ورماندى قاساقانا ورتەۋشىلەر بار

كەشە پرەمەر-ءمينيستردىڭ ءبىرىنشى ورىنباسارى ومىرزاق شوكەەۆتىڭ توراعالىعىمەن ۇكىمەتتە سەلەكتورلىق كەڭەس بولىپ ءوتتى. وندا ەلىمىزدىڭ وڭىرلەرىندە ورتكە قارسى كۇرەس شارالارى جانە بيىلعى كەيبىر وڭىرلەردەگى قۇرعاقشىلىق جاعدايىنا بايلانىستى نان باعاسىن تۇراقتاندىرۋ ماسەلەلەرى قارالدى. كۇن تارتىبىندەگى ءبىرىنشى ماسەلە بويىنشا بايانداما جاساعان اۋىل شارۋاشىلىعى مينيسترلىگىنىڭ ورمان جانە اڭ شارۋاشىلىعى كوميتەتىنىڭ توراعاسى ەرلان نىسانباەۆتىڭ ايتۋىنشا, سوڭعى اپتادا ەلىمىزدە 26 ورمان جانە 56 دالا ءورتى ورىن العان. وسى ماسەلەگە ارنالعان وتكەن سەلەكتورلىق كەڭەستەن كەيىن بارلىق وبلىس اكىمدىكتەرىندە ورتكە قارسى كۇرەس شتابتارى قۇرىلعان. جەر-جەرلەردە ورمان القاپتارى مەن ءورت قاۋپى بار دالالىق ايماقتاردى جان-جاقتى باقىلاۋ جانە تەكسەرۋ جۇمىستارى قولعا الىنعان. رەسپۋبليكالىق شتابتىڭ تىكەلەي باستاماسىمەن بارلىق وڭىرلەردەگى ورمان شارۋا­شى­لىقتارىنىڭ ورتكە قارسى دايىن­دىعى تەكسەرىلىپ, قولدا بار تەح­نيكالاردىڭ ەسەبى جاسالدى. ەلىمىزدىڭ بارلىق وڭىرلەرىندە ءورت اپاتىنىڭ الدىن الۋعا بايلانىستى جان-جاقتى شارالار جۇزەگە اسى­رىلۋدا. سولاي بولا تۇرسا دا, ءورت وقي­عالارىن مۇلدە بولدىرماۋدىڭ ورايى كەلمەي  تۇر. ءتىپتى ورمان القاپ­تارىن قاساقانا ورتەۋ وقيعا­لارى دا ورىن الۋدا. ماسەلەن, 10 تامىز كۇنى “ەرتىس ورمانى” ورمان شارۋاشىلىعىنىڭ ايماعىندا 5 رەت قاساقانا ءورت قويۋ وقيعاسى ءتىر­كەلگەن. اپات كەسىرىنەن وڭاي پايدا تۇسىرگىسى كەلگەن قاسكوي ورمان القا­بىنىڭ ءار جەرىنە وت قويىپ جۇرگەن جەرىندە كوزگە ءتۇستى. اۋىل شارۋاشىلىعى مينيستر­لىگىنىڭ جاۋاپتى حاتشىسى ەۆگەني اماننىڭ مالىمدەۋىنشە, بيىلعى جىلعى اۋا رايىنىڭ جاعدايىنا بايلانىستى ەگىننىڭ ءپىسۋى ادەتتەگى­دەن 10-15 كۇن بۇرىن بولدى. سوعان بايلانىستى ەلىمىزدە ەگىن وراعى ەرتە باستالعان. قازىرگى احۋال بوي­ىن­شا, ەلىمىزدىڭ نەگىزگى استىقتى اي­ماقتارىندا قۋانشىلىققا قاراماس­تان ءبىرشاما ءتاۋىر استىق جينالۋدا. وسىعان بايلانىستى ەلىمىزدىڭ ىشكى قاجەتتىگىن تولىق قامتاماسىز ەتۋگە جانە ەكسپورتتىق الەۋەتىن ساقتاۋعا جەتەتىن استىق جينالادى. ەندەشە, بارلىق وڭىرلەردە نان باعاسىنىڭ قىمباتتاۋىنا ەشبىر نەگىز جوق. قازىر مەملەكەتتىك قوردا 1 ميلليون توننادان ارتىق استىق ساقتالعان. ازىق-ت ۇلىك كەلىسىم-شارت كورپوراتسيا­سى تاعى دا 2 ميلليون توننا استىق ساتىپ الۋ جونىندە شارت جاساستى. ەلىمىزدىڭ ىشكى قاجەتىن وتەۋ ءۇشىن بارلىعى 3 ميلليون 400 مىڭ توننا استىق قاجەت. قۇرعاقشىلىققا ۇشى­راعان باتىس وڭىرلەردىڭ اكىمدىكتەرى استىقتى ايماقتىڭ وكىلدەرىمەن مەموراندۋم جاساسىپ, وزدەرىنە قاجەتتى ۇن قورىن جاساۋعا ءتيىس. تاعى ءبىر ايتا كەتەتىن ماسەلە, بۇگىنگى ىشكى رىنوكتاعى نان باعاسى, استىق جانە ۇن باعاسى قازىرگىدەن 2-3 ەسە جوعارى بولىپ تۇرعان 2008 جىلى بەلگىلەنگەن باعا بولاتىن. ودان كەيىنگى كەزەڭدە استىق جانە ۇن باعاسى ارزانداسا دا, نان باعاسى سول دەڭگەيدە قالدى. ياعني نان زاۋ­ىتتارى مەن ناۋبايحانالار ونداعان ەسە پايدامەن جۇمىس ىستەپ كەلدى. مەملەكەت قورىنداعى بەلگىلەنگەن باعامەن بوساتىلاتىن ۇن قورى نان باعاسىنىڭ الداعى ۋاقىتتا دا ەشبىر وزگەرىسكە ۇشىراماۋىنا تولىق مۇمكىندىك بەرەدى. سەلەكتورلىق كەڭەستى قورىتىن­دى­لاي كەلىپ, ومىرزاق شوكەەۆ ءوڭىر­لەردەگى ءورت قاۋپىنىڭ الدىن الۋعا وسى مىندەت جۇكتەلگەن اكىمنىڭ ورىن­باسارلارى تىكەلەي جاۋاپتى ەكەندىگىن اتاپ كورسەتتى. سونىمەن بىرگە ول ءتيىستى ورتالىق ورگاندار  مەن وبلىس اكىمدىكتەرىنىڭ ىشكى رىنوكتاعى ۇن جانە نان باعاسىن تۇراقتاندىرۋ ءۇشىن قولدان كەلگەن­نىڭ ءبارىن جاساۋعا مىندەتتى ەكەندىگىن قاتاڭ ەسكەرتتى. جىلقىباي جاعىپار ۇلى.