كحدر-دىڭ شەكارا ايماعىندا ارتيللەريادان وق اتقانىنا بايلانىستى وڭتۇستىك كورەيانىڭ پرەزيدەنتى لي م¿ن باك اسكەري ارانداتۋشىلىقتان باس تارتىپ, ەكى مەملەكەتتىڭ دە وركەندەۋى ءۇشىن ەكونوميكالىق بايلانىستى قايتا جالعاستىرۋعا, ۇلتتىق بىرىگۋگە شاقىرعان مالىمدەمە جاسادى. كحدر بۇدان كەيىن سەۋلدىڭ اقش-پەن بىرىگىپ وتكىزگەن جاتتىعۋى ءۇشىن ءالى يادرولىق جازا تارتاسىڭدار دەپ قورقىتتى.
سەرتتەن تايعان كىم؟
كرەملدەگىلەر بەلورۋسسيا پرەزيدەنتى الەكساندر لۋكاشەنكونىڭ ابحازيا مەن وڭتۇستىك وسەتيانى تانۋ جونىندە ۋادەسى بولعانىن ايعاقتايتىن ستەنوگرافيانى تاپقاندارىن جانە ونى جاريالايتىن نيەتتەرى بارلىعىن ايتقاندا, بەلارۋس باسشىسى تىم قاتتى كەتتى. رەسەي پرەزيدەنتى دميتري مەدۆەدەۆكە ۇياتتى ۇمىتپاڭدار, ءسوزدى بۇرمالاماڭدار, دەدى. مۇنداي ىرىڭ-جىرىڭ ايتىس, ۇساقتىق ەكى جاققا دا جاراسپايدى-اق.
قۇبىردى جاردى
يراك مۇنايىن تۇركياعا جەتكىزەتىن كيركۋك-جەيھان قۇبىرىندا جارىلىس بولىپ, ول ءبىراز ۋاقىتقا ىستەن شىقتى. تۇرىك ۇكىمەتى بۇل ارەكەتتى كۋردستان جۇمىسشى پارتياسىنان كورىپ وتىر. قالاي بولعاندا دا, ونىڭ ساياسي استارى بارى انىق. بۇل قۇبىر ارقىلى, سونداي-اق باكۋ-جەيھان قۇبىرى ارقىلى دا باتىس ەلدەرىنە مۇناي جەتكىزىلەدى. تۇركيانىڭ مۇناي تاسىمالداۋشى رەتىندەگى بەدەلىنە ايتارلىقتاي نۇقسان كەلەتىنى ءوز الدىنا, ەندى بۇل ەلدەگى كۋرد ماسەلەسى بۇرىنعىدان دا شيەلەنىسە ءتۇسۋ قاۋپى بار.
ادەپتى بىلمەيتىندەر
يراننىڭ ۆيتسە-پرەزيدەنتى مۋحاممەد-رەزا ءراحيميدىڭ اعىلشىنداردى “مافيا باسقاراتىن ناقۇرىستار توبىرى” دەپ اتاعانىن بريتانيا سىرتقى ىستەر مينيسترلىگى قاتتى ايىپتاپ, بۇل بريتاندىقتاردى قورلاعاندىق دەپ مالىمدەدى. ادەپتەن, اسىرەسە, ديپلوماتيالىق ادەپتەن وزباۋ وركەنيەتتى ەلدەرگە ءتان. يران باسشىلىعى مۇنى بىلۋگە ءتيىس قوي دەيسىڭ.
كرەست ءۇشىن داۋ
ۆارشاۆاداعى پرەزيدەنت سارايىنىڭ الدىندا مىڭداعان ادام قاتىسقان ميتينگ بولدى. ولار سول ساراي الدىنداعى الاڭداعى پرەزيدەنت لەح كاچينسكيدىڭ قۇرمەتىنە قويىلعان اعاش كرەستى الىپ تاستاۋدى تالاپ ەتۋدە. ولار مەملەكەت زايىرلى, كرەستىڭ ورنى شىركەۋ دەيدى. بۇعان قارسىلار دا الاڭعا شىعىپ, كرەستكە تيۋشىلىكتى كۇپىرلىك سانايتىندارىن مالىمدەدى. قارسىلاستاردى اجىراتۋعا پوليتسيا ارالاسۋعا ءماجبۇر بولعان. ۇشاق اپاتىنان قايعىلى قازاعا ۇشىراعان لەح كاچينسكيدى كراكوۆتاعى ۇلىلار قورىمىنا جەرلەگەندى دە ءبىراز جۇرت ارتىق كورگەن.
كەزەكتى ساندىراق
رەسەي فەدەراتسياسى مەملەكەتتىك دۋماسىنىڭ ۆيتسە-سپيكەرى ۆلاديمير جيرينوۆسكي اقىلعا سىيا قويمايتىن كەزەكتى مالىمدەمەسىن جاسادى. رەسەي بەلورۋسسياعا, باسقالارعا دا كومەك بەرمەۋگە ءتيىس دەپ بايبالام سالعان ول, قىزا كەلە, كەدەن وداعى دا كەرەك ەمەس دەگەندى ايتتى. رەسەيدىڭ رەسمي قايراتكەرى سانالاتىن وعان مۇنىڭ ورىنسىز عوي, اقىلعا سىيمايدى, ەلدىڭ ساياساتىنا قايشى دەيتىن دە ەشكىم جوق. كەيدە وسىنداي ساندىراقتى وعان ادەيى ايتقىزاتىنداي كورىنەدى.
س-300 – ابحازيادا
رەسەيدىڭ اتىشۋلى س-300 زەنيتتى زىمىراندىق جۇيەسى ابحازيا رەسپۋبليكاسىنىڭ اۋماعىنا ورنالاستىرىلدى. رف اسكەري-اۋە كۇشتەرىنىڭ قولباسشىسى الەكساندر زەليننىڭ مالىمدەۋىنشە, بۇل جۇيە وسىنداعى رەسەيلىك اسكەري بازا مەن رەسپۋبليكا اۋماعىن قورعاۋعا ارنالعان كورىنەدى. مۇنى رەسەيدىڭ ميليتاريستىك ساياساتىنىڭ ءبىر كورىنىسى دەپ تۇجىرىمداۋعا بولعانداي.
قالدىقتار – رەسەيگە
گەرمانيا وزىندەگى راديواكتيۆتى قالدىقتاردى بالتىق تەڭىزى ارقىلى رەسەيگە جىبەرەتىنى ايقىندالىپ وتىر. وعان 12,8 ميلليون دوللار قارجى تولەنبەك. قالدىق دەگەندە, 1957 جىلى كسرو-نىڭ ارالاسۋىمەن سالىنعان, 1991 جىلى جۇمىسىن توقتاتقان يادرولىق زەرتتەۋ رەاكتورىندا پايدالانىلعان 951 وتىندىق وزەك كورىنەدى. ونى رەسەيگە جەتكىزۋگە ءۇش كەمە كەرەك ەكەن.
داڭعويلىق باسەكەسى
فينندەردىڭ حەينولا قالاسىندا ساۋنا بويىنشا الەم بىرىنشىلىگىندە رەسەيلىك ۆلاديمير لادىجەنسكي قازا تاپتى. فينن تيمو كاۋكەنەن ەكەۋى 110 گرادۋستىق ىستىقتا التى مينوتتەي وتىرعاننان كەيىن, رەسەيلىك جان تاپسىرىپتى, فينن اسا اۋىر جاعدايدا اۋرۋحاناعا ءتۇسىپتى. سپورتتىڭ باسقا تۇرىنەن دە ادامدار قازا تاۋىپ جاتادى عوي, بىراق ساۋنا جارىسىن اقىلعا سىيدىرۋ قيىن. سىرا ىشۋدەن, ەت جەۋدەن دە جارىسىپ, جۇرتتىڭ اقىماق بولىپ جاتاتىنى بار, بىراق وتقا ءتۇسىپ جارىسۋ, ءسىرا, داڭعويلىقتىڭ شەگى بولار.
ازىرلەگەن ماماديار جاقىپ.
