ول قازاقستان مەن يزرايل اراسىن مەملەكەتتىك جانە وڭىرلىك دەڭگەيدەگى سەنىمدى ارىپتەستىك قارىم-قاتىناس بايلانىستىرىپ وتىرعانىن اتاپ ءوتتى. ءوڭىر باسشىسى بۇعان دالەل رەتىندە وبلىستا ءيزرايلدىڭ تامشىلاتىپ سۋارۋ تەحنولوگياسى ەنگىزىلىپ جاتقانىن مىسالعا كەلتىردى. كەزدەسۋ بارىسىندا ەكونوميكالىق ارىپتەستىكتىڭ بولاشاقتاعى ماسەلەلەرى تۋرالى اڭگىمە ءوربىدى. ەلەۋسىن ناۋرىزباي ۇلى تۇيەقۇس وسىرەتىن فەرما جايلى اقپاراتتى زەيىن قويا تىڭدادى. ەلشى سونداي-اق “دوستىق” مادەنيەت ۇيىندە بولىپ, “شالوم” ەۆرەي قاۋىمداستىنىڭ وكىلدەرىمەن كەزدەستى, ولاردىڭ بىرقاتار سۇراقتارىنا جاۋاپ بەردى. قالانىڭ كوركەم جەرلەرىن ارالاپ كورگەن قوناق مەشىت پەن شىركەۋدى, سۋلى-جاسىل گۇلزار ىشىندەگى روتوندونى تاماشالادى.
ساتىبالدى ءساۋىرباي, اقتوبە وبلىسى.
ەلدى مەكەندەر اتاۋى وزگەرتىلدى. باتىس قازاقستان وبلىستىق ءماسليحاتىنىڭ كەزەكتى سەسسياسىندا بەلگىلى اقىندار جۇبان مولداعاليەۆ پەن قادىر مىرزا ءالى مەن ءانشى-كومپوزيتور ەسكەندىر حاسانعاليەۆكە “باتىس قازاقستان وبلىسىنىڭ قۇرمەتتى ازاماتى” اتاعى بەرىلدى. سونداي-اق سەسسيادا زەلەنوۆ اۋدانىنىڭ كوشىم اۋىلدىق وكرۋگىنە قاراستى بالاگان جانە ستەپنوي ەلدى مەكەندەرىنىڭ اتاۋىن جاڭاتاڭ جانە وركەن, ال پەرەمەتنىي اۋىلدىق وكرۋگىندە ورىن تەپكەن چەرنوياروۆتى قاراجار ەلدى مەكەنى دەپ وزگەرتۋ تۋرالى شەشىم قابىلداندى. اقجايىق اۋدانىنىڭ اقسۋات اۋىلدىق وكرۋگىندەگى كامەننىي باستاۋىش ءبىلىم بەرەتىن مەكتەپ اقبۇلاق مەكتەبى دەگەن اتاۋعا يە بولسا, مەرگەن اۋىلدىق وكرۋگىندەگى گورياچكين نەگىزگى جالپى ءبىلىم بەرەتىن مەكتەپ مويىلدى مەكتەبى بولىپ وزگەرتىلدى. چاپاەۆ اۋىلىنداعى №1 ورتا مەكتەپكە ۇشقىش, كەڭەس وداعىنىڭ ءارى رەسەي باتىرى قايىربولات مايدانوۆتىڭ, بۋدارين اۋىلدىق مەكتەپ-بالاباقشاسىنا ساتىم سۇپالدياروۆتىڭ, تايپاق اۋىلدىق وكرۋگىنە قاراستى كراسنويار اۋىلىنداعى ورتا مەكتەپكە كەڭەس وداعىنىڭ باتىرى تەمىر ءماسيننىڭ ەسىمدەرى بەرىلدى.
تەمىر قۇسايىن, باتىس قازاقستان وبلىسى.
كاسىبي مەرەكەلەرى اتالىپ ءوتىلدى. جۇما كۇنى ن.بەكەجانوۆ اتىنداعى وبلىستىق قازاق دراما تەاترىندا كولىك جانە بايلانىس قىزمەتكەرلەرىنىڭ كاسىبي مەرەكەلەرى مەرەيلەنىپ وتكىزىلدى. سالتاناتتى شارانى قۇتتىقتاۋ سوزىمەن اشقان وبلىس اكىمىنىڭ مىندەتىن اتقارۋشى رزاقۇل نۇرتاەۆ وسى سالا ەڭبەكشىلەرىنىڭ ەسەلى ەڭبەكتەرىمەن سىر ايماعىندا سەرپىندى جوبالار جۇزەگە اسىرىلىپ جاتقانىن تىلگە تيەك ەتتى. كاسىبي مەرەكەدە بىرقاتار ازاماتتارعا وبلىس اكىمىنىڭ العىس حاتى, كولىك جانە كوممۋنيكاتسيا مينيسترلىگىنىڭ قۇرمەت گراموتاسى, ازاماتتىق اۆياتسيا كوميتەتى توراعاسىنىڭ ماراپاتتارى تابىس ەتىلىپ, ەندى ءبىرسىپىراسىنا قۇرمەتتىلىكتەرىن پاش ەتەتىن توسبەلگىلەر تاعىلدى. كاسىبي مەرەكەلىك كەش ءان-شاشۋ مەن مىڭ بۇرالعان بيگە ۇلاستى.
ەركىن ءابىل, قىزىلوردا.
داستارقان مازىرىندە – سارى قىمىز. جەتىسۋ جەرىندە حالقىمىزدىڭ سالت-ءداستۇرىن ساقتاۋ مەن ونى جاس ۇرپاققا مۇرا رەتىندە قالدىرۋ ءۇردىسى بەرىك قالىپتاسقان. جاز بويى تالدىقورعان قالاسىندا ونداعان قىمىزحانا مەن شۇباتحانا تۇتىنۋشىعا ءمىنسىز قىزمەت كورسەتسە, بۇل شارا اۋدانداردا دا ەتەك العان. تالعار اۋدانىندا التىن كۇن قىزىپ, كوك كوتەرىلگەندە شارۋا قوجالىقتارى بيە بايلاپ, ادام دەنساۋلىعىن نىعايتاتىن سارى قىمىز ساپىرىپ, داستارحان مازىرىنە ۇسىنۋ ءداستۇرى باستالعان-دى. قىمىزحانانىڭ جاڭا ۇلگىسىن تۇتىنۋشىعا ۇسىنعان “نۇرلى” ۇلتتىق سۋسىندار ورتالىعىنىڭ” قىزمەتىن اپتاپ ىستىقتا الماتى مەن تالعاردىڭ اراسىن جالعايتىن كۇرە جولداعى جولاۋشىلار پايدالانىپ, شولدەرىن باسىپ, دامىلدايتىن ورىنعا اينالدىرىپ كەلەدى. قىمىز بەن شۇبات ىشۋگە ارنالعان ارنايى ورىن ايشىقتى بەزەندىرىلىپ, كەلۋشىلەردىڭ دەمالۋىنا جاسالعان جاقسى جاعدايمەن ەرەكشەلەنەدى. قىمىزبەن بىرگە تۇتىنۋشىلار ەت, قۋىرداق, سىرنە, تاعى باسقا ءدامدى تاعامدارىن, قۇرت-ىرىمشىك, بۋى بۇرقىراعان باۋىرساق پەن قويۋ شايدى ءىشىپ, العىستارىن جاۋدىرىپ اتتانادى. “داستارحان بايلىعى – دەننىڭ ساۋلىعى”, دەگەن كاسىپكەرلەردىڭ بيىك تالعامى ارقاسىندا ولاردىڭ تابىستارى دا مولايا تۇسۋدە.
كۇمىسجان بايجان, الماتى وبلىسى.
جاس گەولوگتاردىڭ وليمپياداسى. جۋىردا زىريان اۋدانىنىڭ تابيعاتى تامىلجىعان “كوگىلدىر بۇعاز” دەمالىس بازاسى ماڭىندا جاس گەولوگتاردىڭ تۇڭعىش وليمپياداسىنىڭ سالتاناتتى اشىلۋ ءراسىمى بولدى. وعان يندۋستريا جانە جاڭا تەحنولوگيا مينيسترلىگىنىڭ گەولوگيا جانە قازبا بايلىقتار كوميتەتىنىڭ توراعاسى بولات وجكەنوۆ, زىريان اۋدانىنىڭ اكىمى ەرماك ساليموۆ, گەولوگيا سالاسىنىڭ قىزمەتكەرلەرى قاتىسىپ, ءوز بىلىمدەرىن كوپشىلىك تالقىسىنا سالىپ وتىرعان جاستارعا تابىس تىلەدى. جيىندا پرەمەر-ءمينيستردىڭ ورىنباسارى, يندۋستريا جانە جاڭا تەحنولوگيالار ءمينيسترى اسەت يسەكەشەۆتىڭ قۇتتىقتاۋى وقىلدى. ال تومسك وبلىسى گۋبەرناتورىنىڭ ورىنباسارى ۆ. ەمەشەۆ جاس گەولوگتارعا ءسات ساپار تىلەدى. وليمپياداعا ءبىزدىڭ ەلدەن جەتى, رەسەيدىڭ تومسك وبلىسىنان بىرنەشە كوماندا قاتىسىپ, گەولوگيا سالاسىنداعى بىلىمدەرىن كوپشىلىك تالقىسىنا ۇسىندى. ءدۇبىرلى سايىستا جەڭىمپاز اتانعاندارعا رەسەي مەن قازاقستانداعى ءبىلىم وردالارىنا جولداما بەرىلدى.
وڭداسىن ەلۋباي, شىعىس قازاقستان وبلىسى, زىريان اۋدانى.
حالىقارالىق دجامبوري قوستانايدا ءوتتى. قاراتومار سۋ قويماسىنداعى تامىلجىعان تابيعات اياسىندا سكاۋتتاردىڭ حالىقارالىق “دجامبوري-2010” سلەتىنىڭ الاۋى جاعىلدى. ءتورت جىلدا ءبىر وتەتىن سلەتكە الىس جانە جاقىن شەتەلدەردەن جينالعان سكاۋتتار توبى مەن جاستار بىرلەستىكتەرىنىڭ, دۇنيەجۇزىلىك سكاۋتتار قوزعالىسى ۇيىمىنىڭ, قازاقستانداعى گەرمانيا, اقش, رەسەي ەلشىلىكتەرىنىڭ وكىلدەرىن قوستانايلىقتار قوناقجايلىلىقپەن قارسى الدى. سكاۋتتار تابيعات اياسىندا ءتۇرلى كەدەرگىلەردەن ءوتۋ جارىستارىن ۇيىمداستىردى. سكاۋت قوزعالىسىنىڭ پروبلەمالارىن ورتاعا سالدى, پىكىر الماستى. – مۇنداي كەزدەسۋلەر جاستار ۇيىمدارىنىڭ حالىقارالىق بايلانىسىن نىعايتا تۇسۋمەن قاتار, جاس ۇرپاق بويىندا پاتريوتتىق سەزىمدى تاربيەلەۋگە ۇلكەن ىقپال ەتەدى, – دەدى قوستاناي وبلىسىنداعى سكاۋتتار قوزعالىسىنىڭ جەتەكشىسى حاميت عابدۋللين.
ءنازيرا جارىمبەتوۆا, قوستاناي.
كۋرچاتوۆتىق باسشى-عالىمدارمەن جۇزدەستى. ەلىمىز ەگەمەندىككە قول جەتكىزگەنگە دەيىن كەشەگى سەمەي پوليگونىنىڭ ورتالىعى – كۋرچاتوۆتىڭ بىلايعى جۇرتقا ەسىگى جابىق بولاتىن. ال قازىر كەرىسىنشە, ونداعى ۇلتتىق يادرولىق ورتالىقتىڭ باسشى-عالىمدارى سەمەيگە ارنايى كەلىپ, مۇنداعى جۋرناليستەر قاۋىمى جانە ۇكىمەتتىك ەمەس ۇيىم وكىلدەرىمەن جۇزدەسىپ تۇرۋدى داستۇرگە اينالدىرعان. بۇل جولعى كەزدەسۋگە ونداعى عالىمداردى اتالعان ورتالىقتىڭ باس ديرەكتورى, اكادەميك قايرات كادىرجانوۆتىڭ ءوزى باستاپ كەلدى. كەزدەسۋ بارىسىندا ورتالىقتىڭ بولاشاعى, جالپى كۋرچاتوۆ قالاسىنىڭ كەلەشەگى تۋرالى سىندارلى ءسوز قوزعالىپ, سوعان وراي قويىلعان سۇراقتارعا بايىپتى جاۋاپ قايتارىلدى. مازمۇندى جۇزدەسۋگە سەمەيدەگى ۇكىمەتتىك ەمەس ۇيىم پرەزيدەنتى, “سەمەي-نەۆادا” قوزعالىسىنىڭ ۆيتسە-پرەزيدەنتى سۇلتان كارتوەۆ ۇيىتقى بولدى.
داۋلەت سەيسەن ۇلى, سەمەي.
جازعى اسكەري جيىن. ەل قارۋلى كۇشتەرى قۇرلىقتاعى اسكەرلەرىنىڭ باسقارۋ ورگاندارى, قۇرامالارى مەن بولىمدەرىنىڭ جاۋىنگەرلىك دايارلىعى جوسپارىنا سايكەس 19 شىلدە مەن 27 تامىز ارالىعىندا قۇرلىقتاعى اسكەرلەرگە قاراستى بارلاۋ بولىمدەرى مەن جاساقتارىنىڭ دالالىق جيىندارى وتكىزىلۋدە. “تەرىس اششىبۇلاق” وقۋ-جاتتىعۋ ورتالىعىندا ءوتىپ جاتقان بۇل ءىس-شارانىڭ باستى ماقساتى – باسقارۋ ورگاندارىنىڭ ۇيلەسىمدىگىن پىسىقتاۋ, جەكە قۇرامداردىڭ كاسىبي تۇرعىداعى تاجىريبەلىگىن ارتتىرۋ بولىپ تابىلادى. اتالعان جيىندارعا قۇرلىقتاعى اسكەرلەر باس قولباسشىلىعى باس شتابىنىڭ بارلاۋ باسقارماسى تولىق قۇرامىندا قاتىسىپ وتىر. سونداي-اق, بۇعان وڭىرلىك قولباسشىلىقتار مەن اەروۇتقىر اسكەرلەرى شتابتارىنىڭ بارلاۋ بولىمدەرى جانە قىزمەتتەرى, جەكە بارلاۋ باتالوندارى, موتواتقىشتار, مەحانيكالاندىرىلعان, دەنسانتتى-شابۋىلداۋشى بريگادالاردىڭ بارلاۋ جاساقتارى تارتىلعان. مىڭعا تارتا بارلاۋشىلاردى جيناپ وتىرعان وسى وقۋ-جاتتىعۋدا جەكە, كاسىبي دايىندىقتار ءتارىزدى پاندەرگە ايرىقشا ءمان بەرىلۋدە. اتالمىش ءىس-شارا شەڭبەرىندە ءتۇرلى جارىستار مەن ارنايى دايىندىقتار وتكىزۋ دە كەڭىنەن جوسپارلانعان. لاگەرلىك جيىندارعا جالپى جەتەكشىلىكتى ەل قارۋلى كۇشتەرى قۇرلىقتاعى اسكەرلەر باس قولباسشىلىعى باسقارماسى باس شتابىنداعى بارلاۋ باسقارماسىنىڭ باستىعى پودپولكوۆنيك ب.جۇراباەۆ جۇرگىزۋدە. دالالىق جيىندار 23-27 تامىز ارالىعىندا “جاۋىنگەرلىك ازىرلىكتى جوعارى دەڭگەيگە كەلتىرۋ. “بارلاۋ جۇيەسىن جەتىلدىرۋ”, وسى “ستراتەگيالىق باعىتتاعى تومەن جانە ورتا اسكەري قاقتىعىستاعى بارلاۋ جۇرگىزۋدى ۇيىمداستىرۋ” تاقىرىبىندا ارنايى وپەراتيۆتى جاتتىعۋ-ويىندارىمەن جالعاسىن تاپپاق, دەپ حابارلادى قورعانىس مينيسترلىگىنىڭ ءباسپاسوز قىزمەتى.
