وسكەمەندە وقۋشى قىزدارعا قاۋىپ توندىرگەن كۇدىكتى ۇستالدى

وسكەمەن. 13 ناۋرىز. وسكەمەن قالاسىنىڭ قۇقىق قورعاۋ قىزمەتكەرلەرى جاس قىزدارعا «كوز الارتقان» كۇدىكتىنى انىقتادى. پوليتسەيلەردىڭ قولىنا تۇسكەن ول ءوزىنىڭ وقۋشى قىزدارعا شابۋىل جاساعانىن مويىندادى. بۇل تۋرالى egemen.kz ءتىلشىسى حابارلادى. تاراتا ايتار بولساق, وسىدان ەكى كۇن بۇرىن وقۋشىلاردىڭ اتا-انالارى پوليتسياعا شاعىمدانىپ, كوپقاباتتى ءۇيدىڭ كىرەبەرىسىندە بەلگىسىز ەر ادامنىڭ قىزدارىنا تيىسكەنىن ايتقان بولاتىن. ساقشىلار شاعىمدى قابىلداپ, اتالعان ءىستى قاتاڭ قاداعالاۋعا العان ەدى. كەلەسى كۇنى قۇقىق قورعاۋ قىزمەتكەرلەرى كۇدىكتى تۋرالى مالىمەتتەردى انىقتاپ, ونى ۇستاعان. – جەدەل قولعا الىنعان ىزدەستىرۋ شارالارىنىڭ ناتيجەسىندە گلۋبوكوە اۋدانىنىڭ بۇرىن سوتتالعان 32 جاستاعى تۇرعىنى قولعا ءتۇستى. ول ءوزىنىڭ زاڭعا قارسى ءىس-ارەكەتكە بارىپ, وقۋشى قىزدارعا ەمىنىپ, تيىسكەنىن مويىندادى. قازىر ۋاقىتشا وقشاۋلاۋ يزولياتورىنا قاماۋعا الىندى, – دەدى وبلىستىق ىشكى ىستەر دەپارتامەنتى ءباسپاسوز قىزمەتىنىڭ جەتەكشىسى باقىتجان تورعاەۆ. ۇستالعان ادامعا قاتىستى قىلمىستىق ءىس قوزعالىپ, ساراپتاما جۇمىستارى تاعايىندالدى. سونداي-اق, ونىڭ پسيحيكالىق جاعدايى دا تەكسەرىلىپ جاتىر. دۋمان اناش. دەرەك: egemen.kz. سۋرەت: yk-news.kz.