءماجىلىس وتكىزىلدى. ءماجىلىس بارىسىندا عاسىر جوباسىنا تەڭەستىرىلىپ وتىرعان حالىقارالىق ماڭىزى زور قۇرىلىستىڭ ايماقتا جۇزەگە اسىرىلۋ بارىسى جان-جاقتى تالقىلانىپ, كۇردەلى ماسەلەلەردى شەشۋدىڭ جولدارى قاراستىرىلدى. اتاپ ايتقاندا, حالىقارالىق جول قۇرىلىسىنىڭ ايماققا ءتيىستى بولىگىن سالۋشى مەردىگەر كومپانيالار تاراپىنان ورىن الىپ وتىرعان زاڭ بۇزۋشىلىقتاردى بولدىرماۋ ءتيىستى سالا باسشىلارىنا قاتاڭ تاپسىرىلدى.
ەركىن ءابىل. قىزىلوردا.
الەۋمەتتىك-كاسىپكەرلىك كورپوراتسيا قۇرىلدى
جامبىل وبلىسى اكىمدىگىنىڭ شەشىمىمەن “تاراز” الەۋمەتتىك-كاسىپكەرلىك كورپوراتسياسى” اق قۇرىلىپ, ديرەكتورلار كەڭەسىنىڭ العاشقى جينالىسى بولىپ ءوتتى. وندا كوپشىلىك داۋىسپەن ديرەكتورلار كەڭەسىنىڭ توراعالىعىنا وبلىس اكىمىنىڭ ورىنباسارى مۇراتباي جولداسباەۆ سايلاندى. “تاراز” اكك” اق قۇرۋ تۋرالى تياناقتى شەشىم “اكك “وڭتۇستىك” ۇك” اق اكتسيونەرلەرىنىڭ جالپى جينالىسىنان سوڭ, ياعني اكتيۆتەرىنىڭ ۇشتەن ءبىرىن جاڭادان قۇرىلعان كورپوراتسياعا وتكىزگەننەن كەيىن قابىلداندى. ەندى ءوزىنىڭ جەكە جارعىلىق قورى بار اق-تىڭ بىردەن-ءبىر اكتسيونەرى جامبىل وبلىسىنىڭ اكىمدىگى بولىپ تابىلادى. اكك مىندەتى – مەملەكەتتىك جانە جەكە رەسۋرستاردىڭ مۇددەلەرىن ءبىر ارناعا توعىستىرا وتىرىپ, ءوڭىردىڭ ەكونوميكالىق دامۋىنا ايتارلىقتاي ۇلەس قوسۋ.
كوسەمالى ساتتىباي ۇلى. جامبىل وبلىسى.
اۋىل جاستارى ەلدىڭ بولاشاعى ءۇشىن
قاشىر اۋدانىنىڭ ورتالىعى تەرەڭكولدە وبلىستا تۇراتىن اۋىل جاستارىنىڭ باسىن قوسقان فورۋم بولدى. بيىل ەكىنشى رەت وتكىزىلىپ وتىرعان بۇل جيىنعا ءار اۋدان, اۋىلدان تۋعان جەرى ءۇشىن اۋىلىندا قالىپ نەمەسە جوعارى وقۋ ورنىن ءبىتىرىپ كەلىپ ەڭبەك ەتىپ جۇرگەن جاستار كەلدى. فورۋمدى ەلىمىزدە قۇرىلعان “اۋىل جاستارى وداعىنىڭ” جەرگىلىكتى بولىمشەسى ۇيىمداستىرىپتى.اۋىل جاستارىنىڭ ەلدىڭ بولاشاق تىرلىگى ءۇشىن اتقاراتىن جۇمىستارىنا ساي قانداي تالاپ-تىلەكتەرى مەن ۇسىنىستارى بارىن وبلىس اكىمىنىڭ ورىنباسارى ءاليا عالىموۆا تىڭدادى. اۋىل جاستارىنا ەلدىڭ بولاشاعى ءۇشىن بىرگە بولايىق دەپ ۇندەۋ قابىلداندى. فورۋمنان سوڭ جينالعاندار اۋداندا اتقارىلىپ جاتقان جاقسى ىستەرمەن تانىستى.
فاريدا بىقاي. پاۆلودار وبلىسى.
ءداستۇرلى جەكسەنبىلىك جارمەڭكەلەر
ءۇرجار اۋدانىندا كۇز ايى باستالماي جاتىپ ءداستۇرلى جەكسەنبىلىك جارمەڭكەلەر باستالىپ كەتتى. وندا اۋىل شارۋاشىلىعى ونىمدەرى ءتۇر-تۇرىمەن مولىنان ساتىلۋدا. جانە مۇنداعى باعا بازار نارقىنان ءبىرشاما تومەن. ايتالىق, بازاردا سيىر ەتى – 650, ال كارتوپ 100 تەڭگە بولسا, جارمەڭكەدە ول تيىسىنشە – 550 جانە 30 تەڭگەدەن ساتىلۋدا. – اۋداندا مال باسىن كوبەيتۋمەن بىرگە, ءونىم ساپاسىن ارتتىرۋعا كۇش سالىپ وتىرمىز, – دەيدى اتالعان اۋدان اكىمى باۋىرجان جاناقوۆ. جارمەڭكە كۇندەرى اۋدان ونەرپازدارىنىڭ كۇشىمەن ارنايى كونتسەرتتىك باعدارلامالار ۇسىنىلۋدا. سوندىقتان جەرگىلىكتى حالىق بيىلعى جارمەڭكەگە ءدان ريزا.
داۋلەت سەيسەن ۇلى. شىعىس قازاقستان وبلىسى.
باعدارشامدار قوزعالىستى جەڭىلدەتتى
اباي شاعىن قالا بولعاندىقتان, ونداعى جول قوزعالىسىن رەتتەپ تۇرۋعا باعدارشامدار قاجەتسىنبەي كەلگەن ەدى. كەيىنگى جىلداردا كولىك كوبەيدى, شاھار ءوسىپ كەلەدى. ءومىردىڭ ءوزى ۇسىنعان تالاپقا سايكەس ورتالىق كوشەلەر تۇيىستەرىنە باعدارشامدار ورناتۋ ماسەلەسى اۋدان اكىمىنىڭ تۇرعىندارمەن جىل باسىنداعى كەزدەسۋلەرىندە كوتەرىلگەن بولاتىن. ولاردىڭ تىلەكتەرى قابىل الىنىپ, وسى ماقسات ءۇشىن جەرگىلىكتى بيۋدجەتتەن 7,6 ميلليون تەڭگە ءبولىندى. مىنە, ەندى ۇلى اقىن اتىنداعى اۋدان ورتالىعىندا باعدارشامدار جۇمىس ىستەي باستادى. سونىڭ ارقاسىندا بۇعان دەيىنگىدەي جۇرگىزۋشىلەردىڭ ءبىر-بىرىنە جول بەرمەۋى ساپ تىيىلدى. جۇرگىنشىلەردىڭ كوشەلەردى قيىپ ءوتۋى جەڭىلدەدى. اسىرەسە, وقۋشىلاردىڭ مەكتەپتەرگە بارىپ-قايتۋىنا اتا-انالار قوبالجىمايتىنداي بولدى.
ايقىن نەسىپباي. قاراعاندى وبلىسى.
ليساكوۆتىق “داڭقتىڭ ءبىر مەزەتى”
ليساكوۆ قالاسىندا جارتى جىلدان بەرى “داڭقتىڭ ءبىر مەزەتى” دۋمان-باعدارلاماسى جالعاسىپ كەلگەن بولاتىن. ونىڭ فينالىندا كورەرمەندى ونەرىمەن تاڭعالدىرعان ليساكوۆتىق انىقتالدى. باعدارلامانىڭ مارەسىندە تاڭدالىپ الىنعان 20 ونەرپاز ونەر كورسەتتى. سونىڭ اراسىندا ولگا كوۆالەۆا ليساكوۆتىقتاردى انىمەن تاڭعالدىرىپ, ءبىرىنشى ورىندى يەلەندى. مۇنان كەيىنگى جۇلدەلى ورىنداردى تسيرك ونەرىن كورسەتكەندەر مەن اككوردەوننىڭ قۇلاعىندا ويناعان مۋزىكانتتار يەلەندى. بۇل شارانى قالالىق مادەنيەت جانە تىلدەردى دامىتۋ ءبولىمى رەسەي ارناسىنا ەلىكتەپ وتكىزگەنمەن, مۇنداي بايقاۋ-دۋمان قالالىقتاردىڭ شىعارماشىلىقپەن اينالىسۋىنا ىقپال ەتەتىندىگىن ايتادى.
ءنازيرا جارىمبەتوۆا. قوستاناي وبلىسى.
