ونەردى باسەكە وسىرەدى

ەلىمىزدىڭ ونەر مەن مادەني ومىرىندە م.گوركي اتىنداعى ورىس دراما تەاترىنىڭ الار ورنى ەرەكشە. تانىمالدىلىق پەن بەدەلگە يە بولۋدىڭ تىلسىم قۇپياسىن ءبىلۋ ماقساتىندا اتالمىش تەاتر­­­دىڭ ديرەكتورى ەركىن قاسەنوۆكە جولىعىپ, اڭگىمەلەسكەن ەدىك. – ەركىن تىلەۋعازى ۇلى, اڭگىمە­مىزدى ءوزىڭىز باسقارىپ وتىرعان گور­كي اتىنداعى ورىس دراما تەات­رىنىڭ تاريحىنان باستاساق. – 1899 جىلعا دەيىن تەاتر ونەرىن جاندارىنا ازىق ەتىپ, ءار جەردە ونەر كورسەتىپ جۇرگەن شاعىن عانا جي­ھانكەز ارتىستەرگە سول كەزدەگى اقمو­لا گۋبەرنياسىنىڭ قالا بيلەۋشىلەرى تۇراقتى قويىلىمدار كورسەتۋلەرىنە مۇمكىندىك جاساۋ ءۇشىن ءبىر عيمارات ساتىپ الۋعا 100 رۋبل اقشا ءبولىپتى. ارتىستەردىڭ ونەرىنە ءتانتى بولىپ جۇرگەن كوپەس كۋبرين ورىس ونەرىن تامىرلاندىرىپ جىبەرۋدىڭ كەلەشەگى زور ەكەنىن تەرەڭ ءتۇسىنىپ, ۇلكەن ءۇم­ىت­پەن ول دا ءبىراز قاراجاتپەن مە­تسەناتتىق جاساعان كورىنەدى. وسى­لايشا ءحىح عاسىردىڭ اياعىندا قالا تەاترى مارتەبەسىن العان, بۇگىندە استانالىق اتالاتىن م.گوركي اتىنداعى ورىس دراما تەاترى سودان بەرى ءوز تۇعىرىنان تۇسكەن جوق. تەاتر 110-شى تورقالى تويىمەن جال­عاساتىن جاڭا ماۋسىمعا دايىن­دىق جۇمىستارىن باستاپ تا كەتتى. – ۇزاق جولدى باسىپ ۇلگەرگەن ونەر ورداسى بۇگىنگى كۇنى كورەر­مەندەرىن قانداي قويىلىمدارىمەن سۋسىنداتۋدا؟ – ءبىزدىڭ بۇگىنگى رەپەرتۋارىمىز جەرگىلىكتى اۆتورلارمەن بىرگە الەمدىك جانە ورىس كلاسسيكتەرىنىڭ تۋىندى­لارىمەن وتە باي, ءارى جان-جاقتى. اتاپ وتسەك, ر.وتارباەۆتىڭ “سۇلتان بەيبارىسى”, شەكسپيردىڭ “گاملە­تى”, ت.ۋيليامستىڭ “ترامۆاي جە­لانيە” اتتى دراماسى, م.بۋلگا­كوۆ­تىڭ “ماستەر ي مارگاريتاسى”, ج.كوك­تونىڭ “چەلوۆەچەسكي گو­لو­سى”, ن.گوگولدىڭ “رەۆيزورى”, ا.چە­حوۆتىڭ “يۆانوۆى”, ا.ۆامپيلوۆتىڭ “ۋتيننوي وحوتاسى” ا.تساگارەليدىڭ “حانۋماسى”, س.مروجەك پەن ج.سار­تردىڭ تۋىندىلارىمەن بىرگە ك.سەر­گيەنكو, ە.شۆارتس, گ.ساپگير سىندى اۆتورلاردىڭ شىعارمالارىنان 20-عا جۋىق جانە بالالارعا ارنالعان كۇندىزگى قويىلىمدار بار. ال وسى ماۋسىمداعى سپەكتاكلدەر ىشىنەن ەرەكشە اتاپ وتەرلىگى – بەرتولد برەحتتىڭ “ستراح ي نيششەتا ۆ ترەتەي يمپەري” اتتى قويىلىمىن ۇلى جەڭىستىڭ 65 جىلدىعىنا وراي كورەرمەنگە تارتۋ ەتتىك. فاشيزمگە قارسى شىعارمالاردى مول جازعان اقىن, دراماتۋرگ بەرتولد برەحتتىڭ بۇل شىعارماسىندا گەرمانياداعى ءفاشيزمنىڭ العاشقى وشاعى قالاي پايدا بولعانى, ەۆرەيلەردىڭ شەككەن زارداپتارى, سوعىس كەزىندەگى حالىق­تىڭ الەۋمەتتىك جاعدايى بەينەلەن­گەن. اتىلىپ, اسىلىپ, اباقتىعا قامالىپ, قۋعىنعا ءتۇسىپ, بەرەكەلەرى كەتكەن گەرمانيانىڭ ءار ايماعىن­داعى ەۆرەي وتباسىلارى مەن حالىق­تىڭ الەۋمەتتىك كۇيزەلىسىن كورە وتىرىپ, كوز الدىڭا سول ۋاقىتپەن دالمە-ءدال كەلەتىن قازاقستانداعى زۇلمات قۇرباندارى – احاڭ (احمەت بايتۇرسىنوۆ), ءاليحان, شاكارىم, ماعجان, ساكەن, بەيىمبەت, م.شو­قاي... تاعى سول سياقتى ارىستارى­مىز­دىڭ وتباسى, اعايىندارى ارا­سىن­داعى كۇيزەلىس بەلەڭ العان قاي­شىلىقتاردى كوزگە ەلەستەتۋ قيىن ەمەس... قويىلىمنىڭ تاعى ءبىر ەرەكشە­لىگى – رەجيسسەر دايىندىق بارى­سىندا ستانيسلاۆسكي جۇيەسىمەن بىرگە ەۋروپالىق قالىپقا اينالعان برەحت تاسىلدەرىن شەبەر پايدالانا بىلگەندىگى ەدى. بۇل ءوزى برەحتتىڭ نو­ۆەللالارىنان ىرىكتەلىپ قويىلعان دۇنيە دەسەك, قاسىرەتكە تولى قايعى­نىڭ تۇمانىن سەيىلتپەي اۆتور ترا­گە­ديانى قالاي الىپ شىعار ەكەن دەپ تولعانعانىمىز راس. دەگەنمەن شەت­ەلدىك رەجيسسەر ەگيشە گەۆوركيان ادام جانىنىڭ تىعىرىققا تىرەل­گەندە كەي كەزدەردە سىرت كوزگە وتە ەبەدەيسىز, ۇسقىنسىز تارتا قالۋىمەن بىرگە كۇلكىلى جاعدايدا بولاتىنىن نەمەسە قاپەلىمدە جاساعان ءىس ارەكەتى مەن ايتقان ءسوزىن قابىستىرا الماي قالاتىنىن وتە شەبەرلىكپەن ءورىپ, اكتەرلەر ارقىلى كەيىپكەر پسيحولو­گيا­سىن تاماشا سۋرەتتەۋمەن تانىلدى. – “ونەردە جوق شەكارا” دەپ ايتىپ جاتامىز. رەجيسسەرلەردى شەتەلدەن ءجيى شاقىرىپ تۇراسىزدار ما؟ – جاڭا, جوعارىدا اتاپ وتكەن ب.برەحتتىڭ “ستراح ي نيششەتا ۆ ترەتەي يمپەري” قويىلىمىنىڭ رەجيسسەرى – اۆستريالىق ەگيشە گەۆوركيان فرانتسيا, گەرمانيا, امەريكادا ءوز قويىلىمدارىمەن ىزدەنىپ جۇرگەن جاڭا بەتبۇرىستاعى زور تالابى بار جاس رەجيسسەر. ونى العاش رەت شىعارماشىلىق توپپەن تانىستىرعانىمدا, كەيبىر كانىگى اكتەرلار العاشىندا سەنىمسىزدىك تانىتقانداي بولىپ ەدى, كەيىن بىرتە-بىرتە شىعارماشىلىق ورتاعا تاستاي باتىپ, سۋداي ءسىڭىپ كەتتى. سىرتتان تەاترعا كاسىبي بىلىكتى رەجيسسەر شاقىرتۋ قاناتىن جاڭا­دان جايىپ كەلە جاتقان كەز كەلگەن جاس تەاترعا ءتان ءداستۇر. “تەاترى­مىزدىڭ ءوز رەجيسسەرى بار, سىرتتان شاقىرىپ, شىعىندانار جايىمىز جوق”, – دەپ جان-جاعىن قىمتانىپ, الەمدىك دەڭگەيدەگى ونەر يەلەرىنەن مۇلدە باس تارتاتىن, ال تەاتردى تەك وبلىستىق ءىس-شارا اياسىندا عانا تانيتىن اكىمدەر دە جوق ەمەس. قۇداي ساقتاسىن, ءبىز ونداي پىكىردەن اۋلاقپىز. سوندىقتان دا بولار, ەلىمىزدەگى تالانتتى رەجيسسەرلەرمەن قاتار حالىقارالىق دەڭگەيدەگى قويىلىمدارىمەن تانىلىپ جۇرگەن باسقا ەلدەردەن ءوز ۇسىنىستارىمەن كەلىپ جاتاتىن دوستارىمىز بارشى­لىق. رەسەي تەاترلارىندا قويىلىم­دارىمەن تانىمال بولىپ جۇرگەن ءماس­كەۋلىك ا.كونەۆسكيمەن جانە اش­حابادتىق, ورتا ازيادا شىعار­ما­شى­لىعىمەن بەدەلدى ستسەنوگراف ب.امان­ساحاتوۆپەن بىرگە قويعان ۋ.شەكس­پيردىڭ “گاملەتى”, بەلگورود­تىق ۆ.ءبوروديننىڭ ن.پتۋشكينانىڭ “براۆو, لاۋرەنتسيا!” شىعارماسى نەگىزىندە ساحنالاعان سپەكتاكلى ا.تسا­گارەليدىڭ “حانۋماسى”, ءبىش­كەكتەن شاقىرتىلعان تالانتتى جاس رەجيسسەر ن.اسانبەك پەن تەاتر سۋ­رەتشىسى يۋ.نۋرماتوۆتىڭ امە­ري­كا­نىڭ ايگىلى كلاسسيگى ت.ۋيليامس شى­عارماسى جەلىسىندە ازىرلەگەن “ترام­ۆاي جەلانيەسىن”, اقتاۋلىق رە­جيس­سەر, “تارلان” سىيلىعىنىڭ يەگەرى گ.مەرعاليەۆانىڭ “ماستەر ي مار­گاريتا” سىندى قويىلىمدارىن كو­رەرمەندەرىمىز زور ىقىلاسپەن تا­ماشالاپ ءجۇر. – شوقتىعى بيىك وسىناۋ تا­بىس­­تارىڭىزدى شەتەلدىك كورەرمەن­دەرگە تانىتۋ جاعىنان كەندە ەمەس شىعارسىزدار؟ – ارينە, جالپى ءارتىس قاۋىمدى, ونىڭ ىشىندە اكتەرلەردىڭ شەبەرلىگىن ۇنەمى شىڭداپ وتىرۋدىڭ تاعى ءبىر جولى, ول – حالىقارالىق گاسترول­دەر مەن رەسپۋبليكالىق, حالىق­ارالىق فەستيۆالدارعا قاتىسۋ. وسى ماقساتتا سوڭعى 2-3 جىلدىڭ ىشىندە تەاتر ۇجىمى گاسترولدىك ساپارمەن الماتى, وسكەمەن, قاراعاندى, چەليابى قالالارىندا, سونىمەن قاتار گرانادا (يسپانيا), سارانسك, ءماس­كەۋ, سانكت-پەتەربۋرگ, بەيجىڭ قا­لالارىندا وتكەن حالىقارالىق جانە رەسپۋبليكالىق فەستيۆالدارعا قاتىسىپ لاۋرەات اتاندى. وسىلاردىڭ ىشىندە ەكى جايعا ەرەكشە توقتالعىم كەلەدى. بەيجىڭ وليمپياداسىنان كەيىن سول قالا­داعى “ماڭگىلىك شەكسپير” حالىق­ارا­لىق تەاتر فەستيۆالىنە قازاق­ستانداعى جالپى دراما تەاترلارى تاريحىندا تۇڭعىش رەت قاتىسۋعا مۇمكىندىك العان تەك م.گوركي تەاترى بولدى. ۇلىبريتانيا, يتا­ليا, يسپانيا, پولشا, وڭتۇستىك كورەيا قاتىسقان فەستيۆالعا شەكسپيردىڭ “گاملەتىن” اپارىپ, قانجىعامىزدى مايلاپ قايتتىق. ال ەكىنشى ءبىر ءساتتى كەزەڭ ا.پۋشكيننىڭ “كامەننىي گوست” قويىلىمىمەن 2007 جىلى تەاترىمىزدىڭ شاعىن توبى تۇڭعىش رەت ەۋروپاعا جول تارتتى. ءبىز, ول جولى يۋنەسكو دەڭگەيىندە بەل­گىلەنگەن “ورىس ءتىلى جىلى” اياسىندا ليۋدميلا پۋتينانىڭ باسشىلىعى­مەن وتكىزىلگەن حالىقارالىق كون­گرەسس باعدارلاماسىنا ەنىپ, تمد ەلدەرى ىشىندە تەك ءبىزدىڭ تەاتر عانا يسپانيانىڭ گرانادا قالاسىندا وتەتىن حالىقارالىق تەاترلار فەس­تيۆالىنە قاتىسۋعا جولداما الدى. – قالا باسشىلىعى تاراپىنان قانداي كومەك كورسەتىلىپ جاتىر؟ – ارينە, قالا اكىمى ي.تاس­ما­عامبەتوۆتىڭ اتقارىپ وتىرعان جۇ­مىسى ۇشان-تەڭىز. قالاعا اكىم بولىپ كەلىسىمەن يمە­كەڭ ءبىزدىڭ تەاترعا كەلىپ, ءارتىس­تەرىمىزدىڭ مۇڭ-مۇقتاجىن تىڭدادى, سپەكتاكل­دەرىمىزدى تاماشالادى. كەزدەسۋ, پىكىر الماسۋ ناتيجەسىندە كوپتەن بەرى شە­شىمىن تاپپاعان ماسەلەلەردى تالقى­لادىق. تەاتر قىز­مەتكەرلەرىن پاتەر­مەن قامتاماسىز ەتۋدى شەشىپ بەردى. ارتىستەرىمىزدىڭ ءبىرازى پاتەر الىپ, سوڭعى 2-3 جىلدىڭ ىشىندە ءۇيلى-باراندى بولىپ جاتىر. وسىنىڭ ءبارى جانە جوعا­رىدا ايتىلىپ جات­قان شىعارماشى­لىق جەتىستىكتەرىمىز قالا باسشى­لارىنىڭ ونەرگە دەگەن ەرەكشە ىقى­لاسى, دۇرىس كوزقا­راسىنىڭ جەمىسى دەپ بىلەمىن. – ءسىز باسقارىپ وتىرعان تەات­ردىڭ رەسەيلىك تەاترلاردان ايىر­ماشىلىعى قانداي جانە ولارمەن بايلانىستارىڭىز تۋرالى ايتىپ بەرسەڭىز. – رەسەي تمد جانە بالتىق جاعالاۋى ەلدەرىندەگى ورىس تەاتر­لارىنىڭ وتپەلى كەزەڭدە جابىلىپ قالماۋىن قاتتى قاداعالادى. رەسەي اتقامىنەرلەرى مەن مەملەكەت باس­شى­لارى ء“بىر جاعادان باس, ءبىر جەڭنەن قول شىعارىپ” تەاتر قايراتكەرلەرى وداعى جانىنان ورتالىق اشتى, اسسوتسياتسيا قۇردى. 2004 جىلدان بەرى باعدارلاما جوباسى بەكىتىلىپ, جىل سايىن مول قارجىنى مەملەكەت ءوزى ءبولىپ وتىرادى. بيىل ساۋىردە سانكت-پەتەربۋرگتە “ۆسترەچا ۆ روسسي” اتتى 18 مەملە­كەتتىڭ ورىس تەاترلارى قاتىسقان بەدەلى زور حالىقارالىق فەستيۆال ءوتتى. “بالتيسكي دوم” تەاترىندا ۇيىمداستىرىلعان بۇل ءىس-شاراعا ءبىز­دىڭ تەاتر وسىمەن ەكىنشى رەت قا­تىسىپ وتىر. وسى جولى دا 35 ادام­نىڭ بارلىق شىعىندارىن ءوز موي­ىندارىمەن كوتەرىپ الدى. ءبىز ا.پ.چە­حوۆتىڭ “يۆانوۆ” اتتى پەساسىمەن باردىق. مەن “رۋس­سكي مير – ۆ پويسكاح بۋدۋ­­ششەگو” تاقى­رىبىمەن “ۇكىمەتتىك باع­دارلاما اياسىندا شەتەلدەگى وتان­داستارعا رف مەملەكەتتىك ساياساتىن تاراتۋ” عى­لىمي-پراكتيكالىق كون­فەرەنتسيا­سىنا قاتىستىم. قازاق­ستانداعى ورىس تەاترلارى جاعدايىن بايانداپ بەردىم. فەستيۆالعا قا­تىس­قان ۇجىم وزگە ەلدەردەن كەلگەن تەات­رلاردىڭ جاي-كۇيىمەن, شىعار­ما­شىلىق ورەسىمەن, تەاترلاردىڭ ۇلتتىق قۇرامىمەن تانىسىپ شىق­تى. ال ءبىز ءوز كەزەگىندە جەمىستى جۇمىس ىستەپ ءجۇر­گەنىمىزگە كوزدەرىن ايقىن جەت­كى­زىپ قايتتىق. ونداعى ۇلگى تۇتار تاعى ءبىر ءۇردىس – تەاتر ماۋسىمدارى اياقتالار شاق­تا “قولداۋ-قورعاۋ” ورتالىعىنىڭ باعدارلاماسى اياسىندا ماسكەۋ قالاسىنىڭ سىرتىنداعى دەمالىس ور­نىندا جازعى تەاتر مەكتەبىن ءوت­كى­زەدى. بۇعان تمد جانە تاعى دا باس­قا شەت ەلدەردەگى ورىس تەاترلا­رىنىڭ اربىرىنەن 35 جاسقا دەيىنگى ارتىستەردى جينايدى. جينالعان 500-700 ادامدى ءبىر اي بويى بارلىق شىعىنىن كوتەرە وتىرىپ, ساحنا ءتىلى, ساحنا قوزعالىسى, بي ساباق­تا­رىن وتكىزەدى. تانىمال اكتەرلەرمەن كەزدەسۋلەر, تەاترلارعا بارىپ سپەك­تاكلدەر قاراۋ, تالقىلاۋ دارىستەرىن جۇرگىزەدى. ماسكەۋدىڭ باستى تەاتر­لا­رىنان مىقتى رەجيسسەرلەردى جال­داپ, جاستاردى ىرىكتەيدى, توپ-توپقا ءبولىپ, لايىقتى قويىلىمدار شى­عا­رادى. قايتار كەزدەرىندە وسى قويى­­لىمداردىڭ كوشىرمەلەرىن جازبا تاباقشالارعا ءتۇسىرىپ, وزدەرىنە بە­رە­دى. باعا قويادى. ديپلوم تاپسى­رادى. ءمى­نە, ناعىز اكتەر شەبەرلىگىن شىڭ­دايتىن مەكتەپ وسى بولسا كەرەك. ال بىزدەگى مادەنيەت مينيستر­لى­گى­نىڭ ۇيىمداستىراتىن جىل سايىن­عى تەاترلار پراكتيكۋمى ءوز قاجەت­تىلىگىن جوعالتقالى قاشان. بيىل, مىسالى, تاعى دا سول جىلداعىداي وبلىس تەاترلارىنىڭ باسشىلارىن جيناپ الىپ, رەسەيدەن گ.داداميان دەگەندى شاقىرتىپ, ۇزاق-سونار لەك­تسيا وقىتتى. ت.جۇرگەنوۆ اتىنداعى ۇلتتىق ونەر اكادەمياسىنىڭ ءبىر ۇستازى قازاقستان تەاترلارىنىڭ ءوز­ەكتى ماسەلەسىنەن سىر شەرتتى, وب­لىس­تاردان كەلگەن باسشىلار پىكىر-ۇسىنىس ايتقان بولدى... جىلدا وسى. الماتىعا نە استاناعا جينالامىز. كەيىنگى جىلدارى كەيبىر وبلىس­تار­دان ءتىپتى قاتىسپايتىن بولدى. مىنە, وسى پراكتيكۋمعا جۇمسا­لاتىن قارجىنى قايتا قاراۋ كەرەك شىعار. پراكتيكۋمدا ايتىلاتىن وي, پىكىر, ۇسىنىستارىمىزدى مينيستر­لىكتىڭ القا ماجىلىسىندە كوتەرۋ كە­رەك. ول پروتوكولعا ەنىپ, ناتيجە بەرەتىن ءىس-شاراعا, نورماتيۆتىك قۇ­جاتتارعا اينالۋ كەرەك. ال مەنىڭ ايتىپ وتىرعانىم بولەك. جاستاردى كاسىبي شىڭداۋ باعدارلاماسىن مەملەكەت ءوز قولىنا الۋى كەرەك. ءبىر­لى-جارىم لاۋرەات اتانعان, ديپ­لوم اكەلگەن جەتىستىككە بوركىمىزدى اسپانعا اتا بەرۋدىڭ قاجەتى جوق. تەاتر وزەگى اكتەر ەمەس پە؟ كەيدە ءتىپتى, شەبەردىڭ وزىنەن ءتالىم العان ادامنىڭ ءوزى تەاترعا بارا سالا تو­قىراۋعا ۇشىرايدى. سوندىقتان ونەردىڭ باسەكە ەكەنىن ەش ەستەن شى­عارماعان ابزال. رەسپۋبليكالىق تەاتر­لار مەكتەبى, مول تاجىريبەسى بار ە.وباەۆ, ە.تاپەنوۆ, ە. ورا­زىم­بەتوۆ, ت.تەمەنوۆ, م.احمانوۆ, ق.قا­سىموۆ, گ.مەرعاليەۆا سىندى رەجيسسەرلەردىڭ كلاسىن جاز ايىندا الماتىنىڭ ماڭىنداعى ءبىر دەمالىس ۇيىندە ۇيىمداستىرىپ, ءار تەاتردان بولاشاعى بار جاستاردى جيناسا, بىزدە دە جاسىنداي جارقىرايتىن ونەر جۇلدىزدارى شىعارىنا كۇما­نىم جوق. ت.جۇرگەنوۆ اتىنداعى ونەر اكادەمياسىنان د. تۇران­قۇ­لوۆا, م.ءاب­زەلباەۆ, م.بايسەركەنوۆ ا.قۇل­­باەۆ سىندى بىلىكتى ۇستازدار ءدارىس وتكىزسە, تىپتەن قۇبا-قۇپ. – ءسىزدى كوپشىلىك, كەزىندە “قا­زاق ءتىلى” قوعامىنىڭ پاتريوتى رەتىندە تانىعان ەكەن. بىزدە 1990 جىلدار­دىڭ باسىندا الماتىداعى كوپتەگەن قازاق بالاباقشالارى مەن قازاق مەكتەپتەرىنىڭ اشىلۋىنا ىقپال ەتكەنىڭىزدەن حاباردارمىز. مەم­لەكەتتىك ءتىل پاتريوتى بولۋ ءۇشىن ەڭ الدىمەن, ادامعا قانداي قا­سيەتتەر قاجەت؟ بۇگىن وسى ءىستى جالعاستىرىپ ءجۇرسىز بە؟ – مەن قازاق مەكتەبىن ءبىتىرىپ, باسقا ۇلت وكىلدەرىمەن ەتەنە ارا­لاسپاي ءوستىم. ونەر ينستيتۋتىندا دا قازاقشا وقىدىم. ورىسشا بىلمە­گەن­دىگىمدى كەزىندە ءوز باۋىرلارىم بەت­كە سالىق, ارعا ۇيات ەتىپ تاڭدى. قا­­زاقتىڭ تۇڭعىش كاسىبي رەجيسسەرى اس­قار توقپانوۆ, ۇستازدارىم م.باي­­س­ەركەنوۆ, ر.قانىباەۆا سي­ياقتى ۇلت ونەرىن بارىنەن جوعارى قويا­­تىن دارابوز تۇلعالاردىڭ جا­لىن­دى ويلارى مەنى قايتا شيراتا ءتۇستى. قازاق تەاترىندا جۇمىس ىستەي ءجۇرىپ, كوپ نارسە ۇيرەندىم. ەندى “قا­زاق ءتىلى” قوعامىنا مەن بارما­عان­دا كىم بارادى. “قازاق ءتىلى” قو­عامىنىڭ العاشقى قارلىعاشتا­رى­نىڭ ءبىرى بولىپ, جان سالىپ قىزمەت ىستەدىم. الماتىدا 90-شى جىلدان بەرگى اشىلعان قازاقشا مەكتەپ, بالا­باق­شا, سونىمەن بىرگە مەكەمە, وقۋ ور­ىندارىنان “قازاق ءتىلىنىڭ” باستاۋ­ىش ۇيىمدارىن اشۋ جولىندا كوپ ءىس اتقاردىق. كەيىننەن دە مادەنيەت, ونەر, اقپارات سالاسىنداعى مەملە­كەتتىك جۇمىستاردى اتقارا ءجۇرىپ, ءتىل ساياساتىنان ەشقاشان الىستاعان جوقپىن. ماقسات قازاقستانداعى تەاتر ونە­رى سالاسىندا 110 جىلدىق تا­ري­حى بار م.گوركي اتىنداعى ورىس دراما تەاترى ۇجىمىمەن بىرگە, وسى ەلدىڭ ابىرويىن كوتەرىپ اي­تۋلى تەاترلاردىڭ الدىڭعى قاتا­رىندا بولساق دەيمىز. اۋىلدا تۋ­ىپ-وسكەن قازاقتىڭ قاراپايىم قا­را بالاسىنا استانالىق ورىس دراما تەاترىنىڭ تىزگىنىن ۇستاۋ باقىتى بۇيىرسا, وسى­ناۋ جاۋاپتى قىزمەتتى ءمىنسىز ات­قا­رۋدا ازامات­تىڭ الدىندا اسقارالى مىندەت تۇراتىنى ايقىن عوي. اڭگىمەلەسكەن اراي ۇيرەنىشبەكقىزى.