كوگىلدىر بايراعىمىز بەن ءانۇرانىمىز كوك كۇمبەزىندە ەركىن قالىقتاعان قازىرگى كەزدە حالقىمىز ەلى مەن جەرىنىڭ بولاشاعىن ەلباسىنىڭ سارابدال ساياساتىمەن بايلانىستىرىپ, الەمنىڭ بارشا مەملەكەتتەرىن تىتىرەنتكەن قارجى داعدارىسىنىڭ سالدارىنا قايىسپاس قايسارلىقتارىن قارسى قويىپ, بيىك بەلەستەردى باعىندىرۋمەن كەلەدى. وسىنداي ساتتەردە ءومىر بولعان سوڭ كەزدەيسوق اپاتتار ورىن الىپ, قيىندىق الدان شىعاتىنى بار. اقسۋ اۋدانىنىڭ قىزىلاعاش اۋىلىنداعى بيىلعى سۋ تاسقىنى ەلدى مەكەن حالقىنا كۇتپەگەن جەردەن قاسىرەت اكەلدى. ادامدار وپات بولىپ, جۇرت باسپانالارىنان ايىرىلدى. مىنە, بۇل جاعدايعا بارشا قازاقستاندىقتاردىڭ قابىرعاسى قايىسىپ, ەجەلگى جومارت پەيىلىنەن اينىماي, قولداعى بارىن بەرىپ, ىستىق ىقىلاستارىن ءبىلدىردى. قىزىلاعاشتىقتار قيىندىقتا جالعىز قالمايتىنىن تانىتىپ, ەلىمىزدىڭ بارشا ادامدارى قايىرىمدىلىق كورسەتۋدەن شەت قالماي, جۇدىرىقتاي جۇمىلدى.
كوپتىڭ ءىسى قاشاندا بەرەكەلى بولعان عوي. جەرمەن-جەكسەن بولعان ءبۇتىن ءبىر اۋىل قىسقا مەرزىمدە ەرتەگىدەي جاڭارىپ شىعا كەلدى. وسىنىڭ ءوزى-اق ەلىمىزدەگى كوپ ەتنوستى حالىقتىڭ ىنتىماعى مەن بىرلىگىن, دوستىق نيەتىن دالەلدەدى. قانداي قيىن جاعدايدا بولسىن بىرلىكتىڭ جەڭبەيتىنى جوق ەكەنىن كورسەتتى. وسىلايشا بەرەكەلى ەلدىڭ بەتىن ەشكىم قاقپايتىن جاقسى قاسيەت ورنىعۋىمەن ەرەكشەلەندى.
قىزىلاعاشتىقتار بۇگىنگى كۇنى كورگەن قيىندىقتارىن ۇمىتىپ, ەرتەڭگى كۇنگە دەگەن سەنىمدەرىن نىعايتۋدا. ساۋلەتتى ەلدى مەكەندەگى اتقارىلعان جۇمىس “كەڭەسىپ ءىس باسقارۋ – كەلەلى ەلدىڭ بەلگىسى, جۇمىلا جۇمىس اتقارۋ – ورەلى ەلدىڭ بەلگىسى” دەگەن حالقىمىزدىڭ جاقسى ءسوزىنىڭ شىندىعى جاڭا قىرىنان جارقىراي تانىلدى.
اۋىل تۇرعىندارى ەلباسىمەن كەزدەسۋى كەزىندە دە ەلدىڭ بەرەكە, بىرلىگى, ىنتىماعى جايلى ايتىپ, الداعى كۇندەرگە دەگەن ۇمتىلىس ايقىن كورىنىس بەردى.
بيىل بۇكىل رەسپۋبليكانى ابىگەرگە سالعان سۋ تاسقىنىنان كەيىنگى لاي كوشكىنىنە كومىلگەن قىزىلاعاش بار-جوعى ءتورت ايدا جاڭارىپ, جاساردى. ەلدى مەكەن تۇرعىندارى باستارىنا قيىندىق تۋعان ساتتەگى ەلباسى نۇرسۇلتان نازارباەۆ پەن قازاقستاندىقتاردىڭ قامقورلىق قولداۋىن ەشقاشان ۇمىتپايدى. وبلىس باسشىسى سەرىك ۇمبەتوۆ قيىن-قىستاۋ كەزدە قۋانىشتى كۇندەردىڭ كوپ كۇتتىرمەيتىنىن, ونى جاقىنداتۋعا بۇكىل حالىق بولىپ اتسالىساتىنىن ايتقان ەدى. ءسوز بەن ءىستىڭ اراسىندا الشاقتىق بولمادى. شىلدەنىڭ سوڭىندا سوڭعى قونىستويلارى وتسە, كۇردەلى جوندەۋ جۇرگىزىلىپ, مۇلدە جاڭارعان ورتا مەكتەپ پەن ەمحانا, پوليتسيانىڭ تىرەك قوسىنى, مادەنيەت ءۇيى, ءۇش قاباتتى ەسكى مەكتەپ-ينتەرنات سابيلەرگە لايىقتالىپ, قايتا جاسالىپ, بالاباقشا بولىپ اشىلۋىن اتا-انالار قۋانىشپەن قابىلدادى.
قامىس پەن سامان كىرپىشتەن سالىنعان ەسكى ۇيلەردىڭ ورنىنا سىمباتى مەن سالتاناتى كەلىسكەن, سوڭعى قۇرىلىس ماتەريالدارى پايدالانىلىپ سالىنعان ساۋلەتتى ۇيلەر كىمدى بولسا دا ريزاشىلىققا بولەيدى. كوشەلەر رەتتەلىپ, باق وتىرعىزىلىپ, جولدار اسفالتتالدى. كوشەلەردەگى ارىقتاردا سۋ سىلدىراپ اعىپ جاتىر. ءار ۇيگە اۋىز سۋ جەتكىزىلدى. اۋىلعا كىرگەننەن-اق شاتىرلارى كۇنمەن شاعىلىسقان, جاسىل جەلەك كومكەرگەن قىزىلاعاش كوزگە وتتاي باسىلادى. كەشەگى جابىرقاعان كوڭىل, مۇڭايعان جۇزدەرگە قۋانىش ءۇيىرىلدى.
ءىلياس جانسۇگىروۆ اتىنداعى ورتا مەكتەپكە كەلگەن نۇرسۇلتان ءابىش ۇلىن ءبىلىم شاڭىراعىنداعى ۇستازدار ۇلكەن قوشەمەتپەن قارسى الدى. وسى جەردە وبلىس اكىمىنىڭ ءبىرىنشى ورىنباسارى اماندىق باتالوۆ جانە توتەنشە جاعدايلار ءمينيسترى ۆلاديمير بوجكو تاسقىننان كەيىنگى قىزىلاعاش اۋىلىن قالپىنا كەلتىرۋ جۇمىستارى جانە جالپى تۇسكەن قارجى مەن گۋمانيتارلىق كومەك, اۋىلدىڭ باس جوسپارى تۋرالى ماعلۇمات بەردى. ەلباسى ءبىلىم شاڭىراعىنداعى ورىس ءتىلى مەن باستاۋىش سىنىپ, مۋلتيمەديا, ماتەماتيكا كابينەتتەرىنىڭ جابدىقتالۋىن كوردى. ءبىلىم شاڭىراعىنداعى وقۋ كورپۋستارىنا قوسىمشا ءبىر قاباتتى وقۋ ورنى مەن قازاندىق جوندەلىپ, جاڭالانىپتى. سونداي-اق فيزيكا, بيولوگيا, حيميا, ينفورماتيكا, ساز كابينەتتەرى وسى زامانعى وقىتۋ قۇرالدارىمەن تولىق قامتىلىپتى. بۇرىن تەحنولوگيا ساباعىنا ارنالعان كابينەت بولماسا, قازىر جاس شەبەرلەرگە ارنالعان ارنايى سىنىپ اشىلعان. جاڭالانعان سپورت زالى مەن جيىنجاي وقۋشىلار مەن ۇستازداردىڭ كوڭىلىنەن شىققانى ولاردىڭ جۇزدەرىنەن بايقالدى.
مەكتەپتى تاسقىننان كەيىن قالپىنا كەلتىرۋ جۇمىستارىنىڭ جوباسىن “ارلان” جاۋاپكەرشىلىگى شەكتەۋلى سەرىكتەستىگى جاساسا, قالپىنا كەلتىرۋدى “اسك اۋىلقۇرىلىس” ۇجىمى قولعا الىپ, عيماراتتىڭ ىرگەتاسىن قايتا نىعايتۋ, قابىرعالارىنىڭ ءىشى مەن سىرتىنىڭ سىلاعىن قىرىپ, سىرلاۋ, ارلەۋ جۇمىستارى قوماقتى قارجى مەن كوپ كۇش جۇمساۋ ءناتيجەسىندە ساۋلەتتى عيماراتقا اينالعان. وسىلايشا كۇردەلى جوندەۋگە بولىنگەن 226 ملن. تەڭگە بەلگىلەنگەن مەرزىمدە ءتيىمدى يگەرىلىپ, شىلدەنىڭ سوڭىنا شارۋانى تياناقتاعان قۇرىلىسشىلار مەكتەپتى پايدالانۋعا بەردى. مەكتەپ اۋماعى تولىقتاي اباتتاندىرىلىپ, گۇلزارلارمەن كومكەرىلدى. مەكتەپ جانىنداعى اشىق الاڭدا باسكەتبول, ۆولەيبول, فۋتبول الاڭدارى جاسالدى. بۇگىن اتقارىلعان جۇمىستارعا كوڭىل تولادى.
كەڭەستەر وداعى كەزىندە مۇندا سابيلەر مەكەنى بولماپتى. مەكتەپكە دەيىنگى بالالار مەكەمەسى جەكەشەلەندىرۋ كەزىندە قولدان-قولعا اۋىسىپ, جۇمىسىن توقتاتقان ەكەن. تاسقىننان كەيىنگى اۋىلدى قالپىنا كەلتىرۋ جۇمىستارى باستالعاندا وسى ماسەلەگە كوڭىل بولگەن وبلىس باسشىلىعى جەرگىلىكتى تۇرعىنداردىڭ بالاباقشا جايلى ۇسىنىستارىن قولداعان ەدى. ناتيجەسىندە قاراۋسىز قالعان ءۇش قاباتتى مەكتەپ-ينتەرنات ءۇيىنىڭ ەكى قاباتى بالاباقشاعا, ءۇشىنشى قاباتى جاس ماماندارعا باسپانا رەتىندە قايتا جاسالدى. وسى ماقساتقا بيۋدجەتتەن 180 ملن. تەڭگە بولىنگەن. عيماراتتىڭ تومەنگى ەكى قاباتىنداعى “نۇرشۋاقتا” التى توپقا لايىقتالىپ جاسالعان بالاباقشادا ساز ساباعىنا ارنالعان بولمە, مەديتسينالىق كابينەتتەر, اسحانا, كىر جۋاتىن ورىن, تۇرمىستىق قىزمەت كورسەتۋ جانە اكىمشىلىك بولمەلەرى ورنالاسقان. اۋلادا بالالاردىڭ ويىن الاڭى بار.
مەملەكەت باسشىسى نۇرسۇلتان نازارباەۆ ورتا مەكتەپ پەن “نۇرشۋاق” بالالار باقشاسىنا جاڭا “گازەل” اۆتوكولىكتەرىن سىيعا تارتتى. جاس ۇرپاقتىڭ ۇلتتىق داستۇرگە ساي تاربيە الۋى وسىنداي مەكەمەلەردەن باستاۋ الاتىنىنا توقتالدى.
قىزىلاعاش – كوپ ەتنوس تۇراتىن اۋىل. وسىنداعى قاسىرەت كەزىندە حالىق بىرلىگى, بەيبىتشىلىك, كەلىسىم جانە ىنتىماقتاستىق قاعيداتتارىنا ادال بارلىق ەتنوستار زارداپ شەككەندەرگە كومەك كورسەتۋگە كىرىستى, الەۋمەتتىك نىسانداردى سالۋعا ءوز ۇلەستەرىن قوستى. اسىرەسە رەسپۋبليكالىق ۇيعىرلار مادەنيەت ورتالىعىن, تۇرىكتەردىڭ “تۇركيا” قوعامىن, ءازىربايجان مادەني-قوعامدىق بىرلەستىكتەرى كونگرەسىن ايرىقشا اتاپ وتكەن ءجون. ولاردىڭ وكىلدەرى مول اقشا قاراجاتىن قوسۋمەن قاتار قۇرىلىس جۇمىستارىنا تىكەلەي قاتىستى. سوندىقتان دا بولار ەلباسى نۇرسۇلتان نازارباەۆ اۋىلداعى كوپ ۇلتتى, ءارى كوپ بالالى وتباسىلارىندا بولدى. قىزىلاعاش اۋىلىنداعى باۋىرجان مومىش ۇلى كوشەسىندە تۇراتىن زايتسەۆ ۆلاديمير نيكولاەۆيچ كوپ جىلدان بەرى “كۆيتكو” شارۋا قوجالىعىندا مەحانيزاتور بولىپ ىستەيدى. ازاماتتىڭ وتباسى كوپ ۇلتتىڭ وكىلىنەن قۇرالسا, بۇگىن ءبارى ۇلكەن شاڭىراققا جينالىپتى. ءوزى پولياك, ايەلى ليۋدميلا ۋكراين ۇلتىنىڭ وكىلى, قىزى الەكساندرا قازاق جىگىتى جاندوسپەن تاعدىرىن قوسسا, ولەسياسى كارىس جىگىتى ۆاديمگە تۇرمىسقا شىعىپتى. تاعى ءبىر ايتا كەتەتىن جاي ءۆلاديميردىڭ اتاسى دميتري, شەشەسى گالينا وسى قىزىلاعاشتا ومىرگە كەلگەن جاندار ەكەن. ەكى قىزىنان نەمەرە سۇيگەن ولار بۇگىنگى كۇنى ءتورت ۇرپاقتىڭ باسىن قوسقان. وتباسىنداعى جاراستىققا ادام قىزىعاتىنداي. ءۆلاديميردىڭ اكەسى نيكولاي جانە ءوزى, بالالارى قىزىلعاشتاعى مەكتەپتە ءبىلىم الىپتى.
ەلباسىنىڭ ارنايى وتباسىنا كەلگەنىنە قۋانىشىن جاسىرماعان ۆلاديمير مەن ليۋدميلا وزدەرىنە جاسالعان قامقورلىققا ريزاشىلىقتارىن ءبىلدىردى.
– سۋ تاسقىنى بولعان ءساتتى ۇمىتپايمىز. اپاتقا شامامەن جارتى ساعات قالعاندا قۇجاتتارىمىزدى عانا الىپ, اۋىلدان كەتىپ قالدىق. ءبىز عانا ەمەس, بارشا اۋىل تۇرعىندارى جاپا شەكتى. قۇرمەتتى نۇرسۇلتان ءابىش ۇلى, ءسىزدىڭ تىكەلەي تاپسىرماڭىزبەن ءتورت ايدا اۋىل قايتادان قالپىنا كەلتىرىلدى. ءوزىم تۇرعان ءۇيدىڭ ورنىنا تاماشا باسپانا سالىندى. وسىعان قوسا تۇرمىسقا قاجەتتىلىكتەردىڭ بارلىعىمەن قامتاماسىز ەتتى. بۇگىن-ەرتەڭ مال اكەلىپ بەرمەك. بۇدان ارتىق قانداي جاقسىلىق بولادى, – دەدى وتاعاسى.
مەملەكەت باسشىسى جاستار كوشەسىندە تۇراتىن كوپ بالالى ايدار بايزۋليننىڭ شاڭىراعىنداعى شاتتىققا ورتاقتاستى. ءبىر ايتا كەتەرلىگى, ولار جاقىندا عانا ۇلى ايدىندى ۇيلەندىرىپتى. بۇل – قىزىلاعاشتاعى العاشقى قۋانىش. جاڭا وتاۋداعى ەكى جاس “ديپلوممەن – اۋىلعا” باعدارلاماسى اياسىندا وسىنداعى ورتا مەكتەپتە قىزمەتكە كىرىسىپتى. نۇرسۇلتان ءابىش ۇلى ولاردىڭ جاڭا قونىستارىنا قۇتتى بولسىن ايتسا, شاڭىراق يەلەرى العىستارىن ءبىلدىرىپ, ىستىق ىقىلاستارىن ارنادى.
وبلىس اكىمى سەرىك ۇمبەتوۆ ەلباسىن كۇردەلى جوندەۋدەن وتكەن مادەنيەت ءۇيىنىڭ جۇمىسىمەن تانىستىردى. نۇرسۇلتان ءابىش ۇلى اسەم عيماراتتى ارالاپ كورىپ, ونىڭ قىزمەتكەرلەرىنە ساتتىلىك تىلەدى, اۋىل ونەرپازدارىنا پيانينو سىيعا تارتتى.
مەملەكەت باسشىسى بۇدان سوڭ اۋىلدىڭ شىعىسىنداعى تاسقىننان باقيلىق بولعان جاندارعا قويىلعان ەسكەرتكىش-مونۋمەنت جانىنداعى قىزىلاعاشتىق ارداگەرلەر مەن جالپى جۇرتشىلىقپەن كەزدەستى. ەسكەرتكىش-مونۋمەنتكە گۇل شوعىن قويىپ, تاعزىم ەتكەن ەلباسىن حالىق اسقان ريزا پەيىلمەن قارسى الدى.
– قۇرمەتتى حالايىق, قادىرلى جەرلەستەر! بۇگىنگى ساپاردىڭ ءمان-جايىن بىلەسىزدەر. قازاقستاندا عانا ەمەس, الەمنىڭ ءار تۇكپىرىندە ءتۇرلى تابيعي اپاتتار ورىن الىپ, قانشاما حالىق زارداپ شەگىپ جاتقانى بەلگىلى. قىزىلاعاشتاعى جاعدايدان كەيىن ۇكىمەتكە جەدەل تاپسىرما بەرىپ, ارنايى كوميسسيا قۇرىلىپ, ۇلكەن جۇمىستاردىڭ تياناعى كەلتىرىلدى. 8 ملرد. تەڭگەدەن استام قارجىعا اتقارىلعان جۇمىس ناتيجەسىندە اۋىل قايتا تۇلەدى. بۇل, بىرىنشىدەن, مەملەكەت تاۋەلسىزدىگىنىڭ ارقاسى, ەكىنشىدەن, ونىڭ كۇش-قۋاتىن بىلدىرسە, ۇشىنشىدەن, ەلدىڭ بىرلىگى مەن ىنتىماعىنىڭ ناتيجەسى دەپ باعالاعان ءجون. بارشا حالىق ءبىر جەڭنەن قول شىعارىپ, جۇمىلۋىنىڭ ارقاسىندا قانداي جۇمىس جاسالعانىن كوردىڭىزدەر. سونىمەن قاتار “نۇر وتان” پارتياسىنىڭ باستاماسىمەن ءار ادام ءبىر كۇندىك جالاقىلارىن اۋدارسا, مەملەكەتتىك كومپانيالار قورعا قوماقتى قارجى قۇيدى. ۇكىمەتتىڭ, وبلىس اكىمىنىڭ, اۋدان باسشىلارىنىڭ مەنىڭ تاپسىرمامدى ورىنداۋىنىڭ جانە توتەنشە جاعدايلار جانە قورعانىس مينيسترلىكتەرى جاۋاپكەرشىلىكتى ءتۇسىنىپ, جەدەل ءىس-ارەكەت ەتىپ, تەحنيكالاردى توپتاستىرۋىنىڭ ارقاسىندا بۇگىن ءبىر اۋىل قالپىنا كەلتىرىلىپ, جاڭاردى. بار بولعانى ءتورت ايدىڭ ىشىندە بارلىعى جاڭادان 467 ءۇي قايتا سالىندى.
جالپى, قازىرگى الەمدىك قارجى جۇيەسىندە داعدارىس بار. بوس جاتقان قارجى جوق. بىراق, مەملەكەت سوعان قاراماستان, بارشاڭىزعا كومەكتەستى, جاعداي جاسادى. وسىنى بالالارىڭىزعا, نەمەرەلەرىڭىزگە ايتىپ, ولاردىڭ ەلى ءۇشىن ەڭبەك ەتۋلەرىنە اتسالىسۋلارىڭىز كەرەك. اۋىلداعى حالىقتىڭ جارتىسىنا جۋىعى ەجەلگى اتامەكەنىن اڭساپ, ورالعان قانداستارىمىز. قازاقستان الەمگە شاشىراپ كەتكەن قانداستارىن اتامەكەنىنە شاقىرىپ, باسىن قوسىپ, باۋىرىنا تارتىپ جاتقان بىردەن ءبىر مەملەكەت. وسى باعىتتا ءبىراز شارۋا اتقارىلىپ جاتىر. ارينە, شەتتەن ورالعان اعايىنداردىڭ قازاقستاننىڭ بۇگىنگىدەي گۇلدەنىپ, ءوسىپ-وركەندەۋىنە ەڭبەكتەرى سىڭە قويعان جوق. “جامان ايتپاي, جاقسى جوق” دەگەن قازاقتىڭ ءسوزى بار. مۇنداي ۇيلەردە تۇرامىن دەپ ويلاعان جوق شىعارسىزدار. جەر جانناتى جەتىسۋدىڭ جاننات جەرىندە تۇرىپ جاتىرسىزدار. ەندىگى جەردە ەل ىشىنە ءسىڭىسىپ, ۇيرەنىپ, بالا-شاعا ءوسىرىپ, جاقسى ءومىر سۇرۋگە, وسى ەلدىڭ جارقىن بولاشاعىنا ۇلەس قوسۋعا ۇمتىلادى, دەپ سەنەمىز.
قىزىلاعاش قازىر اۋىل ەمەس, قالانىڭ دەڭگەيىندەگى ەلدى مەكەنگە اينالدى. ەندىگى ايتارىم, اۋىلدى كوركەيتۋدى, اباتتاندىرۋدى ودان ءارى جالعاستىرىڭىزدار. مەملەكەتكە قول جايىپ, قاراپ وتىراتىن ۋاقىت كەتتى. سوندىقتان ماڭايلارىڭىزداعى جەرگە ەگىن ەگىپ, تىرشىلىك جاساڭىزدار. جاقىن كۇندەردە ءار وتباسىنا جىلقى, ءىرى قارا, 10 قويدان بەرىلەدى.
مەملەكەتىمىزدى ءسۇيۋ, قازاقستاننىڭ پاتريوتى بولۋ, تاۋەلسىزدىگىمىزدى قولداۋ, جاستارىمىزدى ونى قاسىق قانى قالعانشا قورعاۋعا تاربيەلەۋ – ءبىزدىڭ مىندەتىمىز.
ءبىز سىزدەرمەن قاسيەتتى رامازان ايىندا كەزدەسىپ وتىرمىز. اللانىڭ بىزگە دەگەن شاپاعاتى ەشقاشان تاۋسىلماسىن. بەيبىتشىلىك پەن ەل ىشىندەگى تىنىشتىقتىڭ ارقاسىندا, قازاقستاننىڭ بايلىعىن حالىقتىڭ الدىنا سالۋدىڭ ارقاسىندا ءبىزدىڭ بولاشاعىمىز وتە زور بولادى. ءبارىمىز سوعان اتسالىسىپ, قولدان كەلگەنشە تەر توگىپ, كومەكتەسۋىمىز كەرەك. جاستاردى ءبىلىمدى بولۋعا, جاقسى وقۋعا تاربيەلەۋ كەرەك. سەبەبى, بۇگىن ءبىلىم باسەكەسىنەن وزعان عانا تابىسقا جەتەدى. ءبىلىمدى, بىلىكتى جاستارى كوپ مەملەكەت قانا وزىق بولادى. ايتپەسە ءبىز تاعى دا ارتتا قالامىز. الدىمىزدا جۇمىسىمىز كوپ. مىنەكي, يندۋستريالىق باعدارلاما جاساپ, قازاقستاندى تەك قانا جەر قويناۋىنىڭ بايلىعىنا قاراتىپ قويماي, وڭدەۋ سالاسى وركەندەگەن ەلگە اينالدىرايىق دەپ تالپىنىپ, جاڭاعا بەتبۇرىس جاساپ جاتىرمىز.
الماتى وبلىسىنىڭ وزىندە 16 جوبا ىسكە اسىرىلۋدا. “جول كارتاسى” باعدارلاماسىمەن جولدار سالىنىپ, ەلدى مەكەندەرگە اۋىز سۋ اكەلىنىپ جاتىر. وسىلايشا حالىق جۇمىسپەن قامتىلۋدا. جىل سايىن جالاقى مەن زەينەتاقى كوتەرىلۋدە. بىردە ءبىر مەملەكەت مۇنداي اۋقىمدى جۇمىستى جاساپ جاتقان جوق. ەلىمىزدى ءتۇرلى ەتنوستار مەكەندەپ, قانشا كوپ ءدىن بولعانىمەن, بىرلىگىمىزدەن اينىعان جوقپىز. سونىڭ ارقاسىندا دۇنيە جۇزىنە بەلگىلى بولدىق. الداعى كەزدە دە وسى قۇندىلىعىمىزدى ساقتايىق. قازىرگى كەزدە قازاقستان وزگە مەملەكەتتەرمەن تەرەزەسى تەڭ ەل بولدى, ەشكىمنەن كەم ەمەسپىز.
الداعى ۋاقىتتا الەم مەملەكەتتەرى باسشىلارىنىڭ باسى قوسىلىپ, ەقىۇ-نىڭ ۇلكەن ءسامميتى وتپەكشى. مۇنىڭ ءبارى قاجىرلى ەڭبەكتىڭ ارقاسى. قازاقتى ەشكىم تانىماسا, بۇگىندە الەم مويىندادى. قازاقستاننىڭ دارەجەسى, قازاقتىڭ دارەجەسى ءوستى. سوندىقتان اتا-بابامىزدىڭ توگىلگەن قانى اقتالىپ, ويداعى ارمانى ورىندالدى.
قونىستارىڭىز قۇتتى بولسىن دەپ ايتقىم كەلەدى. وتكەنگە سالاۋات ايتىپ, الداعى جاقسى ىستەرگە ۇمتىلايىق. تاۋەلسىز قازاقستان جاساسىن! قازاقتىڭ كوكبايراعى بيىكتە جەلبىرەسىن! قازاقتىڭ ماڭدايىنداعى جۇلدىزى ەشۋاقىتتا سونبەسىن, دەپ تەبىرەنە سويلەدى ەلباسى نۇرسۇلتان نازارباەۆ جۇرتشىلىقپەن كەزدەسۋىندە.
كوپشىلىك الدىندا اقسۋ اۋداندىق ارداگەرلەر كەڭەسىنىڭ توراعاسى نۇربەك قاسىمبەكوۆ ءسوز الىپ, بيىلعى كوكتەمدەگى سۋ تاسقىنىنان زارداپ شەككەن قىزىلاعاشتىقتارعا كورسەتىلگەن قامقورلىققا العىسىن ءبىلدىرىپ, ەلباسىنىڭ كەلگەن قادامىنا ساتتىلىك تىلەپ, جينالعاندار اتىنان العىسىن جەتكىزدى. ءال-فارابي اتىنداعى ۇلتتىق ۋنيۆەرسيتەتتىڭ ستۋدەنتى, اۋىل تۇرعىنى لەسكەن ءالباتىر ۇلى جىردان شاشۋ شاشتى.
قىزىلاعاش قاسىرەتىن ەڭسەرۋ, از عانا ۋاقىتتا جاڭا اۋىل سالىپ شىعۋ بارلىق ەتنوستاردىڭ قازاقستاندىق ءپاتريوتيزمىنىڭ جانە ازاماتتىق توپتاسقاندىعىنىڭ جوعارى دەڭگەيىن كورسەتتى. جاڭا اۋىل بوي تۇزەپ, مۇندا جاڭاشا قارىم-قاتىناس قالىپتاسۋى مەملەكەت باسشىسى بۇكىل تاۋەلسىزدىك جىلدارى جۇرگىزىپ كەلە جاتقان ۇلتتىق ساياسات ەلدىڭ كوپ ەتنوستى تۇرعىندارىن ءبىرتۇتاس حالىققا بىرىكتىرگەنىن ءىس جۇزىندە دالەلدەپ بەردى. بۇگىندە قازاقستاننىڭ ءبىرتۇتاس حالقى ورتاق ماقساتتارمەن جانە مىندەتتەرمەن تىنىستاپ, ورتاق قۇندىلىقتاردى نەگىزگە الىپ, ءومىر سۇرۋدە.
قىزىلاعاشتىقتار دا بارشا قازاقستاندىقتار سەكىلدى ەرتەڭ سپورت كۇنىن اتاپ وتەدى. سوندىقتان دا ەلباسى كەشەگى جۇمىس كۇنىن تالدىقورعاننىڭ كورىكتى عيماراتتارىنىڭ قاتارىنان سانالاتىن جاڭا امبەباپ سپورت سارايىن كورۋدەن باستادى. ونىڭ الدىنا جىر ءدۇلدىلى جامبىلدىڭ ۇستازى, اقىنداردىڭ اقىنى, ايدىن كولدەي اقىلى دەگەن قۇرمەتكە يە ءسۇيىنباي ارون ۇلىنىڭ ەسكەرتكىشى ورناتىلعان. ەلباسى وبلىس اكىمى سەرىك ۇمبەتوۆ پەن پرەزيدەنت اكىمشىلىگىنىڭ باسشىسى اسلان مۋسين باستاعان وزگە دە رەسمي ادامدارمەن سپورتتىڭ كوپتەگەن تۇرىنەن جاتتىعۋلار مەن جارىستار, سالتاناتتى جيىندار مەن كونتسەرتتەر وتكىزۋگە لايىقتالعان جانە جابدىقتالعان سارايدى ارالادى. سارايدىڭ ەكىنشى قاباتىنداعى دزيۋدو زالىنداعى سپورتشىلاردىڭ كەزەكتى جاتتىعۋىن وتكىزۋ ءساتىن كوردى. وقۋ-جاتتىعۋ ويىندارىن وتكىزگەن “جەتىسۋ” كاسىپقوي ۆولەيبولدان قىزدار كومانداسىنىڭ ويىنىن تاماشالاپ, وسىندا اۋىر اتلەتيكادان قازاقستاننىڭ قۇراما كومانداسى مۇشەلەرىمەن پىكىرلەستى. ولاردىڭ اراسىنان التىننان القا تاعىپ, كوگىلدىر تۋدى الەمدىك وليمپيادالار تورىندە جەلبىرەتكەن الەم چەمپيوندارى ۆلاديمير سەدوۆ, مايا مانەزا, سۆەتلانا پودوبەدوۆا, يليا يلين بار. تۋريزم جانە سپورت ءمينيسترى تەمىرحان دوسمۇحامبەتوۆ تۇسىنىك بەرىپ ءجۇردى. ارحيتەكتۋرالىق جاعىنان كوز قىزىقتىرعان سارايدىڭ ىشكى, سىرتقى كەلبەتىنە ريزاشىلىعىن بىلدىرگەن پرەزيدەنتكە سپورتشىلار ءالى دە تالاي دودالاردا ەل مەرەيىن وسىرەتىندىكتەرىن ايتىپ, سەندىردى.
كۇمىسجان بايجان.
----------------------------------
سۋرەتتەردى تۇسىرگەندەر س.بوندارەنكو, ب.وتارباەۆ.
