«سارىارقا» «ەرماكپەن» بولعان ەكىنشى ويىندا ەسە جىبەردى

استانا. 13 ناۋرىز. جوعارى حوككەي ليگاسىنىڭ شيرەك فينالىندا قاراعاندىنىڭ «سارىارقاسى» ەكىنشى ويىندا قارسىلاسىنا ەسە جىبەردى. اتالعان سايىستا انگارسكىنىڭ «ەرماگىمەن» كۇش سىناساتىن قاراعاندىلىقتار بۇگىن 3:4 ەسەبىمەن جەڭىلۋگە ءماجبۇر بولدى. بۇل تۋرالى egemen.kz حابارلادى. ءبىرىنشى كەزەڭدە جانكۇيەرلەر گول كورە المادى. ەسەسىنە, ەكىنشى كەزەڭنىڭ العاشقى مينۋتىندا «سارىارقانىڭ» قورعاۋشىسى يليا انتونوۆسكي تاماشا سوققىسىمەن ەسەپ اشتى. كەشە وتكەن العاشقى ويىندا دا يليا ەسەپ اشىپ, تارتىس سوڭىنا دەيىن تاعى ءبىر مارتە كوزگە تۇسكەنىن ايتا كەتەيىك. ۇزىلىستەن شىعا سالا گول جىبەرىپ العان رەسەيلىكتەر دەرەۋ قارقىندارىن كۇشەيتىپ, شابۋىلدارىن ۇدەتە ءتۇستى. ناتيجەسى دە كوپ كۇتتىرگەن جوق. كەزەكتى شابۋىلدىڭ بىرىندە ايدىن يەلەرىنىڭ ويىنشىسى ءتارتىپ بۇزىپ, كىشى ايىپپەن جازالاندى. وسى ءساتتى ۇتىمدى پايدالانا بىلگەن قوناقتار رومان پوپوۆتىڭ ارقاسىندا تارازى باسىن تەڭەستىردى. لەونيد تامبيەۆتەن ءتالىم الاتىن قاراعاندىلىق حوككەيشىلەر ويىننىڭ 32-مينۋتىندا ەكىنشى شايبانى سوعىپ, ەسەپتە تاعى دا العا شىقتى. گولدىڭ اۆتورى – ولەگ لوماكو. بۇل جولى دا «سارىارقا» باسىمدىقتى ۇزاق ساقتاپ تۇرا المادى. لوماكونىڭ گولىنان كەيىن ارادا 5 مينۋت ۋاقىت وتكەندە «ەرماك» حوككەيشىلەرى ەكىنشى رەت ەسەپتى تەڭەستىردى. قاقپاشى ۆلاديمير كوۆاچتان ايلاسىن اسىرعان حوككەيشى اندرەي ششەربوۆ بولاتىن. ۇزىلىسكە دەيىن ايتارلىقتاي وزگەرىس بولعان جوق. ءۇشىنشى كەزەڭ تەڭ جاعدايدا ءوربىدى. قارسىلاستار بۇل كەزەڭدە تاعى ءبىر-بىردەن گول سوعىپ, ەسەپتى 3:3-كە جەتكىزدى. الدىمەن, باسەكەنىڭ 53-مينۋتىندا الەكساندر توريانيك «سارىارقانى» العا شىعارسا, ويىننىڭ اياقتالۋىنا ءبىر مينۋت قالعان كەزدە «ەرماك» ويىنشىسى ۆيتالي كارامنوۆ ءۇشىنشى رەت تارازى باسىن تەڭ قىلدى. قوس كوماندا دا گول سوققان ساتتە ويىنشى باسىمدىعىن جۇزەگە اسىرعانىن ايتا كەتەيىك. نەگىزگى ۋاقىتتا ءبىرىن ءبىرى الا الماعان قارسىلاستار جەڭىمپازدى انىقتاۋ ءۇشىن قوسىمشا كەزەڭگە جۇگىندى. ال بۇل سىندا قوناقتاردىڭ مەرەيى ۇستەم بولىپ, ءتورتىنشى شايبالارىن سوقتى. جەڭىس گولىنىڭ اۆتورى – دەنيس داۆىدوۆ. ناتيجەسىندە, «ەرماك» شيرەك فينالدىق باسەكەنىڭ جالپى ەسەبىن تەڭەستىردى. ەكى ويىننىڭ قورىتىندىسى بويىنشا ەسەپ 1:1. ەندى قارسىلاستار 16-17 ناۋرىز كۇندەرى رەسەيدىڭ انگارسك قالاسىندا ايقاسقا تۇسەدى. ەلامان قوڭىر. دەرەك: egemen.kz. سۋرەت: hc-saryarka.com.