مەلس ەلەۋسىزوۆ پرەزيدەنتتىككە ۇمىتكەر رەتىندە ءوتىنىش بەردى

استانا. 13 ناۋرىز. «تابيعات» ەكولوگيالىق وداعىنىڭ باسشىسى مەلس ەلەۋسىزوۆ  ورتالىق سايلاۋ كوميسسياسىنا پرەزيدەنتتىك سايلاۋعا ۇمىتكەر رەتىندە قاتىساتىنىن ايتىپ, ءوتىنىش بەردى. بۇل تۋرالى «قازاقپارات» حابارلادى. مەلس ەلەۋسىزوۆ: «ارينە, قۇجاتتارىمدى تاپسىردىم, ونىڭ ەش قيىندىعى جوق قوي. الدا لينگۆيستكالىق كوميسسيا سىناعى, ونىڭ قيىنداۋ بولاتىندىعى تۇسىنىكتى. دەگەنمەن, بۇعان دەيىن ەكى مارتە تاپسىرعان بولاتىنمىن. سوندىقتان وداگ وتەتىندىگىمە سەنىمدىمىن», – دەدى. سونىمەن قاتار ول پرەزيدەنتتىك سايلاۋعا قاتىسۋ ارقىلى قازاقستاننىڭ ەكولوگيالىق احۋالىنا كۇللى الەمنىڭ نازارىن اۋدارتقىسى كەلەتىندىگىن اتاپ ءوتتى. ايتا كەتەيىك, بۇگىندە ۇمىتكەرلەردىڭ سانى 23 ادامعا جەتتى. ونىڭ 21-ءى سايلاۋعا ءوزىن-ءوزى ۇسىنعاندار, ال ەكەۋىن, اتاپ ايتقاندا, نۇرسۇلتان نازارباەۆتى «نۇر وتان» پارتياسى, ال تۇرعىن سىزدىقوۆتى قازاقستاننىڭ كوممۋنيستىك حالىق پارتياسى ۇسىنعان. قازىرگى ۋاقىتتا ولاردىڭ سايلاۋ تالاپتارىنا سايكەستىگى تەكسەرىلىپ, كەيبىرى لينگۆيستيكالىق كوميسسياعا سىناق تاپسىرۋ ۇستىندە. ماسەلەن, 8 ۇمىتكەردى تىركەۋدەن باس تارتىلدى. ولاردىڭ ەكەۋىنىڭ جاسى كونستيتۋتسياعا سايكەس سايلاۋعا ءتۇسۋ جاسىنا تولماعان. التاۋى لينگۆيستيكالىق كوميسسيا سىناعىن تاپسىرا المادى. 4 ادام لينگۆيستيكالىق كوميسسيا سىناعىن تاپسىردى. ولاردىڭ سايلاۋ تالاپتارىنا سايكەستىگى تەكسەرىلدى. ولار قازىرگى ۋاقىتتا سەنىمدى تۇلعالارىن تىركەپ, قول جيناۋ جۇمىسىمەن اينالىسۋدا. جولدىباي بازار. دەرەك, سۋرەت: «قازاقپارات».