ساسقانى ما, سالبىراعانى ما؟

گازەتىمىزدىڭ تىلشىلەر قوسىنىنا پەترو­پاۆل قالا­سىنىڭ تۇرعىنى س. مۇستافينا تەلەفون  ارقىلى حابارلاسىپ, قالاعا كىرە بەرىس توعىز جولدىڭ تورا­بىندا ادام سەنگىسىز  جارنامانىڭ ءىلىنىپ تۇرعانىن جەت­كىز­دى. باردىق. كوردىك. جۇرتشىلىق ءارلى-بەرلى كوپ قاتىنايتىن مامليۋت تاس جولى بويىندا  “رەسەيگە قوش كەلدىڭىزدەر!” دەگەن جارنامالىق بيلبورد “مەنى كوردىڭدەر مە؟” دەگەندەي,  اسپانمەن تالاسا اسقاقتاپ تۇر.  ءىرى ارىپتەرمەن ورنەكتەلىپ, نازاردى ەرىكسىز اۋ­دارتادى. اي-كۇننىڭ امانىندا قازاقستان مەن رەسەيدى شاتاستىرىپ العان كىم ەكەن دەپ ىزدەۋ سالدىق. سويتسەك, ەلدى الاتايداي شاپقىنعا تۇسىرگەن  “ارحستروي” جشس بولىپ شىقتى. اگەنتتىك باسشى­لارى باننەر سىزبا جوباسىنىڭ الماتىداعى باس كومپانيادا بەكىتىلگەنىن, وزگەرتۋگە قۇقىقتارى جوعىن ايتىپ زار يلەگەنىمەن, ىشكى ساياسات ءبولىمىن يلاندىرا المادى.  كەيىن انىقتالعانداي,  مادەنيەت جانە ءتىل­دەردى دامىتۋ بولىمىنەن جازۋلاردىڭ زاڭ تالاپتارىنا سايكەستىگىنە عانا كەلىسىم الىپ, رەسەيلىك بانك فيليالى جانىنا ىلەمىز دەگەن ۋادەلەرىنەن تايقىپ شىعا كەلگەن. وسىلايشا زاڭسىز ءىس-ارەكەتتەرگە توسقاۋىل قويىلىپ, سوراقى جارناما الىنىپ تاستالدى. ءتىلشى تۇسىنىكتەمەسى: پەتروپاۆل قالالىق ىشكى ساياسات ءبولىمى  مۇددەلى مەكەمە-ۇيىمدارمەن بىرلەسە وتىرىپ جارنامالاردى, حابارلاندىرۋلاردى, ماڭداي­شا­داعى جازۋلار مەن اتاۋلاردى, باسقا دا كورنەكى اقپاراتتاردى بىرىزگە ءتۇسىرۋ, مەملەكەتتىك تىلدە جانە ساياسي جاعىنان دۇرىس جازىلۋىن قاداعالاۋ ماقساتى­مەن تەكسەرۋ رەيدتەر جۇرگىزۋدى  قولعا الدى. بۇل—وتە قۇپتار­لىق شارا. ويتكەنى, وبلىس ورتالىعىندا باسقا تىلدەگى جازۋلاردان ءالى دە كوز  سۇرىنەدى. وسىنداي كەلەڭسىز­دىكتەرگە توقتاۋ سالماسا, مەملەكەتتىك تىلىمىزگە شەكەسىنەن قاراي­تىن­داردىڭ قاتارى ازايادى دەگەنگە  سەنۋ قيىن. ەندى مىنا “قىزىقتى” قاراڭىز. ورنى  ۇڭىرەيىپ, بوس قالعان باننەردە “1941-1945” دەگەن جازۋ پايدا بولىپتى. بەزەندىرىلۋى مەن ساپاسىنىڭ تومەندىگىنە قاراعاندا,  كورنەكى جارناما پايدا كوزىنە اينالىپ كەتكەن سەكىلدى. الدە ۇلى جەڭىس  مەرەكەسى ەستەرىنە ەندى عانا ءتۇستى مە ەكەن؟ ءومىر ەسقالي, پەتروپاۆل.