نان قىمباتتامايدى, تۇقىم بولادى

سوڭعى جىلدارى وڭىردە قۋاڭ­شى­لىق بولىپ, بار ءۇمىتىن التىن ءدان­گە جالعاعان شارۋالاردىڭ  تاۋى قايتىپ قالعان بولاتىن. ءبىر­اق, ءومىرىن جەرمەن بايلانىس­تىر­عان ديقان قاۋىمىنىڭ ءار جىلدان كۇتەرى بار ەكەنى راس. ەگىنشىلىكتىڭ تاۋەكەلدى ايماعىنا ورنالاسقان اق­تو­بەلىك ديقاندار بيىل ۇلكەن ءۇمىت­پەن ەگىس كولەمىن قىسقارتپاي,731 مىڭ گەكتار القاپقا تۇقىم سەپكەن ەدى. قىس ايلارىندا قاردىڭ از تۇسۋىنەن, ەرتە كوكتەمنەن وسى كۇنگە دەيىن ءبىر تامشى تامباعاندىقتان, ونىڭ ۇستىنە جاز بويى اپتاپ ىستىق­تىڭ بەتى قايتپاي تۇرىپ الۋى سال­دارىنان 523 مىڭ گەكتار القاپتىڭ استىعى جيناۋعا جارامسىز بولىپ, كۇيىپ كەتتى. وبلىستىڭ مارتوك, قار­عالى, ايتەكەبي جانە حرومتاۋ اۋداندارىندا عانا القاپقا كوم­باين­دار شىعارىلدى. بۇل القاپ­تار­دان ازىرگە 2,5-3 تسەنتنەر شاماسىندا استىق باستىرىلۋدا. وڭدەۋدەن كەيىنگى جالپى جيىنتىق ءونىم 72 مىڭ توننا بولادى دەگەن ءۇمىت بار. مۇ­نىڭ ءوزى  جەم مەن قاجەتتى  تۇقىمنىڭ بەلگىلى ءبىر بولىگىن قۇيىپ الۋعا عانا جەتەدى. وسىنداي جاعدايدا حالىقتىڭ بۇعان دەيىن ەلىمىز بويىنشا نان باعاسى ەڭ ارزان بولىپ كەلگەن وڭىردە قىمباتتاۋشىلىق بولماس پا ەكەن دەپ ابىرجۋى دا ورىندى. الاي­دا, جەرگىلىكتى بيلىك بۇل ماسەلەنى ەرتە باستان ويلاستىرىپ, نان ونىمدەرى باعاسىنىڭ تۇراقتى­لىعىنىڭ شارالارى الىنعانىنا سەن­دىرۋدە. وبلىستىق اۋىل شارۋا­شىلىعى باسقار­ما­سى­نىڭ باستىعى ەرسايىن اجىباەۆتىڭ ايتۋىنشا, وبلىس تۇرعىندارىنىڭ ازىق-ت ۇلىكتىك استىقتى جىلدىق تۇتىنۋ نورماسى 122 مىڭ توننا ەكەن. قا­زىرگى ۋاقىتتا وسىنشاما كولەمدەگى استىقتى ازىق-ت ۇلىك كە­لىسىم-شارت  كورپوراتسياسى وبلىسقا بولۋدە. ونىڭ 22 مىڭ تونناسى وبلىستىڭ ەلەۆاتورلارىندا ساقتاۋدا تۇرعان كورىنەدى. ال قالعانى ءبىر-ەكى اي ىشىندە استىقتى وڭىرلەردەن تا­سىپ جەتكىزىلەتىن بولادى. وسى­لاي­شا, تۇرعىنداردى ۇنمەن جانە نان ونىمدەرىمەن تۇراقتى باعا بويىنشا  كەلەر جىلدىڭ استىعىنا دەيىن قامتاماسىز ەتۋ ماسەلەسى  شەشىلدى دەۋگە بولادى. باعانى تۇراقتى ۇستاپ تۇرۋ ماقساتىندا وبلىس اكىمىمەن ازىق-ت ۇلىك كەلىسىم-شارت كورپورا­تسياسى, ۇن تارتاتىن جانە نان ونىمدەرىن شىعاراتىن كاسىپورىندار اراسىندا مەموراندۋمدارعا قول قويۋعا دايىندىقتار جاسالۋدا. سوندىقتان تۇرعىنداردىڭ نان ونىمدەرى قىمباتتايدى دەپ سەكەم­دەنۋىنە نەگىز جوق.  قالا دۇكەن­دەرىن­دەگى نان ونىمدەرىنىڭ باعاسى سول ارزان كۇيىندە قالىپ وتىر. ەندىگى ماقسات ازدى-كوپتى استىقتى ىسىراپسىز جيناپ الۋ بولماق. وبلىس اكىمى ەگىن وراعىنا قاجەتتى جانار-جاعار مايدى ارزانداتۋ ءۇشىن 70 ملن. تەڭگە ءبولدى. الداعى جىلدىڭ ەگىسىنە قاجەتتى تۇقىمدىق استىقپەن تولىق قام­تا­ماسىز ەتۋ دە ۇكىمەتتىك دەڭگەيدە شەشىلۋدە. تۇقىمدىق استىقتىڭ جەتپەيتىن بولىگىن باسقا وبلىس­تاردان جەتكىزۋ قولعا الىنۋدا. ساتىبالدى ءساۋىرباي, اقتوبە وبلىسى.