نازارباەۆتىڭ سايلاۋالدى شتابىن مۇحتار قۇل-مۇحاممەد باسقارادى

استانا. 13 ناۋرىز. قازاقستان رەسپۋبليكاسى پرەزيدەنتتىگىنە ۇمىتكەر – ءىس باسىنداعى پرەزيدەنت نۇرسۇلتان نازارباەۆتىڭ سايلاۋالدى شتابىنا بەس پارتيا كىردى, ال شتابتى مەملەكەت باسشىسىنىڭ بۇرىنعى كەڭەسشىسى مۇحتار قۇل-مۇحاممەد باسقارادى. بۇل تۋرالى Vلاست حابارلادى. «شتابقا التى پارتيانىڭ بەسەۋى (دەموكراتيالىق كۇشتەردىڭ جالپىۇلتتىق كاوليتسياسىنا كىرەتىن) عانا كىردى, سەبەبى, كوممۋنيستەر ءوز كانديداتتارىن ۇسىندى. قالعاندارى – پاتريوتتار پارتياسى, «اق جول», «اۋىل», «بىرلىك» جانە «نۇر وتاننىڭ» ءوزى. كەشە كەشكە جينالىپ, مىناداي شەشىم قابىلدادىق, قۇل-مۇحاممەدتىڭ شتاب باستىعى بولۋى جونىندە كەلىسىمگە كەلدىك», - دەدى پاتريوتتار پارتياسىنىڭ ليدەرى عاني قاسىموۆ وسىعان بايلانىستى. ەسكە سالا كەتەيىك, جۇما, 13 ناۋرىز كۇنى قازاقستان پاتريوتتار پارتياسىنىڭ الداعى پرەزيدەنت سايلاۋىنا ءوزىنىڭ كانديداتىن ۇسىنبايتىنى بەلگىلى بولدى. وسىنداي شەشىم بۇگىن پارتيانىڭ XIII سەزى بارىسىندا قابىلداندى. وسى كۇنى «اۋىل» سوتسيال-دەموكراتيالىق پارتياسى الداعى پرەزيدەنت سايلاۋىندا قازىرگى ءىس باسىنداعى پرەزيدەنتتىڭ كانديداتۋراسىن قولدادى. بۇدان بۇرىن, 4 ناۋرىز كۇنى قازاقستان پرەزيدەنتى نۇرسۇلتان نازارباەۆ قازاقستان رەسپۋبليكاسى پرەزيدەنتىنىڭ كەڭەسشىسى مۇحتار ابرار ۇلى قۇل-مۇحاممەدتى قىزمەتىنەن بوساتقان بولاتىن. ساكەن مايلىباي. دەرەك, سۋرەت: Vلاست.