تالانتتى جاس ونەرپازداردىڭ باسىن بىرىكتىرىپ, ولاردىڭ ونەرلەرىنە شابىت بەرىپ, شىعارماشىلىقتارىنا باعىت سىلتەپ جۇرگەن ونەر ۇجىمدارى, قۇدايعا شۇكىر, ەلدىڭ باس قالاسى – استانادا جەتەرلىك. انسامبل دەيسىز بە, بي توبى دەيسىز بە, ساز مەكتەپتەرى دەيسىز بە, ايتەۋىر ونەردىڭ سان قىرىن اشاتىن ونەر ورتالىقتارى شەتىنەن اشىلىپ جاتىر. ونەردى العا قاراي جىلجىتاتىن, جاس تالانتتاردىڭ تانىلۋىنا ەلەۋلى ىقپال ەتىپ جۇرگەن مۇنداي ونەر مەكتەپتەرى مەن ورتالىقتارىنىڭ اشىلۋى اتا-انالار مەن بالالاردى قۋانتىپ جاتسا, ەكىنشى جاعىنان ۇلتتىق مادەنيەت پەن ونەرىمىزدى ناسيحاتتاۋدىڭ دا وزىندىك سارا جولى.
وسى ورايدا فرانتسيا, ەگيپەت, يسپانيا, بىرىككەن اراب امىرلىگى, يندونەزيا سىندى مەملەكەتتەردە ۇلتتىلىعىمىزدى دارىپتەپ, رۋحاني قازىنامىز بولىپ سانالاتىن ءتول ونەرىمىزدى تانىستىرىپ جۇرگەن, ءوزدەرى شاعىن بولسا دا 23 رەت شەتەلدەرگە شىعىپ, ءتۇرلى بايقاۋلار مەن فەستيۆالدارعا قاتىسىپ, ەل ابىرويى مەن قازاق اتىن ايگىلەپ جۇرگەن استانا قالاسى №2 بالالار ساز مەكتەبىنىڭ جانىنان قۇرىلعان “شەكسىز اۋەن” اتتى جاستار ورتالىعىنىڭ قازاق ونەرىنە ءسىڭىرىپ جۇرگەن ەڭبەگىن ايتپاسقا بولماس.
ءبىر ايتا كەتەتىن جايت, وتكەن جىلى وسى ونەر ۇجىمىنىڭ ءبىر اي بويى فرانتسيادا وتكەن ءۇش بىردەي حالىقارالىق فەستيۆالدارعا قاتىسىپ, ۇلكەن ابىرويعا كەنەلىپ قايتقاندارىن جازعان بولاتىنبىز. ال ەندى, مىنەكي, بيىلعى, ياعني 2010 جىلى “شەكسىز اۋەن” جاستار ورتالىعى يندونەزيانىڭ استاناسى دجاكارتا قالاسىندا وتكەن ءى حالىقارالىق “ارسەنا” مۇسىلماندار فەستيۆالىنە قاتىسىپ قايتىپتى.
“جۇزدەرى جارقىن, تۇستەرى جىلى, قونايقجاي يندونەزيا حالقىن كورگەندە ءوزىمىزدى, قازاعىمىزدى كورگەندەي بولدىق. ءبىزدى جىلى قارسى الىپ, ەرەكشە ءىلتيپات ءبىلدىرىپ جاتتى. فەستيۆال سالاۋات ايتۋدان باستالىپ, سوسىن يمام قۇران باعىشتادى. وسىنداي جۇرەكتىڭ ەڭ ءبىر ابزال, ەڭ ءبىر پاك سەزىمى – اللاعا دەگەن پەندەسىنىڭ ماحابباتى بويىمىزعا كەرەمەت جىگەر بەرگەندەي بولدى. سول كەزدە ونەر ۇجىمىنداعى دومبىراشى, جىرشى, ءانشى, تەرمەشى بالالارمەن قوسا, س.سەيفۋللين اتىنداعى قازاق اگروتەحنيكالىق ۋنيۆەرسيتەتىنىڭ وقىتۋشىسى گۇلميرا ماعزۇموۆا جەتەكشىلىك ەتەتىن “راۋان” بيشىلەر توبى, كوكشەتاۋ قالالىق فيلارمونياسىنىڭ تانىمال انشىلەرى مايرا ەسمۇقانوۆا مەن بيسارا ماكەنوۆا, استانا قالالىق فيلارمونياسىنىڭ دومبىراشىلارى دا بولدى. ءبارىمىز قوسىلىپ, حالقىمىزدىڭ ءانىن ايتىپ, ءبيىن بيلەپ بەردىك. وزگە ەلدەردەن كەلگەن ونەرپازداردىڭ بىزگە دەگەن ىقىلاستارى دا ەرەكشە بولدى. ءبىر جاعىنان ولاردىڭ ءبىزدىڭ ۇلتتىق ونەرىمىزگە دەگەن ءىلتيپاتتارىن كورىپ, ءبىز دە ريزا بولدىق. وسى فەستيۆال اياسىندا قالا شەرۋى ۇيىمداستىرىلدى. شەرۋ كەزىندە ءار مەملەكەتتەن كەلگەن دەلەگاتتار وزدەرىنىڭ مەملەكەتتىك تۋىن ۇستاپ, ءانۇراندارىن شىرقادى. قالانىڭ اسەم جەرلەرىن ارالاپ, باس يمامنىڭ تەك قازاقستاندىق دەلەگاتتارعا ارنالعان كەزدەسۋىنە قاتىسىپ, باس يمامنىڭ ءوزى باسشىلىق ەتەتىن مەدرەسەسىندە بولىپ قايتتىق. سونىمەن قاتار دجاكارتا قالاسىنىڭ باس يمامى ءبىزدى ۇيىنە شاقىرىپ, ءتۇسكى اس بەردى. ءبىز ءۇشىن دە بۇل ءۇلكەن ابىروي بولدى. بالالار دجاكارتا قالاسىندا ونەر كورسەتىپ قانا قويماي, وسى قالاداعى ەڭ ءىرى حايۋاناتتار باعىندا بولىپ, الەمدەگى سيرەك كەزدەسەتىن جانۋارلاردى ءوز كوزدەرىمەن كورىپ قايتتى. ءۇندى مۇحيتىنىڭ سۋىنا قاڭتار ايىندا سۋعا ءتۇسۋ بالالار ءۇشىن ەشقاشان دا ۇمىتىلمايتىن وقيعا بولعانى انىق”, – دەپ دجاكارتا قالاسىندا وتكەن فەستيۆالدىڭ تىنىسىمەن “شەكسىز اۋەن” جاستار ورتالىعىنىڭ ديرەكتورى وسپان سۇلەيمەنوۆ ءبىزدى تانىستىرىپ ءوتتى.
جەمىستى باستالعان جىل ءناتيجەلى جەمىسپەن ءوز جالعاسىن تاۋىپ كەلەدى. وسى جاقىندا عانا “شەكسىز اۋەن” ورتالىعىنىڭ ۇجىم مۇشەلەرى قىتاي حالىق رەسپۋبليكاسىندا وتكەن “شىڭجاڭ حالىقارالىق بالالار فەستيۆالىنە” قاتىسىپ قايتتى. قازاقستان, رەسەي, قىتاي, ءۇندىستان, پاكىستان, تۇركىمەنستان, قىرعىزستان سىندى 7 مەملەكەت قاتىسقان حالىقارالىق بالالار فەستيۆالىندە دە قازاقتىڭ حالىق ءانى شىرقالىپ, ۇلتتىق ءبيى كورەرمەندەردىڭ كوزايىمىنا اينالىپ, ءتول ونەرىمىز جينالعان جۇرتشىلىق قاۋىمدى سۇيسىندىرگەن كورىنەدى.
№2 ساز مەكتەبىنىڭ جانىنان قۇرىلعان باس-اياعى 20-دان استام عانا مۇشەسى بار ونەر ورتالىعىنىڭ ءتول ونەرىمىز بەن مادەنيەتىمىزدىڭ ءوسىپ-وركەندەۋىنە, الەم حالىقتارىنا قازاق اتىن تانىتۋ جولىندا ءوز ۇلەستەرىن قوسىپ جۇرگەنىنە ءبىز دە شەكسىز ريزامىز. قادامدارىنا نۇر جاۋىپ, وركەندەرى ءوسسىن جاس ورەندەردىڭ!
اراي ۇيرەنىشبەكقىزى.
