ەلباسى بەينەسى – قىرعىز ساحناسىندا

بىشكەكتەگى توقتوبولوت ابدىمومۋنوۆ اتىنداعى قىرعىز ۇلتتىق دراما تەاترىندا قازاقستان پرەزيدەنتى نۇرسۇلتان نازارباەۆتىڭ ءومىر جولىنا ارنالعان  سپەكتاكلدىڭ تۇساۋى كەسىلدى. درامالىق شىعارما «ەر دوستىعى  – ەگىز, ەل دوستىعى – تەڭىز» دەپ اتالادى. سپەكتاكلدە نۇرسۇلتان نازارباەۆتىڭ جانە ونىڭ قىرعىز دوسى مارات اقماتاەۆتىڭ ۇشقوڭىر جايلاۋىندا, شەكارالاس قىرعىز اۋىلدارىندا وتكەن بالالىق شاعى, كەيىن ۋكراينانىڭ دنەپرودزەرجينسك قالاسىندا ەكى دوستىڭ باسقا دا قۇربىلارىمەن بىرگە كاسىپتىك ءبىلىم العانى شەبەر سۋرەتتەلىپ, بولاشاق ەلباسىنىڭ جاس كەزىندەگى ەرەكشە بەينەسى اشىپ كورسەتىلگەن. ەكى دوستىڭ اتا-انالارىنىڭ قارىم-قاتىناستارى, جايلاۋداعى جىلقىشىلاردىڭ تۇرمىسى, كەيىپكەرلەردىڭ ءسوز ساپتاۋى ارقىلى درامادا وتكەن عاسىردىڭ ەلۋىنشى جىلدارىنداعى قازاق-قىرعىز حالقىنىڭ ەتنوگرافيالىق بولمىسى ءساتتى كورىنىس تاپقان. پەسانىڭ اۆتورى جانە رەجيسسەرى قىر­عىزستاننىڭ بەلگىلى جۋرناليستەرىنىڭ ءبىرى, كەيىنگى جىلدارى دراماتۋرگيا سالاسىندا ىستەپ, قىرعىز-تۇرىك ماناس ۋنيۆەرسيتەتىندە ستۋدەنتتەرگە دراما جانرى بويىنشا ءتالىم-تاربيە بەرىپ جۇرگەن – امانبەك جاپاروۆ. «2009 جىلى نۇرسۇلتان نازارباەۆتىڭ قىرعىز دوسى مارات اقماتاەۆپەن جولىعىپ, كوپ ەستەلىكتەردى جازىپ العانمىن. سونىڭ نەگىزىندە ەلباسىنىڭ 70 جىلدىعىنا ارناپ پەسا جازىپ, ونى ساحناعا الىپ شىقپاق بولعانبىز. پەسا جازىلدى, بىراق «ويلاعان ويدى قىستاعان تۇرمىس جەڭىپ», ونى سول كەزدە ساحناعا شىعارا المادىق. ەشتەن كەش جاقسى, ەندى نۇرەكەنىڭ 75 جىلدىعىنا ۇلگەردىك. وسى ارادا مارات اقماتاەۆتىڭ ءوزى ومىردەن ءوتىپ كەتتى. ءوزى وتسە دە ءسوزى, جازىلعان حاتى (ەستەلىكتەرى) وسى شىعارمادا قامتىلدى. قازاق-قىرعىز دوستىعىن نىعايتۋعا قوماقتى سالىمىن قوسىپ وتىرعان نۇرسۇلتان ءابىش ۇلىنا قانداي قۇرمەت كورسەتسەك تە جاراسادى. دەگەنمەن, نەگىزگى ماقساتىمىز – ەكى ەلدىڭ ەجەلدەن جالعاسىپ كەلە جاتقان بىرلىگىن شىڭداۋ, جاس بۋىن وكىلدەرىنە ۇلكەن ادامداردىڭ دوستىعىن ۇلگى ەتۋ», – دەپ وي ءبولىستى امانبەك دىلدەنباي ۇلى. پەسانى ساحناعا قويعان رەجيسسەر – قىر­عىزستانعا ەڭبەگى سىڭگەن ءارتىس مارات قوزى­كەەۆ. پەسانى قويۋعا 30-دان اسا ءارتىس قاتىس­تى. نۇرسۇلتاننىڭ اكەسى ءابىشتىڭ ءرولىن قىرعىز­ستاننىڭ حالىق ءارتىسى ءدۇيشون ءبايدوبوتوۆ, نۇرسۇلتان نازارباەۆتىڭ بەينەسىن تەاتردىڭ جاس ءارتىسى ەرجان وسمونوۆ سومداعان. بىشكەكتە امانبەك جاپاروۆتىڭ «ەر دوستىعى – ەگىز, ەل دوستىعى – تەڭىز» دەپ اتالعان كىتابى قىرعىز, قازاق جانە ورىس تىلدەرىندە جارىق كوردى. ەلباسىنىڭ زامانداستارىنىڭ اڭگىمەلەرىمەن بىرگە مۇندا پەسانىڭ ءماتىنى دە كىرگىزىلگەن. نازاربەك بايجىگىتوۆ. قىرعىز رەسپۋبليكاسى. بىشكەك قالاسى.